ନୂଆଦିଲ୍ଲୀ: ଚଳିତ ଆର୍ଥତ୍କ ବର୍ଷରେ ଭାରତର ମୋଟ ଘରୋଇ ଉତ୍ପାଦ(ଜିଡିପି)ନକାରାତ୍ମକ କିମ୍ବା ଶୂନ ସ୍ତରରେ ରହିବା ଆଶଙ୍କା ରହିଛି। କରୋନା ଯୋଗୁ ଏଭଳି ସ୍ଥିତି ସାମ୍ନା କରିବାକୁ ପଡିଛି ବୋଲି ଅର୍ଥମନ୍ତ୍ରୀ ନିର୍ମଳା ସୀତାରାମନ ମଙ୍ଗଳବାର କହିଛନ୍ତି। ଏକ କାର୍ଯ୍ୟକ୍ରମରେ ସେ କହିଛନ୍ତି ଯେ, ଘରୋଇ ବଜାର ଅଭିବୃଦ୍ଧିରେ ସୁଧାର ପରିଲକ୍ଷିତ ହେଉଛି। ଆସନ୍ତା ବର୍ଷ ସୁଦ୍ଧା ଭାରତ ପୁଣି ଥରେ ଦ୍ରୁତ ଅଭିବୃଦ୍ଧିଶୀଳ ଅର୍ଥ ବ୍ୟବସ୍ଥା ହୋଇପାରିବ। ଭାରତର ଅର୍ଥନୈତିକ ସୁଧାର ପ୍ରକ୍ରିୟାରେ ସ୍ଥିତାବସ୍ଥା ଫେରୁଥିବା ବେଳେ ଏହା ପୁଣିଥରେ ନିରନ୍ତର ଭିତ୍ତିରେ ଚାଲିବା ସମ୍ଭାବନା ଦେଖାଯାଉଛି। ପାର୍ବଣରେ ଆର୍ଥତ୍କ କାର୍ଯ୍ୟକଳାପ ଉନ୍ନତ ଥିବା ବେଳେ ଚଳିତ ଆର୍ଥତ୍କ ବର୍ଷ ତୃତୀୟ ଏବଂ ଚତୁର୍ଥ ତ୍ରୈମାସରେ ଅଭିବୃଦ୍ଧିରେ ବେଶ୍ ସୁଧାର ଆସିବା ନେଇ ଆଶା ରହିଥିବା ସେ ମତ ରଖିଛନ୍ତି।
କରୋନା ଭାଇରସ୍କୁ ନିୟନ୍ତ୍ରଣ କରିବା ଲାଗି ସାରା ଦେଶରେ ଲକ୍ଡାଉନ ଲାଗୁ କରାଇବା ନିଷ୍ପତ୍ତି ଠିକ୍ ବୋଲି ଦର୍ଶାଇଛନ୍ତି। ଲୋକଙ୍କ ଜୀବନ ରକ୍ଷା ଲାଗି ଏଭଳି ପଦକ୍ଷେପ ନିଆଯାଇଥିବା ସେ ଯୁକ୍ତି ବାଢ଼ିଛନ୍ତି। ମହାମାରୀ ବିରୋଧରେ ଲଢେଇ ଲାଗି ପ୍ରସ୍ତୁତ ରହିବାକୁ ଲକ୍ଡାଉନ ସମୟ ମଧ୍ୟ ପ୍ରଦାନ କରିଥିବା ସେ ମତ ପ୍ରକାଶ କରିଛନ୍ତି। ସରକାର ବିଭିନ୍ନ ପଦକ୍ଷେପ ସ୍ବରୂପ କରୋନା କଟକଣା ଧୀରେ ଧୀରେ କୋହଳ କରାଯିବା ଯୋଗୁ ଆର୍ଥତ୍କ କାର୍ଯ୍ୟକଳାପ ଟ୍ରାକ୍କୁ ଫେରୁଛି। ଏହାର ଉଦାହରଣ ଭାବେ ସୀତାରାମନ ନିକେଇ ମାନୁଫାକ୍ଚରିଂ ମ୍ୟାଜେନର୍ସ ସୂଚୀ(ପିଏମ୍ଆଇ)ର ଡାଟାକୁ ନେଇଛନ୍ତି। ପ୍ରଥମ ତ୍ରୈମାସରେ ଜିଡିପିରେ ଦ୍ରୁତ ହ୍ରାସ ଦେଖାଯାଇଥିଲା। ମାତ୍ର ଅନ୍ଲକ ପରେ ପିଏମ୍ଆଇ ୨୦୧୨ ପରଠାରୁ ସର୍ବୋଚ୍ଚ ସ୍ତରରେ ରହିଛି। ନଭେମ୍ବରରେ ଦେଶର ଫ୍ୟାକ୍ଟ୍ରି କାର୍ଯ୍ୟକଳାପ ସବୁଠାରୁ ଦ୍ରୁତ ରହିଥିବା ଆଇଏଚ୍ଏସ୍ ମାର୍କିଟ ପକ୍ଷରୁ ପ୍ରକାଶ ପାଇଥିବା ଡାଟାରେ କୁହାଯାଇଛି।
