ଭୁବନେଶ୍ୱର,୧୪।୩: କେନ୍ଦ୍ର ସରକାର ନୂଆ ସଡ଼କ ପରିବହନ ନିୟମ ସହ ପରିବେଶ ସୁରକ୍ଷା ଏବଂ ପୁରୁଣା ଗାଡ଼ି ପାଇଁ ସୃଷ୍ଟି ହେଉଥିବା ସମସ୍ୟାର ସମାଧାନ ପାଇଁ ନୂଆ ନିୟମ ଲାଗୁ କରିପାରନ୍ତି ବୋଲି ସୂଚନା ମିଳିଛି। ନୂଆ ନିୟମ ଅନୁସାରେ ସରକାରୀ ବିଭାଗଗୁଡିକରେ ବ୍ୟବହାର ହେଉଥିବା ପୁରୁଣା ଗାଡ଼ିଗୁଡିକ ୨୦୨୨ ଏପ୍ରିଲ ୧ ରୁ ୧୫ବର୍ଷରୁ ଉର୍ଦ୍ଧ୍ୱ ଗାଡ଼ିର ଆଉ ରେଜିଷ୍ଟ୍ରେଶନ ନବୀକରଣ କରାଯିବ ନାହିଁ। ଏ ନେଇ କେନ୍ଦ୍ର ସଡ଼କ ପରିବହନ ଓ ରାଜମାର୍ଗ ମନ୍ତ୍ରଣାଳୟ ପକ୍ଷରୁ ଏକ ପ୍ରସ୍ତାବ ସରକାରଙ୍କୁ ଦିଆଯାଇଥିବା ଜଣାପଡିଛି। ଯଦି ମନ୍ତ୍ରଣାଳୟର ଏହି ପ୍ରସ୍ତାବକୁ ସ୍ବୀକୃତି ମିଳିଯାଏ ତେବେ ସାରା ଦେଶରେ ବ୍ୟବହାର ହେଉଥିବା ସରକାରୀ ଗାଡିଗୁଡିକ ଲାଗି ଉକ୍ତ ବ୍ୟବସ୍ଥା ଲାଗୁ ହୋଇଯିବ ବୋଲି ଜଣାପଡିଛି। ମନ୍ତ୍ରଣାଳୟ ନିୟମରେ ସଂଶୋଧନ ପୂର୍ବକ ଅଧିସୂଚନା ଜାରିକରି ଅଂଶୀଦାରଙ୍କ ମତାମତ ଲୋଡ଼ିଛନ୍ତି। ଏ ସମ୍ପର୍କରେ ପ୍ରତିପକ୍ଷଙ୍କ ମତ, ମନ୍ତବ୍ୟ ମିଳିବା ପରେ ଚୂଡାନ୍ତ ନିଷ୍ପତ୍ତି ଘୋଷଣା ହେବ ବୋଲି ସୂଚନା ମିଳିଛି।
ପରିବହନ ମନ୍ତ୍ରଣାଳୟଙ୍କ ଅଧିସୂଚନା ଅନୁସାରେ ଯଦି ଉକ୍ତ ପ୍ରସ୍ତାବକୁ ମଞ୍ଜୁରୀ ମିଳିଯାଏ ତେବେ କେନ୍ଦ୍ର, ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ସରକାରଙ୍କ ସମେତ ସାର୍ବଜନିକ ଉପକ୍ରମ, ନଗର ନିଗମ, ସ୍ବାୟତ୍ତ ଶାସିତ ଅନୁଷ୍ଠାନଗୁଡିକରେ ସେବା ଯୋଗାଉଥିବା ୧୫ ବର୍ଷରୁ ଉର୍ଦ୍ଧ୍ୱ ପୁରୁଣା ଗାଡି ସବୁ ରାସ୍ତାରୁ ହଟିଯିବ। ଏ ନେଇ କେନ୍ଦ୍ର ସରକାରଙ୍କ ସଡ଼କ ପରିବହନ ଓ ରାଜମାର୍ଗ ମନ୍ତ୍ରଣାଳୟ ପକ୍ଷରୁ ଟୁଇଟର ପେଜ୍ରେ କୁହାଯାଇଛି, ୧ ଏପ୍ରିଲ ୨୦୨୨ ପରଠାରୁ ୧୫ ବର୍ଷରୁ ଅଧିକ କୌଣସି ଯାନର ଆଉ ପଞ୍ଜୀକରଣ ନବୀକରଣ ହେବ ନାହିଁ।
ଏହା ପୂର୍ବରୁ ଗତ ଫେବୃୟାରୀ ୧ତାରିଖରେ ସଂସଦରେ ଉପସ୍ଥାପିତ କେନ୍ଦ୍ର ବଜେଟରେ ସରକାର ବାହନ ସ୍କ୍ରାପ୍ ପଲିସି ଆଣିଛନ୍ତି। ଏଥିରେ ଘରୋଇ ଯାନର ୨୦ବର୍ଷ ପରେ ଓ କମର୍ସିଆଲ ଯାନ ୧୫ ବର୍ଷ ପୂରଣ କରିବା ପରେ ସେ ସବୁର ଫିଟ୍ନେସ୍ ଜରୁରୀ କରାଯାଇଛି। ବିଧେୟକର ଚିଠାପ୍ରସ୍ତାବ ଉପରେ ମନ୍ତ୍ରଣାଳୟ ମାର୍ଚ୍ଚ ୧୨ତାରିଖରେ ଅଧିସୂଚନା ଜାରି କରିଛନ୍ତି। ଏଥିରେ ଅଂଶୀଦାରଙ୍କଠାରୁ ୩୦ ଦିନ ମଧ୍ୟରେ ମତ, ମନ୍ତବ୍ୟ ଓ ପରାମର୍ଶ ମଗାଯାଇଛି।
