ଲଣ୍ଡନ,୨୭ା୧୧: ମାଲିକ ହେବ ତ ଏମିତି। ନିଜ କମ୍ପାନୀର ଲାଭ ସହିତ କମର୍ଚାରୀଙ୍କ ଲାଭ କଥା ଯିଏ ଭାବନ୍ତି। ଆଉ କମ୍ପାନୀର ଶେୟାର ବି ଦିଅନ୍ତି କର୍ମଚାରୀଙ୍କୁ। ଫଳରେ ସମସ୍ତ କର୍ମଚାରୀ ଏବେ କୋଟିପତି ହୋଇଯାଇଛନ୍ତି। ଆଶ୍ଚର୍ଯ୍ୟ ଲାଗୁଥିଲେ ମଧ୍ୟ ସତ। ବ୍ରିଟେନର ଜଣେ ବ୍ୟବସାୟୀଙ୍କ କ୍ଷେତ୍ରରେ ଏପରି ଦେଖିବାକୁ ମିଳିଛି। ବ୍ୟବସାୟୀ ଜଣକ ଯେତେବେଳେ କର୍ମଚାରୀଙ୍କ ମଧ୍ୟରେ ଶେୟାର ବାଣ୍ଟି ଦେଲେ ସେତେବେଳେ କମ୍ପାନୀର ବହୁତ ଲାଭ ହେଲା। ଏହି କମ୍ପାନୀର ନାମ ‘ଦ ହଟ୍ ଗ୍ରୁପ୍’। ଏହାର ମାଲିକ ହେଉଛନ୍ତି ମ୍ୟାଥ୍ୟୁ ମୋଲ୍ଡିଂ। ମ୍ୟାଥ୍ୟୁ ନିଜ କମ୍ପାନୀର ଲାଭରୁ ୮୩୦ ପାଉଣ୍ଡ ଅର୍ଥାତ୍ ୮୧୮୩ କୋଟି ଟଙ୍କା କର୍ମଚାରୀଙ୍କ ମଧ୍ୟରେ ବାଣ୍ଟି ଦେଇଛନ୍ତି। ସେ ଏକ buy back scheme ଚଲାଉଛନ୍ତି। ଏହା ସମସ୍ତ କର୍ମଚାରୀଙ୍କ ପାଇଁ ମୁକ୍ତ ସ୍କିମ୍।
ଏହି ସ୍କିମ୍ର ଫାଇଦା କର୍ମଚାରୀଙ୍କୁ ମିଳିଛି। ଯାହା କେବେ ଭାବି ନ ଥିଲେ। କର୍ମଚାରୀଙ୍କୁ ତାଙ୍କର ମ୍ୟାନେଜର ଚୟନ କରିଛନ୍ତି। ଯାହାର ତାଲିକା ମ୍ୟାଥ୍ୟୁଙ୍କ ନିକଟକୁ ଯାଇଥିଲା। କମ୍ପାନୀର ଡ୍ରାଇଭରଙ୍କଠାରୁ ଆରମ୍ଭ କରି ବ୍ୟକ୍ତିଗତ ସଚିବ ପର୍ଯ୍ୟନ୍ତ ସମସ୍ତଙ୍କୁ ଶେୟାର ଦିଆଯାଇଛି। ମ୍ୟାଥ୍ୟୁଙ୍କ ବ୍ୟକ୍ତିଗତ ସଚିବ କହିଛନ୍ତି ଏତେ ପଇସା ମିଳିଛି ଯେ, ସେ ୩୬ ବର୍ଷରେ ଅବସର ନେଇ ପାରିବେ।
ଏକ ସାକ୍ଷାତକାରରେ ମ୍ୟାଥ୍ୟୁ କହିଛନ୍ତି, ମୁଁ ଚାହୁଁଥିଲି କମ୍ପାନୀର ଲାଭକୁ କର୍ମଚାରୀଙ୍କ ମଧ୍ୟରେ ବାଣ୍ଟିବି ବୋଲି। ତେଣୁ ଏମିତି ସ୍କିମ୍ରେ ରଖିଦେଲି। ସମସ୍ତଙ୍କୁ ବହୁତ ପଇସା ମିଳିଛି। ସେ କହିଛନ୍ତି, କିଛି ଲୋକ ଏହାକୁ ବିରୋଧ କରିଥିଲେ। ମାତ୍ର ମୋର ପୂର୍ଣ୍ଣ ଭରସା ଏହି ଶେୟାର ଆହୁରି ଉପରକୁ ଯିବ।
ମ୍ୟାଥ୍ୟୁ ୨୦୦୪ରେ ଜନ୍ ଗ୍ଲାମରଙ୍କ ସହ ‘ଦ ହଟ୍ ଗ୍ରୁପ୍’ ଆରମ୍ଭ କରିଥିଲେ। ୪୮ ବର୍ଷୀୟ ମାଥ୍ୟୁ ଗତ ୧୬ ବର୍ଷ ମଧ୍ୟରେ ଲଗାତର ବହୁତ ଅର୍ଥ ରୋଜଗାର କରିଛନ୍ତି। ତାଙ୍କ ବ୍ୟବସାୟ ଖୁବ୍ ଭଲ ଚାଲିଛି। ‘ଦ ହଟ୍ ଗ୍ରୁପ୍’ ୧୬୪ ଦେଶରେ କାମ କରୁଛି। ଚଳିତବର୍ଷ ସେପ୍ଟେମ୍ବରରେ ମ୍ୟାଥ୍ୟୁଙ୍କୁ ଫୋବର୍ସ କମ୍ପାନୀ ପ୍ରଥମ ଥର ପାଇଁ ବିଲିନେୟାର ତାଲିକାରେ ସ୍ଥାନିତ କରିଛି। କମ୍ପାନୀର ପ୍ରାୟ ୨୦୦ କର୍ମଚାରୀ ଶେୟାର ସ୍କିମ୍ରୁ ସିଧାସଳଖ ଉପକୃତ ହୋଇଛନ୍ତି। ସମସ୍ତେ କୋଟିପତି ହୋଇଯାଇଛନ୍ତି।
