କୁଆଁରମୁଣ୍ଡା,୧୪।୨(ମହେନ୍ଦ୍ର କୁମାର ସାହୁ): ସୁନ୍ଦରଗଡ଼ ଜିଲା କୁଆଁରମୁଣ୍ଡା ଫାଣ୍ଡି ଅଞ୍ଚଳର ଜଣେ ୧୯ ବର୍ଷୀୟା ଯୁବତୀଙ୍କୁ ବଳାତ୍କାର କରି ୬ ମାସର ଗର୍ଭବତୀ କରିବା ଘଟଣାରେ ଗୁରୁବାର ବୀରମିତ୍ରପୁର ପୋଲିସ ଜଣଙ୍କୁ ଗିରଫ କରିଛି। ଗିରଫ ଅଭିଯୁକ୍ତ ହେଲେ ବିହାର ଭାଗଲପୁର ଅଞ୍ଚଳର ସତ୍ୟ ପ୍ରକାଶ ସିଂ(୩୪)। ଶନିବାର ତାଙ୍କୁ କୋର୍ଟ ଚାଲାଣ କରାଯିବ ବୋଲି ଆଇଆଇସି ରାମ ପ୍ରସାଦ ନାଗ ସୂଚନା ଦେଇଛନ୍ତି। ଥାନାରେ ଲିଖିତ ଅଭିଯୋଗ ପରେ ଗୁରୁବାର ବିଳମ୍ବିତ ରାତିରେ ଏକ ବଳାତ୍କାର ମାମଲା( ନଂ. ୫୬/୨୬) ରୁଜୁ ହୋଇଛି।
ସୂଚନା ଅନୁଯାୟୀ, ଯୁବତୀ ଜଣକ କାମ କରିବାକୁ ସମ୍ବଲପୁର ଜିଲା କୁଚିଣ୍ଡା ଯାଇଥିଲେ। ସେଠାରେ କାମ କରିବା ସମୟରେ ଅଭିଯୁକ୍ତ ସିଂ ତାଙ୍କ ସହ ଶାରୀରିକ ସମ୍ପର୍କ ରଖିଥିଲେ। ଘଟଣା ସମ୍ପର୍କରେ କାହାକୁ ଜଣାଇଲେ ଜୀବନରୁ ମାରିଦେବାକୁ ଧମକ ଦେଇଥିବା ପୀଡ଼ିତା ଜଣକ ତାଙ୍କ ଏତଲାରେ ଉଲ୍ଲେଖ କରିଛନ୍ତି। ଯୁବତୀ ଜଣକ ଏବେ ୬ ମାସର ଗର୍ଭବତୀ । ଏହି ଘଟଣା ଯୁବତୀଙ୍କ ପରିବାର ଲୋକେ ଜାଣିବା ପରେ ବୀରମିତ୍ରପୁର ଥାନାରେ ଲିଖିତ ଅଭିଯୋଗ କରିଥିଲେ। ଅଭିଯୁକ୍ତ ସିଂଙ୍କର ଶୁକ୍ରବାର ପୋଲିସ ଡାକ୍ତରୀ ମାଇନା କରିଛି। ଏହାସହ ଏହି ବଳାତ୍କାର ଘଟଣାରେ ପୋଲିସ ପୀଡ଼ିତାଙ୍କ ସମ୍ପର୍କୀୟ କୁଚିଣ୍ଡା ଅଞ୍ଚଳର ଜନୈକା ଯୁବତୀଙ୍କୁ ଥାନାରେ ଅଟକ ରଖି ପଚରାଉଚରା ଜାରି ରଖିଛି।
