ନୂଆଦିଲ୍ଲୀ,୨୮।୭: ଗଲ୍ଓ୍ବାନ ଘାଟିରେ ଚାଇନା ସେନା ଆକ୍ରମଣରେ ୨୦ ଭାରତୀୟ ଯବାନ ଶହୀଦ ହେବା ପରେ କେନ୍ଦ୍ର ସରକାର କଠୋର ଆଭିମୁଖ୍ୟ ଗ୍ରହଣ କରିଛନ୍ତି। ଚାଇନା ବିରୋଧରେ ଆର୍ଥତ୍କ କାର୍ଯ୍ୟାନୁଷ୍ଠାନ ଅନ୍ତର୍ଗତ ସେଠାରୁ ଆସୁଥିବା ଗୁଣବତ୍ତାହୀନ ପ୍ରଡକ୍ଟ ଉପରେ କଟକଣା ଲଗାଇବା ଲାଗି ନିଷ୍ପତ୍ତି ନେଇଛନ୍ତି। ଚାଇନା ସମେତ ଅନ୍ୟ ଦେଶଗୁଡିକରୁ ଭାରତକୁ ଆସୁଥିବା ଏଭଳି ସାମଗ୍ରୀଗୁଡିକର ଏକ ତାଲିକା ପ୍ରସ୍ତୁତ ହୋଇଛି। ଏଥିରେ ୩୭୧ ସାମଗ୍ରୀ ରହିଛି। ଏହାର ବିସ୍ତୃତ କ୍ୱାଲିଟି ପରୀକ୍ଷଣ ଉପରେ କେନ୍ଦ୍ର ସରକାର ଧ୍ୟାନ ଦେବେ। ନଜରରେ ରହିଥିବା ସାମଗ୍ରୀଗୁଡିକୁ ଇଣ୍ଡିଆନ ଷ୍ଟାଣ୍ଡାର୍ଡ ଅନ୍ତର୍ଭୁକ୍ତ କରାଯିବ। ନୂଆ ନିୟମକୁ ୨୦୨୧ ମାର୍ଚ୍ଚଠାରୁ ଲାଗୁ କରାଯିବ। ସାମଗ୍ରୀ ତାଲିକାରେ ଖେଳନା, ଷ୍ଟିଲ୍ ବାର୍, ଷ୍ଟିଲ୍ ଟ୍ୟୁବ, କଞ୍ଜ୍ୟୁମର ଇଲେକଟ୍ରୋନିକ୍ସ, ଟେଲିକମ ଯନ୍ତ୍ରାଂଶ, ହେଭି ମେଶିନାରି, ପେପର, ରବର ଆର୍ଟିକିଲ, ଗ୍ଲାସ୍ ମ୍ୟାଟେରିଆଲ ସାମିଲ ରହିଛି। ଭାରତ ଏଭଳି ବର୍ଗ ସମେତ ଅନ୍ୟ ସାମଗ୍ରୀଗୁଡିକୁ ଚାଇନାରୁ ବହୁଳ ମାତ୍ରାରେ ଆମଦାନୀ କରିଥାଏ। ନୂଆ ନିୟମ ଲାଗୁ ହେଲେ ସରକାର ଏହି ବର୍ଗରେ ଚାଇନାରୁ ଆସୁଥିବା ସାମଗ୍ରୀଗୁଡିକୁ ନିୟନ୍ତ୍ରଣ କରିବା ଦିଗରେ ସକ୍ଷମ ହେବେ। ଅପରପକ୍ଷରେ ଆତ୍ମନିର୍ଭର ଭାରତ ଯୋଜନାକୁ ଏହାଦ୍ୱାରା ଦୃଢ଼ କରାଯାଇପାରିବ। ଚାଇନା ସହ ଭାରତର ବାଣିଜ୍ୟ କ୍ଷତି ବୃହତ୍ ସ୍ତରରେ ରହିଛି। ଧୀରେ ଧୀରେ ଚାଇନା ରପ୍ତାନି କମାଇବା ଉପରେ ସରକାର ବର୍ତ୍ତମାନ ଫୋକସ କରୁଥିବା ଜଣାପଡିଛି।
