ନୂଆଦିଲ୍ଲୀ,୨୪।୧୦: ଚଳିତ ଆର୍ଥତ୍କ ବର୍ଷରେ ଜିଡିପି ୨ ଅଙ୍କ ବିଶିଷ୍ଟ ହ୍ରାସ ହେବା ନେଇ ବିଶ୍ୱର ପ୍ରମୁଖ ଏଜେନ୍ସିଗୁଡ଼ିକ ଆକଳନ କରିଛନ୍ତି। ୧୦ରୁ ୧୪% ଜିଡିପି ହ୍ରାସ ହେବ ବୋଲି ରିପୋର୍ଟରେ ପ୍ରକାଶ ପାଇଛି। ଚଳିତ ଆର୍ଥତ୍କ ବର୍ଷ ପ୍ରଥମ ତ୍ରୈମାସରେ ଭାରତର ଜିଡିପି ୨୩.୯% ହ୍ରାସ ହୋଇଛି। କରୋନାଜନିତ ଲାଗୁ ହୋଇଥିବା ଲକ୍ଡାଉନ ଯୋଗୁ ଅର୍ଥ ବ୍ୟବସ୍ଥାକୁ ଜୋର୍ଦାର ଝଟକା ଲାଗିଛି। ଆସନ୍ତା ବର୍ଷ ଜିଡିପି ପୁଣି ଥରେ ଟ୍ରାକ୍କୁ ଆସିବ ବୋଲି କୁହାଯାଇଛି। ଭାରତୀୟ ଅର୍ଥ ବ୍ୟବସ୍ଥା ଯେଉଁଭଳି ଭାବେ କ୍ଷତି ସହିଛି ତା’ର ଭରଣା ଲାଗି ଗୋଟିଏ ବର୍ଷ ଲାଗିପାରେ ବୋଲି ରିଜର୍ଭ ବ୍ୟାଙ୍କ ମୁଦ୍ରାନୀତି କମିଟି ସଦସ୍ୟ ମାଇକେଲ ପାତ୍ର କହିଛନ୍ତି।
ସେ କହିଛନ୍ତି, କରୋନା ପରେ ସାରା ବିଶ୍ୱ ଏବଂ ଅର୍ଥ ବ୍ୟବସ୍ଥା ସମ୍ପୂର୍ଣ୍ଣ ଭିନ୍ନ ହେବ। ସାମାଜିକ ଏବଂ ବାଣିଜି୍ୟକ ବ୍ୟବହାରରେ ବିଶେଷ ପରିବର୍ତ୍ତନ ଆସିବ। ମୋଟାମୋଟି ଭାବେ କହିବାକୁ ଗଲେ ଅର୍ଥ ବ୍ୟବସ୍ଥାରେ ସୁଧାର ଆସିବ। ସେହିଭଳି ଢାଞ୍ଚାଗତ ପରିବର୍ତ୍ତନ ମଧ୍ୟ ଦେଖାଯିବ। ସେହିଭଳି କୋଭିଡ୍ ପରେ ବିକାଶର ଗତିକୁ ଅଲଗା ଭାବେ ପ୍ରସ୍ତୁତ ହେବ। ଚଳିତ ମାସ ପ୍ରାରମ୍ଭରେ ରିଜର୍ଭ ବ୍ୟାଙ୍କର ମୁଦ୍ରାନୀତି କମିଟି ବୈଠକ ଅନୁଷ୍ଠିତ ହୋଇଥିଲା। ଲଗାତର ଦ୍ୱିତୀୟ ଥର ଲାଗି ରିଜର୍ଭ ବ୍ୟାଙ୍କ ଏହାର ରେପୋ (କେନ୍ଦ୍ରୀୟ ବ୍ୟାଙ୍କ ଯେଉଁ ହାରରେ ବାଣିଜି୍ୟକ ବ୍ୟାଙ୍କକୁ ସୁଧ ଦିଏ)କୁ ଅପରିବର୍ତ୍ତିତ ୪% ରଖିଛି। ସୁଧହାର ହ୍ରାସ ପାଇଁ ରିଜର୍ଭ ବ୍ୟାଙ୍କ ପ୍ରସ୍ତୁତ ହୋଇ ରହିଛି। ବଜାର ସ୍ଥିତି ବଦଳିଲେ କେନ୍ଦ୍ରୀୟ ବ୍ୟାଙ୍କ ଏ ଦିଗରେ ପଦକ୍ଷେପ ନେବ ବୋଲି ଗଭର୍ନର ଶକ୍ତିକାନ୍ତ ଦାସ ନିକଟରେ କହିଥିଲେ। କରୋନାର ଦ୍ୱିତୀୟ ପର୍ଯ୍ୟାୟ ସଂକ୍ରମଣ ଡର ବଜାରରେ ଲାଗି ରହିଛି। ୟୁରୋପ, ଇଣ୍ଡୋନେସିଆ ଏବଂ ଇସ୍ରାଏଲ ଭଳି ଦେଶରେ ପୁଣି ଥରେ ଲକ୍ଡାଉନ ଲାଗୁ କରାଯାଇଛି। ଭାରତର ମୋଟ ଜନସଂଖ୍ୟା ମଧ୍ୟରୁ ପ୍ରାୟ ଅଧା ଲୋକ ୨୦୨୧ ଫେବୃୟାରୀ ସୁଦ୍ଧା କରୋନାରେ ସଂକ୍ରମିତ ହେବା ନେଇ ଏକ କେନ୍ଦ୍ରୀୟ ଏଜେନ୍ସି ରିପୋର୍ଟ ପ୍ରକାଶ କରିଛି। ବର୍ତ୍ତମାନ ସୁଦ୍ଧା କୋଭିଡ୍-୧୯ର ୭୫ ଲକ୍ଷ ମାମଲା ସାମ୍ନାକୁ ଆସିଛି। କରୋନା ସଂକ୍ରମଣରେ ଭାରତ ଆମେରିକା ପରେ ଦ୍ୱିତୀୟ ସ୍ଥାନରେ ରହିଛି। ଏଭଳି ସ୍ଥିତି ଅର୍ଥ ବ୍ୟବସ୍ଥା ଲାଗି ଚିନ୍ତାଜନକ ବୋଲି କୁହାଯାଉଛି।
