ବେଙ୍ଗାଲୁରୁ,୧୬।୮: କର୍ନାଟକ ସରକାର ଷ୍ଟେଟ ବ୍ୟାଙ୍କ ଅଫ ଇଣ୍ଡିଆ (ଏସବିଆଇ) ଏବଂ ପଞ୍ଜାବ ନ୍ୟାଶନାଲ ବ୍ୟାଙ୍କ (ପିଏନବି) ରେ କୌଣସି ସରକାରୀ ଟଙ୍କା ଜମା ନ କରିବାକୁ ନିଷ୍ପତ୍ତି ନେଇଛନ୍ତି। ଏହି ବ୍ୟାଙ୍କଗୁଡିକରେ ପରିଚାଳିତ ଆକାଉଣ୍ଟକୁ ବନ୍ଦ କରିବା ଏବଂ ଜମା ପ୍ରତ୍ୟାହାର କରିବାକୁ ରାଜ୍ୟ ଅର୍ଥ ବିଭାଗ ସମସ୍ତ ସରକାରୀ ବିଭାଗ, ଉଦ୍ୟୋଗ, ବୋର୍ଡ ଏବଂ ନିଗମକୁ ନିର୍ଦ୍ଦେଶ ଦେଇଛନ୍ତି।
ଏସବିଆଇ ଏବଂ ପିଏନବି କର୍ନାଟକର ବିଭିନ୍ନ ବୋର୍ଡ ଏବଂ ନିଗମର ସରକାରୀ ପାଣ୍ଠିର ଅପବ୍ୟବହାର କରିଥିବା ଅଭିଯୋଗ ହୋଇଛି। ସରକାରଙ୍କ କହିବାନୁସାରେ, ନଭେମ୍ବର ୨୦୧୨ରେ କର୍ନାଟକ ଇଣ୍ଡଷ୍ଟ୍ରିଆଲ ଏରିଆ ଡେଭଲପମେଣ୍ଟ ବୋର୍ଡ ପିଏନ୍ବିର ରାଜାଜୀ ନଗର ଶାଖାରେ ୨୫ କୋଟି ଟଙ୍କା ଜମା କରିଥିଲା। ଜମା ଅବଧି ଶେଷ ପରେ ବ୍ୟାଙ୍କ ମାତ୍ର ୧୩ କୋଟି ଟଙ୍କା ଫେରସ୍ତ କରିଛି। ୧୨ କୋଟି ଟଙ୍କା ଅପବ୍ୟବହାର କରାଯାଇଥିଲା। ସେହିଭଳି ୨୦୧୩ରେ କର୍ନାଟକ ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ ଷ୍ଟେଟ ବ୍ୟାଙ୍କ ଅଫ ମହୀଶୁରରେ ୧୦ କୋଟି ଟଙ୍କା ଜମା କରିଥିଲା। ଅଭିଯୋଗ ହୋଇଛି, ବ୍ୟାଙ୍କ ସମ୍ପୂର୍ଣ୍ଣ ପରିମାଣକୁ ଋଣରେ ଆଡଜଷ୍ଟ କରି ଜମା ଫେରସ୍ତ କରିବାକୁ ମନା କରିଦେଇଛି। ଉଭୟ ମାମଲା କୋର୍ଟରେ ବିଚାରାଧୀନ ଅଛି।
ସରକାରଙ୍କ ଅର୍ଥ ବିଭାଗ ଏ ସମ୍ପର୍କରେ ନିର୍ଦ୍ଦେଶ ଦେଇଛନ୍ତି। ନିର୍ଦ୍ଦେଶରେ କୁହାଯାଇଛି ଯେ, ସମସ୍ତ ବିଭାଗ ଏହି ବ୍ୟାଙ୍କଗୁଡିକରେ ପରିଚାଳିତ ଆକାଉଣ୍ଟକୁ ବନ୍ଦ କରି ଜମା ପ୍ରତ୍ୟାହାର କରିବା ଉଚିତ୍। କର୍ନାଟକର ଅର୍ଥ ବିଭାଗର ସଚିବଙ୍କ ଦ୍ୱାରା ଜାରି କରାଯାଇଥିବା ଆଦେଶରେ କୁହାଯାଇଛି ଯେ, ଏହି ବ୍ୟାଙ୍କଗୁଡିକରେ କୌଣସି ନୂତନ ଅର୍ଥ ବିନିଯୋଗ କରାଯିବା ଉଚିତ ନୁହେଁ। ଖାତା ବନ୍ଦ କରିବାକୁ ଏବଂ ସରକାରଙ୍କୁ ଜମା ପ୍ରତ୍ୟାହାରର ବିବରଣୀ ଦେବାକୁ ଅର୍ଥ ବିଭାଗ ସମସ୍ତ ବିଭାଗକୁ ନିର୍ଦ୍ଦେଶ ଦେଇଛି।
