ରାୟପୁର,୨୪।୪: ଗ୍ୟାଙ୍ଗଷ୍ଟର ଅତିକ୍ ଅହମ୍ମଦଙ୍କ ସହଯୋଗୀ ଗୁଡ୍ଡୁ ମୁସଲିମ୍ଙ୍କୁ ଧରିବାକୁ ନେଇ ଉତ୍ତରପ୍ରଦେଶ ସ୍ପେଶାଲ ଟାସ୍କ ଫୋର୍ସ (ଏସ୍ଟିଏଫ୍) ବିଭିନ୍ନ ରାଜ୍ୟରେ ଖୋଜାଖୋଜି କରୁଛି। ଇତିମଧ୍ୟରେ ଗୁଡ୍ଡୁ ଛତିଶଗଡ଼ରେ ଲୁଚି ରହିଥିବା ଏକ ସୂଚନା ମିଳିଛି।
ଅନ୍ୟପକ୍ଷେ ଗିରଫଦାରି କିମ୍ବା ଏନ୍କାଉଣ୍ଟର ଭୟରେ ଗୁଡ୍ଡୁ ପୁରୀକୁ ଆସି ଆତ୍ମଗୋପନ କରିଥିବା କେତେକ ଜାତୀୟ ଗଣମାଧ୍ୟମରେ ଚର୍ଚ୍ଚା ହୋଇଥିଲା। ଏପରି କି ଗୁଡ୍ଡୁଙ୍କ ଓଡ଼ିଶାର ବରଗଡ଼ ଲିଙ୍କ୍ ମଧ୍ୟ ସାମ୍ନାକୁ ଆସିଥିଲା। ୟୁପି ଏସ୍ଟିଏଫ୍ ଟିମ୍ ଗୁଡ୍ଡୁ ଡ୍ରାଇଭରଙ୍କ ସହ ଲିଙ୍କ୍ରେ ଥିବା ଭଟଲି ଅଞ୍ଚଳରେ ରହୁଥିବା ରାଜା ଖାନ୍ ନାମକ ଜଣେ ବ୍ୟକ୍ତିଙ୍କୁ ପଚରାଉଚରା କରି ଫେରି ଯାଇଥିଲା। ତେବେ ଜେରା ବେଳେ ରାଜାଙ୍କ ଘର ଛତିଶଗଡ଼ ମହାସମୁଦ ଅଞ୍ଚଳରେ ହୋଇଥିବା ବେଳେ ତାଙ୍କ ନାମରେ ମଧ୍ୟ ବହୁ ଆପରାଧିକ ମାମଲା ରହିଥିବା ସୂଚନା ମିଳିଛି। ଫେବୃୟାରୀ ୨୪ରେ, ପ୍ରୟାଗରାଜରେ ଉମେଶ ପାଲଙ୍କୁ ଗୁଳି କରି ହତ୍ୟା କରାଯାଇଥିଲା। ଏହି ଆକ୍ରମଣରେ ଗୁଡ୍ଡୁ ମଧ୍ୟ ସିସିଟିଭିରେ ନଜର ଆସିଥିଲେ। ହତ୍ୟା ପରଠାରୁ ଏସ୍ଟିଏଫ ଗୁଡ୍ଡୁଙ୍କୁ ଖୋଜୁଛି।
ସୂଚନାଯୋଗ୍ୟ, ଗୁଡ୍ଡୁ ବିଭିନ୍ନ ଅପରାଧ କରି ଜେଲରେ ଥିବାବେଳେ ଅତିକ୍ ତାଙ୍କୁ ବେଲ୍ରେ ମୁକୁଳାଇଥିଲେ। ପରେ ଅତିକଙ୍କ ଗ୍ୟାଙ୍ଗ ସହ ଗୁଡ୍ଡୁ ୧୦ ବର୍ଷ ହେଲା କାମ କରୁଥିବା ଜଣାପହିଛି। ଗୁଡ୍ଡୁ ବୋମା ତିଆରି ଏବଂ ଫୋପାଡ଼ିବାରେ ବେଶ୍ ପାରଙ୍ଗମ।
