କଲିଙ୍ଗନଗର,୧ା୧୨(ଶୁଭାଶିଷ ରାଉତ):ଦେବପ୍ରଭା ପ୍ରଡକ୍ସନ ଦ୍ୱାରା ପ୍ରସ୍ତୁତ ପ୍ରଥମ ଫିଚର୍ ଫିଲ୍ମ ‘ନନ୍ଦ ମାଷ୍ଟରଙ୍କ ଚାଟଶାଳୀ’ ଅନ୍ତର୍ଜାତୀୟ ଗୋଆ ଫିଲ୍ମ ଫେଷ୍ଟିଭାଲ ଫିଲ୍ମ ବଜାରରେ ସଫଳତା ସାଉଣ୍ଟିଛି। ପ୍ରାୟ ୫୦ ଦେଶରୁ ଆସିଥିବା ଜୁରି ମେମ୍ବର, ଡିଷ୍ଟ୍ରିବ୍ୟୁଟର, ପ୍ରଡ୍ୟୁସର ଏବଂ ନିର୍ଦ୍ଦେଶକମାନଙ୍କ ଗହଣରେ ଓଡ଼ିଶାର ଏକମାତ୍ର ଫିଚର୍ ଫିଲ୍ମ ଭାବେ ଏହି ଫିଲ୍ମର ପ୍ରିମିୟର ଶୋ’ କରାଯାଇଥିଲା। ସେମାନେ ଫିଲ୍ମଟିକୁ ଦେଖି ଉଚ୍ଚ ପ୍ରଶଂସା କରିଥିଲେ।
ଜଣେ ୧୦୪ ବର୍ଷୀୟ ବୃଦ୍ଧ ନନ୍ଦକିଶୋର ପୃଷ୍ଟି ନିଜର ଚାଟଶାଳୀ ମାଧ୍ୟମରେ କିପରି ୭୦ ବର୍ଷରୁ ଅଧିକ ସମୟ ଧରି ଛାତ୍ରୀଛାତ୍ରଙ୍କୁ ମାଗଣାରେ ଶିକ୍ଷାଦାନ କରିଛନ୍ତି, ତାଙ୍କରି ଜୀବନୀକୁ ନେଇ ଏହି ଫିଲ୍ମ ନିର୍ମାଣ କରାଯାଇଛି। ଏହି ଶିକ୍ଷାଦାନ ନିମନ୍ତେ ତାଙ୍କୁ ପଦ୍ମଶ୍ରୀ ପୁରସ୍କାର ମଧ୍ୟ ମିଳିଛି। ଫିଲ୍ମକୁ ସାମ୍ବାଦିକ ଅଭୟ ପତି ପ୍ରଯୋଜନା କରିଥିବାବେଳେ ଅନ୍ତର୍ଜାତୀୟସ୍ତରର ନିର୍ଦ୍ଦେଶକ ପ୍ରଣବ ଆଇଚ ନିର୍ଦ୍ଦେଶନାର ଭାର ସମ୍ଭାଳିଛନ୍ତି। ଅଭିନେତ୍ରୀ ନୈନା ଦାଶ ଏହାର ସହ ପ୍ରଯୋଜକ ଥିବାବେଳେ ଅସ୍ମିତା ପତି କାହାଣୀ ସଂଯୋଜନା କରିଛନ୍ତି। ଓଡ଼ିଶାର ଏକମାତ୍ର ଫିଲ୍ମ ଭାବେ ନ୍ୟାଶନାଲ ଫିଲ୍ମ ଲାଇବ୍ରେରି ଭିୟୁ ରୁମରେ ଏହା ସ୍ଥାନ ପାଇଛି। ଫିଲ୍ମ ପ୍ରିମିୟର ଶୋ’କୁ ଜମ ାର୍ନୀର ଲୀନା ଭୁର୍ମା, ଫିନଲାଣ୍ଡର ଲିକ୍କା ଭେକଲତ୍ତି, ବିନୟ ଉମାପତି, ଓଡ଼ିଶାର ହିମାଂଶୁ ଖଟୁଆ ଓ ଜିତେନ୍ଦ୍ର ମିଶ୍ର ପ୍ରମୁଖ ଦେଖିବା ସହ ଏହାର ଉଚ୍ଚ ପ୍ରଶଂସା କରିଥିଲେ। ଡିସେମ୍ବରରେ କଲିକତାରେ ହେବାକୁ ଥିବା ଇଣ୍ଟରନ୍ୟାଶନାଲ ଫିଲ୍ମ ଫେଷ୍ଟିଭାଲ ଆୱାର୍ଡ ସେରିମନିରେ ଏହାକୁ ଅଫିସିଆଲ ପ୍ରଦର୍ଶନ କରାଯିବ ବୋଲି ସୂଚନା ମିଳିଛି। ପ୍ରଥମଥର ପାଇଁ ଓଡ଼ିଶାରେ ଶିକ୍ଷା ଉପରେ ହୋଇଥିବା ଫିଲ୍ମ ଅନ୍ତର୍ଜାତୀୟସ୍ତରର ଏପରି ସଫଳତା ପାଇଥିବାରୁ ସବୁ ମହଲରେ ଏହାକୁ ଶୁଭେଚ୍ଛା ଜ୍ଞାପନ କରାଯାଇଛି।
