ଭୁବନେଶ୍ୱର,୨୪।୧ (ରବିନାରାୟଣ ଜେନା): କେନ୍ଦ୍ର ସରକାରଙ୍କ ପକ୍ଷରୁ ଜନଗଣନା ନେଇ ନିର୍ଦ୍ଦେଶନାମା ଜାରି ହେବା ପରେ ଏବେ ରାଜ୍ୟ ସରକାରଙ୍କ ପକ୍ଷରୁ ଘର ଗଣନା ପାଇଁ ପ୍ରସ୍ତୁତି ଜୋରଦାର ଆରମ୍ଭ ହୋଇଛି। ଏହାପୂର୍ବରୁ ଗୁରୁବାର ସ୍ବରାଷ୍ଟ୍ର ମନ୍ତ୍ରଣାଳୟ ପକ୍ଷରୁ ଏକ ବିଜ୍ଞପ୍ତି ଜାରି ହୋଇଛି। ଯେଉଁଥିରେ ଜନଗଣନା ଅଧିକାରୀମାନେ ପ୍ରତ୍ୟେକ ଘରେ ପହଞ୍ଚିଲେ ସେଠାରେ ଘର ମାଲିକ ତଥା ବ୍ୟକ୍ତିବିଶେଷଙ୍କୁ ୩୩ଟି ପ୍ରଶ୍ନ ପଚାରିବାକୁ ବାଧ୍ୟ ହେବେ ବୋଲି ବିଜ୍ଞପ୍ତିରେ ମନ୍ତ୍ରଣାଳୟ ପକ୍ଷରୁ ଦର୍ଶାଯାଇଛି।
ଗୁରୁବାର ଜନଗଣନା କମିଶନରଙ୍କ ପକ୍ଷରୁ ରେଜିଷ୍ଟ୍ରାର ଜେନେରାଲ ମୃତ୍ୟୁଞ୍ଜୟ କୁମାର ନାରାୟଣ ଜାରି କରିଥିବା ବିଜ୍ଞପ୍ତିରେ ଦର୍ଶାଇଛନ୍ତି ଯେ, ୨୦୨୭ ଜନଗଣନାକୁ ଦୃଷ୍ଟିରେ ରଖି ସମସ୍ତ ଜନଗଣନା ଅଧିକାରୀ ମନ୍ତ୍ରଣାଳୟର ଏହି ନିର୍ଦ୍ଦେଶକୁ ଠିକଣା ଭାବେ ଅନୁପାଳନ କରିବାକୁ ବାଧ୍ୟ। ତେବେ ଦୀର୍ଘ ୧୫ବର୍ଷ ପରେ ଜନଗଣନା ପ୍ରକ୍ରିୟା ଆରମ୍ଭ ହେବାକୁ ଯାଉଥିବାରୁ ଏହାକୁ ନେଇ ବିଭିନ୍ନ ମହଲରେ ଲୋକେ ଉତ୍ସୁକତାର ସହ ଅପେକ୍ଷା କରିଛନ୍ତି। ଜନଗଣନା ଅଧିକାରୀମାନେ ଘରକୁ ଆସିଲେ କେଉଁସବୁ ୩୩ଟି ପ୍ରଶ୍ନ ପଚାରିବେ ସେଥିପାଇଁ ଆମକୁ କିଭଳି ପ୍ରସ୍ତୁତ ରହିବାକୁ ହେବ ତାହା ଉପରେ ବିଜ୍ଞପ୍ତିରେ ସ୍ପଷ୍ଟ କରାଯାଇଛି।
ସୂଚନାଯୋଗ୍ୟ, ଏପ୍ରିଲ ୧୬ରୁ ରାଜ୍ୟରେ ଘର ଗଣନା ହେବାକୁ ରହିଛି। ଏଥିପାଇଁ ପ୍ରଥମ ପର୍ଯ୍ୟାୟରେ ଘର ଏବଂ ଆସବାବ ପତ୍ର ଗଣନା କରାଯିବ। ଏହି ସମୟରେ ଜନଗଣନା ଅଧିକାରୀମାନେ ଘରର କ୍ରମିକ ସଂଖ୍ୟା(ସହରାଞ୍ଚଳ କିମ୍ବା ଗ୍ରାମାଞ୍ଚଳ କର୍ତ୍ତୃପକ୍ଷଙ୍କ ଦ୍ୱାରା ପ୍ରଦତ୍ତ), ଜନଗଣନା ଅନୁଯାୟୀ ଘର ନମ୍ବର, ଘରର ଚଟାଣ କେଉଁ ପ୍ରକାରର, କାନ୍ଥ କେଉଁ ସାମଗ୍ରୀରେ ପ୍ରସ୍ତୁତ, ବ୍ୟବହାର ଯୋଗ୍ୟ କି ନାହିଁ, ଘରର ସ୍ଥିତି ଏବେ କିପରି ରହିଛି, କେତେଜଣ ସଦସ୍ୟ ପରିବାରରେ ଅଛନ୍ତି, ବାସ୍ତବରେ କେତେ ସଦସ୍ୟ ଘରେ ରହୁଛନ୍ତି, ଘରର ମୁଖିଆ କିଏ ବୋଲି ପ୍ରଶ୍ନ ରହିଛି।
ଏହାସହିତ ଘରର ମୁଖିଆଙ୍କ ଲିଙ୍ଗ କ’ଣ, କେଉଁ ଜାତିର, ଅନୁସୂଚିତ ଜାତି କିମ୍ବା ଜନଜାତି କିମ୍ବା ଅନ୍ୟାନ୍ୟ?, ଜନଗଣନା ଘରର ମାଲିକାନା କାହାର?, ଘରେ କେତୋଟି ରୁମ୍ ବ୍ୟବହାର କରୁଛନ୍ତି, ପରିବାରରେ କେତେ ଜ’ଣ ବିବାହିତ ଦମ୍ପତି ଅଛନ୍ତି। ପିଇବା ପାଣିର ମୂଳ ଉତ୍ସ କ’ଣ? ଆବଶ୍ୟକ ପରିମାଣର ପାଣି ମହଜୁଦ ରହିଛି କିମ୍ବା ନାହିଁ?, ବିଦ୍ୟୁତ୍ର ମୂଳ ଉତ୍ସ କ’ଣ? ଶୌଚାଳୟ ରହିଛି କି ନାହିଁ, ଯଦି ଅଛି ତାହା କେଉଁ ସ୍ଥିତିରେ ଅଛି? ବର୍ଜ୍ୟ ଜଳ ନିଷ୍କାସନ ପାଇଁ ସୁବିଧା ଅଛିି କି ନାହିଁ? ଶୌଚାଳୟରେ ଗାଧୋଇବା ଘର ଅଛି କି ନାହିଁ? ରୋଶେଇଶାଳ ଘରେ ଅଛି କି ନାହିଁ, ସେଠାକୁ ଏଲ୍ପିଜି/ ପିଏନ୍ଜି ସଂଯୋଗ ଅଛି କି ନାହିଁ? ଜାଳେଣି ଉତ୍ସ କ’ଣ? ଘରେ ରେଡିଓ, ଟିଭି, ଇଣ୍ଟରନେଟ, ଲାପ୍ଟପ୍, ଟେଲିଫୋନ୍, ମୋବାଇଲ, କମ୍ପ୍ୟୁଟର ଅଛି କି ନାହିଁ? ସାଇକେଲ, ସ୍କୁଟର, ମୋଟରସାଇକେଲ ଓ ମୋପେଡ ଅଛି କି ନାହିଁ? କାର, ଜିପ୍, ଭ୍ୟାନ ଅଛି କି ନାହିଁ? ସେହିପରି ଆପଣ କେଉଁ ମୁଖ୍ୟ ଶସ୍ୟ ଖାଉଛନ୍ତି ଅର୍ଥାତ ଭାତ, ରୁଟି ନା ଅନ୍ୟ କିଛି। ଏହା ସହ ମୋବାଇଲ ନମ୍ବର ମଧ୍ୟ ଦେବାକୁ ହେବ ବୋଲି ବିଜ୍ଞପ୍ତିିରେ କୁହାଯାଇଛି। ତେବେ ଏପ୍ରିଲ ୧୬ରୁ ଗୃହ ଗଣନା ଆରମ୍ଭ କରାଯିବ ଏବଂ ଏହି କାର୍ଯ୍ୟ ୩୦ଦିନ ଅର୍ଥାତ ଏପ୍ରିଲ ୧୬ରୁ ମେ’ ୧୫ ମଧ୍ୟରେ ଶେଷ ହେବ ବୋଲି ସରକାରୀ ନିର୍ଦ୍ଦେଶନାମା ରହିଛି।