ନୂଆଦିଲ୍ଲୀ,୨।୬: ମାସିକ ଆଧାରରେ ଦ୍ରବ୍ୟ ଏବଂ ସେବା କର (ଜିଏସ୍ଟି) ସଂଗ୍ରହରେ ଚଳିତ ବର୍ଷ ମେ’ ମାସରେ ୧୬% ହ୍ରାସ ଘଟି ୧.୪୧ ଲକ୍ଷ କୋଟିରେ ରହିଯାଇଛି। ପୂର୍ବ ମାସ ଅର୍ଥାତ୍ ଏପ୍ରିଲରେ ଜିଏସ୍ଟି ସଂଗ୍ରହ ୧.୬୮ ଲକ୍ଷ କୋଟି ଟଙ୍କା ରହିଥିଲା। ଜିଏସ୍ଟି ବ୍ୟବସ୍ଥା ଆରମ୍ଭ ହେବା ପରଠାରୁ ୨୦୨୨ ଏପ୍ରିଲରେ ସଂଗ୍ରହ ହାର ସର୍ବକାଳୀନ ଉଚ୍ଚ ସ୍ତରରେ ରହିଥିଲା। କେନ୍ଦ୍ର ଅର୍ଥ ମନ୍ତ୍ରଣାଳୟ ପକ୍ଷରୁ ଜାରି ତଥ୍ୟରୁ ଏ ସମ୍ପର୍କରେ ଜଣାପଡ଼ିଛି। ତେବେ ତଥ୍ୟ ଅନୁସାରେ ୨୦୨୧ ମେ’ ମାସ ତୁଳନାରେ ଚଳିତ ବର୍ଷରେ ଉକ୍ତ ଅବଧିରେ ଜିଏସ୍ଟି ସଂଗ୍ରହ ୪୪% ବୃଦ୍ଧି ପାଇଛି। ମନ୍ତ୍ରଣାଳୟ ବୟାନ ଅନୁସାରେ, ପ୍ରତ୍ୟେକ ବର୍ଷ ମେ’ ମାସରେ ଜିଏସ୍ଟି ସଂଗ୍ରହ ସାଧାରଣତଃ ଏପ୍ରିଲ ଅପେକ୍ଷା କମ୍ ରହିଥାଏ। ଏପ୍ରିଲ ମାସରେ ଆର୍ଥିକ ବର୍ଷର ଆରମ୍ଭ ହୋଇଥାଏ। ଫଳରେ ମେ’ ମାସର ସଂଗ୍ରହ ଏପ୍ରିଲ ମାସର ରିଟର୍ନ ସହିତ ଯୋଡ଼ା ହୋଇଥାଏ। ଏହାସତ୍ତ୍ୱେ ଚଳିତ ବର୍ଷ ମେ’ ମାସରେ ଜିଏସ୍ଟି ସଂଗ୍ରହ ୧.୪୦ ଲକ୍ଷ କୋଟିର ସରକାରୀ ଆକଳନଠାରୁ ଅଧିକ ରହିଥିବା ମନ୍ତ୍ରଣାଳୟ ପକ୍ଷରୁ କୁହାଯାଇଛି। ମେ’ ମାସର ମୋଟ୍ ଜିଏସ୍ଟି ସଂଗ୍ରହରେ ୨୫,୦୩୬ କୋଟି ଟଙ୍କା ସେଣ୍ଟ୍ରାଲ ଜିଏସ୍ଟି, ୩୨୦୦୧ କୋଟି ଟଙ୍କାର ରାଜ୍ୟ ଜିଏସ୍ଟି, ୭୩୩୪୫ କୋଟି ଟଙ୍କାର ଇଣ୍ଟିଗ୍ରେଟେଡ୍ ଜିଏସ୍ଟି ଏବଂ ୧୦,୫୦୨ କୋଟି ଟଙ୍କାର କମ୍ପେନ୍ସେସନ୍ ସେସ୍ ଅଂଶ ସାମିଲ ରହିଛି। ଉକ୍ତ ମାସର ଇଣ୍ଟିଗ୍ରେଟେଡ୍ ଜିଏସ୍ଟି ମଧ୍ୟରୁ ୨୭,୯୨୪ କୋଟି ଟଙ୍କା କେନ୍ଦ୍ର ଜିଏସ୍ଟି ଏବଂ ୨୩,୧୨୩ କୋଟି ଟଙ୍କାକୁ ରାଜ୍ୟ ଜିଏସ୍ଟିରେ ଭାଗ ବାଣ୍ଟି ଦେଇଛନ୍ତି। ଏହି ଭାଗବଣ୍ଟା ସମାଧାନ ପରେ କେନ୍ଦ୍ର ଜିଏସ୍ଟିର ମୋଟ୍ ସଂଗ୍ରହ ୫୨,୯୬୦ କୋଟି ଟଙ୍କା ଥିବା ବେଳେ ରାଜ୍ୟ ଜିଏସ୍ଟିରେ ମୋଟ୍ ସଂଗ୍ରହ ୫୫,୧୨୪ କୋଟି ଟଙ୍କା ରହିଛି। ୨୦୧୭ ଜୁଲାଇରୁ ଜିଏସ୍ଟି ବ୍ୟବସ୍ଥା ଲାଗୁ ହେବା ପରଠାରୁ ମେ’ ମାସ ସଂଗ୍ରହକୁ ନଜରରେ ରଖି ୪ର୍ଥ ଥର ପାଇଁ ମାସିକ ଜିଏସ୍ଟି କଲେକ୍ସନ୍ ୧.୪୦ ଲକ୍ଷ କୋଟି ଟଙ୍କାରୁ ଅଧିକ ରହିଛି। ଏହାଛଡ଼ା ଲଗାତର ୧୧ତମ ମାସ ପାଇଁ ଜିଏସ୍ଟି ସଂଗ୍ରହ ୧ଲକ୍ଷ କୋଟିରୁ ଅଧିକ ରହିଥିବା କେନ୍ଦ୍ର ଅର୍ଥ ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି।
