ଢାକା, ୧୨।୬ : ମନି ଲଣ୍ଡରିଂକୁ ଆଇନଗତ କରିବାକୁ ବାଂଲାଦେଶ ସରକାରଙ୍କ ଯୋଜନାକୁ ନେଇ ଦେଶରେ ତୀବ୍ର ବିବାଦ ଦେଖାଦେଇଛି। କେବଳ ବିରୋଧୀ ନୁହନ୍ତି, ନାଗରିକ ସମାଜ ସଂଗଠନ ମଧ୍ୟ ଏହି ଯୋଜନାକୁ ସମାଲୋଚନା କରିଛନ୍ତି।
ଆସନ୍ତା ଆର୍ଥିକ ବର୍ଷ ପାଇଁ ବାଂଲାଦେଶରେ ସରକାରଙ୍କ ପକ୍ଷରୁ ଉପସ୍ଥାପିତ ହୋଇଥିବା ବଜେଟରେ ବେଆଇନ ଭାବେ ଦେଶକୁ ଆଣାଯାଇଥିବା ଟଙ୍କାକୁ ଆଇନଗତ କରିବାର ସୁଯୋଗ ଦେବାକୁ ଯୋଜନା ଘୋଷଣା କରିଛନ୍ତି। ସିଭିଲ ସୋସାଇଟି ସଂଗଠନ ଟ୍ରାନ୍ସପରେନ୍ସି ଇଣ୍ଟରନ୍ୟାଶନାଲ ବାଂଲାଦେଶ (ଟିଆଇବି) ଏହି ଯୋଜନାର ସମାଲୋଚନା କରିଛି।
ଏକ ବିବୃତ୍ତିରେ ଏହି ସଂଗଠନ କହିଛି ଯେ ଏହି ଯୋଜନା ଲୋକଙ୍କୁ ଦୁର୍ନୀତିରେ ଲିପ୍ତ ରହିବାକୁ ପ୍ରେରଣା ଯୋଗାଇବ। ଏହି ଯୋଜନା ଅସାମ୍ବିଧାନିକ ବୋଲି ସଂଗଠନ କହିଛି। ଏଥି ସହିତ ପ୍ରଧାନମନ୍ତ୍ରୀ ଶେଖ ହସିନା ୱାଜେଡଙ୍କ ଦୁର୍ନୀତି ପ୍ରତି ଶୂନ୍ୟ ସହନଶୀଳତା ଘୋଷଣାକୁ ମଧ୍ୟ ସମ୍ପୂର୍ଣ୍ଣ ବିରୋଧ କରାଯାଇଛି। ଏହି ଯୋଜନା ତୁରନ୍ତ ବାତିଲ କରିବାକୁ ଟ୍ରାନ୍ସପରେନ୍ସି ଇଣ୍ଟରନ୍ୟାଶନାଲ ସରକାରଙ୍କ ନିକଟରେ ଦାବି କରିଛି।
ସରକାରଙ୍କ ଦ୍ୱାରା ପ୍ରବର୍ତ୍ତିତ ଏହି ଯୋଜନା ଅନୁଯାୟୀ, ଯେଉଁମାନେ ମନି ଲଣ୍ଡରିଂ କରିଛନ୍ତି ସେମାନେ ସର୍ବାଧିକ ହାରରେ ଟିକସ ଦେଇ ସେମାନଙ୍କ ଟଙ୍କାକୁ ଆଇନଗତ କରିପାରିବେ। ଟିଆଇବିର କାର୍ଯ୍ୟନିର୍ବାହୀ ନିର୍ଦ୍ଦେଶକ ଇଫ୍ଟଖାରାମଜମାନ କହିଛନ୍ତି ଯେ ଏହି ଯୋଜନା ଅର୍ଥ ହେରଫେର ସହ ଜଡିତ ଲୋକଙ୍କୁ ଅନୈତିକ ସୁରକ୍ଷା ଯୋଗାଇବ।
ଅପରାଧ କରିବା ପରେ ଟ୍ୟାକ୍ସ ଦେବାର ସୁଯୋଗ ଦେବା ଅର୍ଥ ହେଉଛି ସରକାର ଅପରାଧକୁ ଉତ୍ସାହିତ କରୁଛନ୍ତି। ସେ କହିଛନ୍ତି ଏହି ପଦକ୍ଷେପ ଯୋଗୁ ଦେଶରେ ଦୁର୍ନୀତି ବଢ଼ିବ। ବିଶେଷଜ୍ଞ ଏହା ମଧ୍ୟ କହିଛନ୍ତି ଯେ ଦୁର୍ନୀତିରେ ଜଡ଼ିତ ଥିବା ଲୋକଙ୍କ ଉତ୍ତରଦାୟିତ୍ୱକୁ ସୁଧାରିବା ଆବଶ୍ୟକ, ଯେତେବେଳେ କି ଏହି ଯୋଜନା ସେମାନଙ୍କୁ ଟ୍ୟାକ୍ସ ଦେଇ ସେମାନଙ୍କ କାର୍ଯ୍ୟର ଦଣ୍ଡର ବଞ୍ଚାଇବାକୁ ସୁଯୋଗ ଦେଇଥାଏ। ଏହି ଯୋଜନା ଅନ୍ତର୍ଜାତୀୟ ପ୍ରକ୍ରିୟାକୁ ମଧ୍ୟ ଉଲ୍ଲଂଘନ କରିବ ବୋଲି ସମାଲୋଚକମାନେ ଦର୍ଶାଇଛନ୍ତି। କରୋନା ମହାମାରୀ ଏବଂ ୟୁକ୍ରେନ ଯୁଦ୍ଧରେ ଘଟିଥିବା ଭୟଙ୍କର ପରିସ୍ଥିତି ମଧ୍ୟରେ ଦେଶର ଅର୍ଥନୀତିକୁ ବଜାୟ ରଖିବା ପାଇଁ ଏହି ବିଶେଷ ରିହାତି ଘୋଷଣା କରିଛନ୍ତି ବୋଲି ସରକାର କହିଛନ୍ତି।
ଏହି ଯୋଜନାକୁ ବ୍ୟାପକ ସମାଲୋଚନା କରିବା ପରେ ଅର୍ଥମନ୍ତ୍ରୀ ଏଏଚଏମ ମୁସ୍ତାଫା କମଲ ସରକାରଙ୍କ ତରଫରୁ ସ୍ପଷ୍ଟୀକରଣ ଦେଇଛନ୍ତି। ଏକ ସାର୍ବଜନୀନ ବିବୃତ୍ତିରେ ସେ କହିଛନ୍ତି ଯେ ଏହି ଯୋଜନା ବାଂଲାଦେଶବାସୀଙ୍କୁ ସେମାନଙ୍କ ଟଙ୍କା ବାଂଲାଦେଶକୁ ଆଣିବାକୁ ଉତ୍ସାହିତ କରିବା ପାଇଁ ଲକ୍ଷ୍ୟ ରଖିଛି। ଏହି ଯୋଜନାରେ ବାଧା ସୃଷ୍ଟି କରିବା ଦ୍ୱାରା ଦେଶର କୌଣସି ଲାଭ ହେବ ନାହିଁ ବୋଲି ସେ କହିଛନ୍ତି। ସରକାରୀ କର୍ମଚାରୀମାନେ କହିଛନ୍ତି ଯେ ସମ୍ପ୍ରତି ବାଂଲାଦେଶ ବୈଦେଶିକ ମୁଦ୍ରା ଆବଶ୍ୟକ କରୁଛି। ଏଭଳି ପରିସ୍ଥିତିରେ, ଯଦି ବାଂଲାଦେଶୀମାନେ ବିଦେଶରେ ରଖାଯାଇଥିବା ଟଙ୍କା ଫେରସ୍ତ କରନ୍ତି, ତେବେ ଏହା ଦେଶକୁ ବହୁତ ସାହାଯ୍ୟ କରିବ।
ବାଂଲାଦେଶ ସରକାର ଦାବି କରିଛନ୍ତି ଯେ ପୃଥିବୀର ୧୭ ଟି ଦେଶ ଏଭଳି ଯୋଜନା ପ୍ରଣୟନ କରିସାରିଛନ୍ତି। ସେସବୁ ଦେଶ ମଧ୍ୟରେ ଆମେରିକା, ବ୍ରିଟେନ, ଫ୍ରାନ୍ସ, କାନାଡା, ନରୱେ, ଇଣ୍ଡୋନେସିଆ ଏବଂ ମାଲେସିଆ ଆଦି ରହିଛି।
କିନ୍ତୁ ଏହି ଯୋଜନା ସରକାରଙ୍କ ଅକ୍ଷମତାର ପ୍ରମାଣ ବୋଲି ସମାଲୋଚକମାନେ କହିଛନ୍ତି। ଆଇନଗତ ଉତ୍ସରୁ ଅର୍ଥନୀତିକୁ ପରିଚାଳନା କରିବାରେ ବିଫଳ ହେବା ପରେ, ସରକାର ବର୍ତ୍ତମାନ ଦୁର୍ନୀତିଗ୍ରସ୍ତ ଉତ୍ସରୁ ବୈଦେଶିକ ମୁଦ୍ରା ପାଇବାକୁ ଚେଷ୍ଟା କରୁଛନ୍ତି ବୋଲି ସେମାନେ ଅଭିଯୋଗ କରିଛନ୍ତି।
