ନୂଆଦିଲ୍ଲୀ, ୨୯।୮: ଦେଶରେ କରୋନା ସଂକ୍ରମଣ ହାର ଗତ ୧୩ ଦିନ ମଧ୍ୟରେ କମିବାରେ ଲାଗିଛି। ଅଗଷ୍ଟ ୧୪ରୁ ୨୭ ମଧ୍ୟରେ ଦେଶରେ କରୋନା ସଂକ୍ରମଣ ହାର ୭.୮୭ ପ୍ରତିଶତ ରହିଛି। ଜୁଲାଇ ୧୫ରୁ ୨୮ ମଧ୍ୟରେ ସଂକ୍ରମଣ ହାର ୧୧.୨୩ ପ୍ରତିଶତ ଥିଲା। ଅଗଷ୍ଟ ୧ରୁ ୧୪ ମଧ୍ୟରେ ଏଥିରେ ହ୍ରାସ ଦେଖିବାକୁ ମିଳିଥିଲା। ଏହି ସମୟ ମଧ୍ୟରେ ସଂକ୍ରମଣ ହାର ୮.୮୪ ପ୍ରତିଶତରେ ପହଞ୍ଚିଥିଲା। ପ୍ରତି ୧୦୦ ଜଣେ ଲୋକଙ୍କୁ ପରୀକ୍ଷା କରାଯାଇ ଏଭଳି ଆକଳନ କରାଯାଇଥିବା ସ୍ବାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି। ତେବେ ମହାରାଷ୍ଟ୍ର, ଆନ୍ଧ୍ର ପ୍ରଦେଶ, କର୍ନାଟକ, ତାମିଲନାଡୁ ପଶ୍ଚିମବଙ୍ଗ, ଦିଲ୍ଲୀ ଏବଂ ଛତିଶଗଡ଼ ଆଦି ୭ ରାଜ୍ୟରେ ଏବେ ବି ସ୍ଥିତି ଅସମ୍ଭାଳ ରହିଛି। ସମଗ୍ର ଦେଶର କରୋନା ଆକ୍ରାନ୍ତଙ୍କ ସଂଖ୍ୟାରେ ମହାରାଷ୍ଟ୍ରର ୨୨ ପ୍ରତିଶତ ଲୋକ ରହିଛନ୍ତି। ଏଠାରେ ୧୪ରୁ ୨୭ ଅଗଷ୍ଟ ମଧ୍ୟରେ ସଂକ୍ରମଣ ହାର ୨୦ ପ୍ରତିଶତ ରହିଛି। ଅଗଷ୍ଟ ୧ରୁ ୧୪ ମଧ୍ୟରେ ଏଠାରେ ସଂକ୍ରମଣ ହାର କମି ୧୬.୫ ପ୍ରତିଶତ ଥିଲା। ମାତ୍ର ପରବର୍ତ୍ତୀ ସମୟରେ ପୁଣି ବଢ଼ିଥିଲା। ସେହିପରି ଦିଲ୍ଲୀରେ ସଂକ୍ରମଣ ହାର ପୁଣି ବଢୁଥିବାରୁ ଏହାକୁ ରେଡ୍ ଜୋନ୍ ଘୋଷଣା କରାଯିବାର ଆଶଙ୍କା ଦେଖାଦେଇଛି। ଅପରପକ୍ଷରେ ଛତିଶଗଡ଼ ନୂଆ କରୋନା ହଟସ୍ପଟ୍ ହେବାକୁ ଯାଉଥିବା କୁହାଯାଉଛି।
