ମୁମ୍ବାଇ: ୨୧ ଡିସେମ୍ବର ଅର୍ଥାତ୍ ଆଜି ହେଉଛି ସୁପରଷ୍ଟାର ଗୋବିନ୍ଦାଙ୍କ ୬୦ତମ ଜନ୍ମଦିନ। ୧୯୬୩ରେ ଜନ୍ମିତ ଗୋବିନ୍ଦା ଜୀବନରେ ଅନେକ ଉତ୍ଥାନ ପତ୍ତନ ଦେଇ ଗତି କରି ସଫଳତାର ଶୀର୍ଷରେ ପହଞ୍ଚିଛନ୍ତି। ସେ ୧୯୮୬ରେ ‘ଇଲଜାମ’ ଜରିଆରେ ତାଙ୍କ କ୍ୟାରିୟର୍ ଆରମ୍ଭ କରିଥିଲେ। ଏହା ପରେ ସେ ଅନେକ ହିଟ୍ ଏବଂ ସୁପରହିଟ୍ ଫିଲ୍ମରେ ଅଭିନୟ କରିଛନ୍ତି। ଆକ୍ସନଠାରୁ ଆରମ୍ଭ କରି କମେଡି ପର୍ଯ୍ୟନ୍ତ ଗୋବିନ୍ଦା ପ୍ରତ୍ୟେକ ପ୍ରକାରର ଫିଲ୍ମ କରିଛନ୍ତି।
ଗୋବିନ୍ଦାଙ୍କର ଏମିତି ଗୀତ ଅଛି, ଯାହା ବାଜିବା କ୍ଷଣି ନାଚିବା ପାଇଁ ପାଦ ଉଠିଯାଏ। ଏହି ଗୀତରେ ଆଜିକାଲି ଲୋକମାନେ ମଧ୍ୟ ରିଲ୍ସ କରୁଛନ୍ତି। ଏକ ସମୟ ଥିଲା ଯେତେବେଳେ ଗୋବିନ୍ଦାଙ୍କ କମେଡି ଫିଲ୍ମ ବକ୍ସ ଅଫିସରେ ସଫଳତାର ଗ୍ୟାରେଣ୍ଟି ଭାବରେ ପରିଗଣିତ ହେଉଥିଲା। ସେହି ସମୟରେ ତାଙ୍କ ଫିଲ୍ମର ଗୀତ ମଧ୍ୟ ବହୁତ ଲୋକପ୍ରିୟ ଥିଲା ଏବଂ ତାଙ୍କର ଡ୍ୟାନ୍ସ ଷ୍ଟେପ୍ ସମସ୍ତଙ୍କୁ ପାଗଳ କରିଦେଉଥିଲା। ‘ଦୁହ୍ଲେ ରାଜା’ର ଏକ ଗୀତ ‘ଆଖିୟୋଁ ସେ ଗୋଲି ମାରେ’ ସବୁଠୁ ହିଟ୍ ହୋଇଥିଲା। ଏଥିରେ ରବୀନା ଟଣ୍ଡନଙ୍କ ସହ ଗୋବିନ୍ଦା ଡ୍ୟାନ୍ସ କରିଥିଲେ। ଆଜି ବି ଏହି ଗୀତ ବାଜିଲେ ଦର୍ଶକେ ଝୁମି ଉଠନ୍ତି।
