ନୂଆଦିଲ୍ଲୀ,୨୦।୧୨ : ସୁପ୍ରିମ୍କୋର୍ଟର ବରିଷ୍ଠ ଆଇନଜୀବୀ ପ୍ରଶାନ୍ତ ଭୂଷଣ କେନ୍ଦ୍ର ସରକାରଙ୍କ ବିରୋଧରେ ଗୁରୁତର ଅଭିଯୋଗ ଆଣିଛନ୍ତି। ସେ କହିଛନ୍ତି ସରକାର ବିଚାରପତିଙ୍କ ତ୍ରୁଟି ଖୋଜି ସେମାନଙ୍କୁ ବ୍ଲାକ୍ମେଲ କରିବା ଲାଗି ଯାଞ୍ଚ୍ ଏଜେନ୍ସିର ଅପବ୍ୟବହାର କରୁଛନ୍ତି। ଏଭଳି କରି ସରକାର ସମ୍ବିଧାନ ଦ୍ୱାରା ସ୍ବତନ୍ତ୍ରତା ପ୍ରାପ୍ତ ଅନୁଷ୍ଠାନକୁ ନିଜ ନିୟନ୍ତ୍ରଣକୁ ନେବାକୁ ଉଦ୍ୟମ କରୁଛନ୍ତି।
ଯଦି ସରକାରଙ୍କୁ ମନେ ହେଉଛି ଯେ କୌଣସି ବିଚାରପତି ସରକାରଙ୍କ ଅନୁସାରେ କାର୍ଯ୍ୟ କରିବେ ନାହିଁ ତେବେ ତାଙ୍କୁ ଶୀର୍ଷପଦବୀରେ ନିଯୁକ୍ତି ପ୍ରଦାନ କରାଯାଉ ନାହିଁ। ଅବସର ପରେ ଅନ୍ୟ ନିଯୁକ୍ତିର ଲୋଭ ଦେଖାଇ ସରକାର ନ୍ୟାୟିକ ପ୍ରକ୍ରିୟା ଫଇସଲାକୁ ପ୍ରଭାବିତ କରିବାର ପ୍ରୟାସ କରାଯାଉଛି। ଏବେ ସମସ୍ତ ବିଚାରପତିଙ୍କ ଫାଇଲ ପ୍ରସ୍ତୁତ କରିବାକୁ ଆୟକର, ଆଇବି,ଇଡି, ସିବିଆଇକୁ କୁହାଯାଉଛି।
ବିଚାରପତିଙ୍କ ସମସ୍ତ ସମ୍ପର୍କୀୟଙ୍କ ସମ୍ପର୍କରେ ତଥ୍ୟ ସଂଗ୍ରହ ପାଇଁ ନିର୍ଦ୍ଦେଶ ପ୍ରଦାନ କରାଯାଉଛି। ପୂର୍ବରୁ ବିଧେୟକ ପାରିତ ହେବା ପୂର୍ବରୁ ସଂସଦୀୟ କମିଟିରେ ଏହାର ଚର୍ଚ୍ଚା ହେଉଥିଲା। ମାତ୍ର ଏବେ ବିନା ଚର୍ଚ୍ଚାରେ ଏହାକୁ ପାରିତ କରାଯାଉଛି। ପୂର୍ବରୁ ନିର୍ବାଚନ ଆୟୋଗ ସ୍ବତନ୍ତ୍ର ଥିଲେ। ମାତ୍ର ଏବେ ସରକାର ନିର୍ବାଚନ ତାରିଖ ଘୋଷଣା କରୁଛନ୍ତି। ସରକାର ଦେଶକୁ ଏକ ଅନ୍ଧଗଳିକୁ ନେବାରେ ଲାଗିଥିବା ସେ ଅଭିଯୋଗ କରିଛନ୍ତି।
