ଭୁବନେଶ୍ୱର,୧୮।୩ (ବନ୍ଦନା ସେଠୀ): ୨୦୨୩-୨୪ ଆର୍ଥିକ ବର୍ଷର ରାଜସ୍ବ ଆଦାୟ ଲକ୍ଷ୍ୟ ପୂରଣ ନେଇ ଏବେ ବିଏମ୍ସି ଅଧିକାରୀ ଚିନ୍ତାରେ। ଆର୍ଥତ୍କ ବର୍ଷ ପୂରିବାକୁ ଆଉ ଅଳ୍ପଦିନ ଥିବାବେଳେ ଏବେସୁଦ୍ଧା ଧାର୍ଯ୍ୟ ଲକ୍ଷ୍ୟର ୫୦% ରାଜସ୍ବ ମଧ୍ୟ ଆଦାୟ ହୋଇପାରିନାହିଁ। ଗୋଟିଏ ପଟେ ଟ୍ୟାକ୍ସ କଲେକ୍ଟର ତଥା ୱାର୍ଡ ଅଫିସରଙ୍କୁ ଟାର୍ଗେଟ ପୂରଣ କରିବାକୁ ପରୱାନା ଜାରି କରାଯିବା ସହ ଦରମା ବନ୍ଦ ନେଇ ଚେତାବନୀ ଦିଆଯାଇଛି। ମାତ୍ର ସରକାରୀ କାମ ଓ ଚାପରୁ ଫୁର୍ସତ ମିଳୁ ନ ଥିବାରୁ ଟିକସ ଆଦାୟ ପ୍ରଭାବିତ ହୋଇଥିବା କୁହାଯାଉଛି। ଏବେ ଓ୍ବାର୍ଡ ଅଫିସର ଏବଂ ଜୋନାଲ୍ ଡେପୁଟି କମିଶନରଙ୍କୁ ନିର୍ବାଚନ ଲାଗି ପ୍ରସ୍ତୁତ କରାଯାଉଛି। ଏପରିସ୍ଥିତିରେ ନିର୍ବାଚନ ଆଚରଣବିଧି ଲାଗୁ ହୋଇଯାଇଥିବାରୁ ଏବେ ଆଉ ଟିକସଦାତାମାନଙ୍କୁ କୌଣସି ପ୍ରକାରର ବାଧ୍ୟ କରାଯାଇପାରିବ ନାହିଁ। କେବଳ ଯାହା ସଚେତନ କରାଯିବ ବୋଲି ସୂଚନା ମିଳିଛି। ତେଣୁ କଙ୍କଡ଼ାକୁ ଗୋଳିଆ ପାଣି ସୁହାଇଲା ଭଳି ଖିଲାପକାରୀଙ୍କୁ ନିର୍ବାଚନ ଆଳ ସୁହାଇବ ବୋଲି ଆଶଙ୍କା କରାଯାଉଛି। ଏପରିସ୍ଥିତିରେ ବିଏମ୍ସିର ରାଜସ୍ବ ଲକ୍ଷ୍ୟ ପୂରଣ ଆଶା କ୍ଷୀଣ ହେବାରେ ଲାଗିଛି।
ଗତ ୧୪ ତାରିଖରେ ବିଏମସି ୫୫ଜଣ ବଡ଼ ଖିଲାପକାରୀଙ୍କ ତାଲିକା ନିଜ ଓ୍ବେବ୍ସାଇଟ୍ରେ ପ୍ରକାଶ କରିଥିଲା। ଏମାନଙ୍କଠାରୁ ବିଏମସି ମୋଟ୍ ୨୯,୫୦,୪୧,୬୪୩.୫୧ କୋଟି ଟଙ୍କା ପାଇବ। ଓ୍ବେବ୍ସାଇଟ୍ରେ ତଥ୍ୟ ପ୍ରକାଶ କରିବା ପରେ ଖିଲାପକାରୀଙ୍କ ବିରୋଧରେ ବିଏମ୍ସି କଡ଼ା କାର୍ଯ୍ୟାନୁଷ୍ଠାନ ନେବ ବୋଲି ଆଶା ଦେଖାଦେଇଥିଲା। ମାତ୍ର ନିର୍ବାଚନ ଆଚରଣବିଧି ନାମରେ ଏବେ ଆଉ ସେଭଳି କିଛି ହେବାଭଳି ମନେ ହେଉ ନ ଥିବା କେତେଜଣ ଓ୍ବାର୍ଡଅଫିସର କହିଛନ୍ତି। ସେହିପରି ଯଦି ଏହି ତାଲିକା ଆଉ କିଛିଦିନ ଆଗରୁ ପ୍ରକାଶ ପାଇଥାନ୍ତା ତେବେ ହୁଏତ କିଛି ହୋଇପାରିଥାନ୍ତା ବୋଲି କୁହାଯାଇଛି।
ଅପରପକ୍ଷେ ଗତବର୍ଷ ଆର୍ଥତ୍କ ବର୍ଷରେ ବିଏମ୍ସି ମୋଟ୍ ୨୭୭ କୋଟି ଟଙ୍କାର ରାଜସ୍ବ ଆଦାୟ ଲକ୍ଷ୍ୟ ରଖିଥିଲା। ସେଥି ମଧ୍ୟରେ ୧୨୦ କୋଟି ହୋଲ୍ଡିଂ ଟିକସ ଥିବାବେଳେ ୧୫୦ କୋଟି ଅନ୍ୟାନ୍ୟ ଟିକସ ରହିଥିଲା। ପରେ ହୋଲ୍ଡିଂ ଟିକସ ଲକ୍ଷ୍ୟକୁ ୮୦କୋଟିକୁ ଖସାଇ ଦିଆଯାଇଥିଲା। ଏହାବାଦ୍ ଧାର୍ଯ୍ୟ ଲକ୍ଷ୍ୟ ପୂରଣ ପାଇଁ ମାର୍ଚ୍ଚ ୪ ବେଳକୁ ପ୍ରତିଓ୍ବାର୍ଡରେ ରାଜସ୍ବ ରଥ ବୁଲିବା ସହ ଜୋନ୍ ସ୍ତରରେ ସ୍ବତନ୍ତ୍ର କ୍ୟାମ୍ପ ଆୟୋଜନ କରାଯାଇଥିଲା। ଟିକସଦାତାମାନେ ସହଜରେ ଆସି ସେମାନଙ୍କ ଟିକସ ପଇଠ କରିପାରିବାର ବ୍ୟବସ୍ଥା ହୋଇଥିଲା। ଏଥିସହ ଓ୍ବାର୍ଡଅଫିସରମାନେ ଘରକୁ ଘର ବୁଲି କ୍ୟୁ-ଆର୍ କୋଡ୍ ସାହାଯ୍ୟରେ ଟିକସ ସଂଗ୍ରହ କରିବାକୁ ବିଏମ୍ସି କର୍ତ୍ତୃପକ୍ଷ ନିର୍ଦ୍ଦେଶ ଦେଇଥିଲେ। ଏପରିକି ପୂର୍ବବର୍ଷର ଖିଲାପକାରୀଙ୍କଠାରୁ ରାଜସ୍ବ ଆଦାୟ ପାଇଁ କିନ୍ନରମାନଙ୍କୁ ନିୟୋଜିତ କରାଯାଇଥିଲା। ତେବେ ଗତବର୍ଷଠାରୁ ଚଳିତ ବର୍ଷ ପ୍ରାୟ ଦୁଇଗୁଣ ଅର୍ଥାତ୍ ୧୫୫କୋଟି ଟଙ୍କାର ହୋଲ୍ଡିଂ ଟିକସ ଆଦାୟ ଲକ୍ଷ୍ୟ ରଖିଥିଲେ ମଧ୍ୟ ସେପରି କିଛି ହୋଇପାରିଲା ନାହିଁ। ପୁଣି ନିର୍ବଚନ ଆଚରଣବିଧି ଲାଗୁ ହୋଇ ଯାଇଥିବାରୁ କେବଳ ସଚେତନତା ଗାଡ଼ି ବୁଲାଇବା ବ୍ୟତୀତ ଆଉ କିଛି କରିବାର ବାଟ ମଧ୍ୟ ନାହିଁ। ତେଣୁ ରାଜସ୍ବ ଆଦାୟ କିପରି ହେବ ସେ ନେଇ ଚିନ୍ତା ବଢ଼ିଛି।
ସେହିଭଳି ବିଏମ୍ସି ଅଞ୍ଚଳରେ ଲାଗିଥିବା ହୋର୍ଡିଂରୁ ମଧ୍ୟ ପୂର୍ଣ୍ଣ ରାଜସ୍ବ ଆସିପାରୁ ନାହିଁ। ହୋର୍ଡିଂ ସର୍ଭେ କରିବାକୁ ଦାୟିତ୍ୱ ଦିଆଯାଇଥିବା ଘରୋଇ ସଂସ୍ଥାର ତ୍ରୁଟିପୂର୍ଣ୍ଣ ସର୍ଭେ ପାଇଁ ଠିକ୍ ଭାବେ ହୋର୍ଡିଂ ମାଲିକଙ୍କୁ ଚିହ୍ନଟ କରିବା ସମ୍ଭବ ହେଉନାହିଁ। ତେଣୁ ଅନ୍ଧାରରେ ବାଡି ବୁଲାଇବା ଭଳି ବିଏମ୍ସି ଅଧିକାରୀ ବିଜ୍ଞାପନ ସଂସ୍ଥାମାନଙ୍କୁ ଡିମାଣ୍ଡ ନୋଟିସ୍ ପଠାଉଛନ୍ତି। ଯିଏ ଟିକସ ପଇଠ କଲା ଭଲ କଥା ନଚେତ୍ କାର୍ଯ୍ୟାନୁଷ୍ଠାନ ମଧ୍ୟ ହୋଇପାରୁ ନାହିଁ।
ଜଣେ ଓ୍ବାର୍ଡ ଅଫିସରଙ୍କ ସୂଚନା ମୁତାବକ, ଗତବର୍ଷ ଅପେକ୍ଷା ଏଥର ରାଜସ୍ବ ଆଦାୟ ନୈରାଶ୍ୟଜନକ ହୋଇଛି। ବର୍ତ୍ତମାନ ସୁଦ୍ଧା ମାତ୍ର ୪୦ ପ୍ରତିଶତ ହୋଲ୍ଡିଂ ଟିକସ ଆଦାୟ ହୋଇଛି। ପ୍ରତିବର୍ଷ ମାର୍ଚ୍ଚ ୩୧ ବେଳକୁ ବଡ଼ବଡ଼ ସରକାରୀ ଅନୁଷ୍ଠାନ ଏବଂ ଘରୋଇ ଅନୁଷ୍ଠାନ ଟିକସ ପଇଠ କରନ୍ତି। ତେଣୁ ନିର୍ଦ୍ଧାରିତ ସମୟ ବେଳକୁ ୬୦ରୁ ୬୫% ଟିକସ ଆଦାୟ ହୋଇଯାଏ। ଚଳିତ ବର୍ଷ ମଧ୍ୟ ତାହା ହେବ। ଶେଷ ବେଳକୁ ହିଁ ଆଉ ୨୦/୨୫% ଟିକସ ଆଦାୟ ହୋଇଯିବ। ଏନେଇ ବିଏମ୍ସି ରାଜସ୍ବ ବିଭାଗ ଅଧିକାରୀ କହିଛନ୍ତି, ଖିଲାପକାରୀଙ୍କ ତାଲିକା ପ୍ରକାଶ ପାଇବା ପରେ ସେମାନଙ୍କ ମଧ୍ୟରୁ କିଛି ଟିକସ ପଇଠ କରିଛନ୍ତି। ହୋର୍ଡିଂରୁ ମଧ୍ୟ ଆଦାୟ ଜାରି ରହିଛି। ଗତବର୍ଷ ଭଳି ଏଥର ମଧ୍ୟ ରାଜସ୍ବ ଆଦାୟ ଭଲ ହେବ ବୋଲି ସେ ସୂଚନା ଦେଇଛନ୍ତି।
