ନୂଆଦିଲ୍ଲୀ,୧୩।୮: କେନ୍ଦ୍ର ସ୍ବମନ୍ତ୍ରୀ ଅମିତ ଶାହାଙ୍କ ଦ୍ୱାରା ଲୋକସଭାରେ ଉପସ୍ଥାପିତ ହୋଇଥିବା ଭାରତୀୟ ନ୍ୟାୟ ସଂହିତା (ବିଏନଏସ) ବିଲ୍କୁ ଅସାମ୍ବିଧାନିକ ବୋଲି କହିଛନ୍ତି ପୂର୍ବତନ ଆଇନମନ୍ତ୍ରୀ କପିଲ ସିବଲ। ସେ ଅଭିଯୋଗ କରି କହିଛନ୍ତି, ଔପନିବେଶିକ ଯୁଗର ଆଇନକୁ ଶେଷ କରିବା ବିଷୟରେ ସରକାର ଆଲୋଚନା କରୁଛନ୍ତି, କିନ୍ତୁ ତାଙ୍କ ଚିନ୍ତାଧାରା ହେଉଛି ସେମାନେ ଏହିପରି ଆଇନ ମାଧ୍ୟମରେ ଏକଛତ୍ରବାଦୀ ଶାସନ ଆଣିବାକୁ ଚାହୁଁଛନ୍ତି। ଯଦି ନୂତନ ନିୟମ ବାସ୍ତବରେ ପରିଣତ ହୁଏ ତେବେ ସେମାନେ ଦେଶର ଭବିଷ୍ୟତକୁ ବିପଦରେ ପକାଇବେ।
ବିଏନଏସ ବିଲ ବିଷୟରେ ସୂଚନା ଦେଇ ସିବଲ କହିଛନ୍ତି ଯେ, ଏହା ବିପଜ୍ଜନକ ଏବଂ ଯଦି ଏହା ପାରିତ ହୁଏ ତେବେ ସମସ୍ତ ଅନୁଷ୍ଠାନ କେବଳ ସରକାରଙ୍କ ଦ୍ୱାରା ପରିଚାଳିତ ହେବ। ମୁଁ ବିଚାରପତିମାନଙ୍କୁ ସତର୍କ ରହିବାକୁ ଅନୁରୋଧ କରୁଛି। ଏହି ଆଇନ ପ୍ରଣୟନ ହେଲେ ଦେଶର ଭବିଷ୍ୟତ ବିପଦରେ ପଡ଼ିବ। ମୁଁ ସରକାରଙ୍କୁ ଏହି ବିଲ ପ୍ରତ୍ୟାହାର କରିବାକୁ ଅନୁରୋଧ କରୁଛି।
ପାର୍ଲାମେଣ୍ଟ ମୌସୁମୀ ଅଧିବେଶନର ଶେଷ ଦିନରେ ସ୍ବରାଷ୍ଟ୍ରମନ୍ତ୍ରୀ ଶାହା ଲୋକ ସଭାରେ ଭାରତୀୟ ନ୍ୟାୟ ସଂହିତା (ବିଏନ୍ଏସ୍) ବିଧେୟକ-୨୦୨୩, ଭାରତୀୟ ନାଗରିକ ସୁରକ୍ଷା ସଂହିତା (ବିଏନ୍ଏସ୍ଏସ୍) ବିଧେୟକ-୨୦୨୩ ଏବଂ ଭାରତୀୟ ସାକ୍ଷ୍ୟ (ବିଏସ୍) ବିଧେୟକ-୨୦୨୩ ଆଗତ କରିଛନ୍ତି। ଏହି ୩ ବିଲ୍ ଯଥାକ୍ରମେ ଉପନିବେଶ ଯୁଗୀୟ ଇଣ୍ଡିଆନ୍ ପେନାଲ କୋଡ୍ (ଆଇପିସି)୧୮୬୦, କ୍ରିମିନାଲ ପ୍ରସିଡ୍ୟୁର ଆକ୍ଟ (ସିଆର୍ପିସି)୧୮୯୮ ଏବଂ ଇଣ୍ଡିଆନ୍ ଏଭିଡେନ୍ସ ଆକ୍ଟ ୧୮୭୨ର ସ୍ଥାନ ନେବ ବୋଲି ସେ ଗୃହକୁ ସୂଚନା ଦେଇଛନ୍ତି।
