ନୂଆଦିଲ୍ଲୀ,୧୫।୧୧:କ୍ରମାଗତ ଭାବେ ଘରୋଇ ବଜାରରେ ଉଭୟ ସୁନା ଓ ରୁପା ମୂଲ୍ୟରେ ପରିବର୍ତ୍ତନ ହେଉଛି। ଏପରିକି ଡଲାର ସୂଚକାଙ୍କରେ କ୍ରମାଗତ ବୃଦ୍ଧି ଏବଂ ଆମେରିକୀୟ ବଣ୍ଡ ଆୟ ସୁନା ଓ ରୁପା ଦରରେ ବଡ ଧରଣର ହ୍ରାସ ଘଟାଉଛି। ଫଳରେ ଅନ୍ତଃରାଷ୍ଟ୍ରୀୟ ବଜାରରେ ମଧ୍ୟ ସୁନା ଓ ରୁପା ଦରରେ ସୁଧାର ଦେଖିବାକୁ ମିଳିଛି। ଅପରପକ୍ଷରେ ଡୋନାଲ୍ଡ ଟ୍ରମ୍ପ ଆମେରିକା ରାଷ୍ଟ୍ରପତି ନିର୍ବାଚନରେ ଜିତିବା ଯୋଗୁ ସୁନା ଦରରେ ବଡ଼ ପରିବର୍ତ୍ତନ ହୋଇଚାଲିଛି ବୋଲି ବଜାର ବିଶେଷଜ୍ଞମାନେ ଆକଳନକରି ବିସ୍ତୃତ ଭାବେ ମତପ୍ରକାଶ କରିଛନ୍ତି। ସେହିଭଳି ଗୁରୁବାର ମଲ୍ଟି କମୋଡିଟି ଏକ୍ସଚେଞ୍ଜ (ଏମ୍ସିଏକ୍ସ)ରେ ମଧ୍ୟ ସୁନା ମୂଲ୍ୟ ହ୍ରାସ ପାଇଛି। ଏପରିକି ଏମ୍ସିଏକ୍ସରେ ଡିସେମ୍ବର ଡେଲିଭରି ପାଇଁ ସୁନା ଦର ୧୦ ଗ୍ରାମ ପିଛା ୬୧୫ ଟଙ୍କା ହ୍ରାସ ପାଇ ୭୨,୮୬୭ ଟଙ୍କାକୁ ଖସି ଆସିଥିଲାବେଳେ ରୁପା କିଲୋଗ୍ରାମ ଉପରେ ୧୧୬୫ ଟଙ୍କା କମି ୮୮୦୩୨ ଟଙ୍କାରେ ପହଞ୍ଚତ୍ଛି। ଗତ ୧ ସପ୍ତାହ ମଧ୍ୟରେ ସୁନା ୧୦ ଗ୍ରାମ ଉପରେ ୩୪୦୦ ଟଙ୍କା ଏବଂ ରୁପା କେଜି ପିଛା ୩୨୦୦ ଟଙ୍କା ହ୍ରାସ ପାଇଛି। ସେହିପରି କୋମେକ୍ସରେ ମଧ୍ୟ ସୁନା ଦର ୨୫୬୭ ଡଲାରକୁ ଖସି ଆସିଛି। ଏପରିକି ପ୍ୟୁଚର ବଜାରରେ ବି ସୁନା ଦର କମିଥିବାବେଳେ ସ୍ପଟ୍ ବଜାରରେ ସୁନା ଦର ହ୍ରାସ ପାଇ ୨୨ କ୍ୟାରେଟ ସୁନା ୧୦ ଗ୍ରାମ ପିଛା ୭୩,୬୪୮ ଟଙ୍କାରେ ରହିଛି।
ଅପରପକ୍ଷରେ ଅନ୍ତଃରାଷ୍ଟ୍ରୀୟ ବଜାର ମୂଲ୍ୟ ହ୍ରାସର ପ୍ରଭାବ ଘରୋଇ ବଜାରରେ ପଡିଛି। ଗୁରୁବାର ନୂଆଦିଲ୍ଲୀରେ ୨୪ କ୍ୟାରେଟ ସୁନା ଦର ୧୦ ଗ୍ରାମ ପିଛା ୭୭,୦୧୩ ଟଙ୍କା ଥିଲାବେଳେ ରୁପା କେଜି ପିଛା ୯୪,୦୦୦ ଟଙ୍କାରେ କାରବାର ହେଉଛି। ଏପରିକି ଚେନ୍ନାଇ, ମୁମ୍ବାଇ ଓ କୋଲକାତା ଭଳି ମହାନଗରରେ ୨୪ କ୍ୟାରେଟ ସୁନା ଦର ୧୦ ଗ୍ରାମ ପିଛା ୭୬,୮୬୧ ଟଙ୍କା, ୭୬୮୬୭ ଟଙ୍କା ଏବଂ ୭୬ ୮୬୫ ଟଙ୍କା ହୋଇଥିଲାବେଳେ ଉପରୋକ୍ତ ମହାନଗରରେ ରୁପା କେଜି ପିଛା ୧,୦୩,୮୦୦ ଟଙ୍କା , ୯୩,୩୦୦ ଟଙ୍କା ଏବଂ ୯୪,୮୦୦ ଟଙ୍କାରେ କାରବାର ହେଉଛି।
