ନୂଆଦିଲ୍ଲୀ,୧।୯: ଆର୍ଥତ୍କ ବର୍ଷ ୨୦୨୦-୨୧ର ଏପ୍ରିଲ-ଜୁନ ତ୍ରୈମାସରେ ଭାରତର ମୋଟ୍ ଘରୋଇ ଉତ୍ପାଦ (ଜିଡିପି) ୨୩.୯% ଖସିଛି। ଜାତୀୟ ପରିସଂଖ୍ୟାନ କାର୍ଯ୍ୟାଳୟ (ଏନ୍ଏସ୍ଓ) ପକ୍ଷରୁ ସୋମବାର ଏ ସଂକ୍ରାନ୍ତ ତଥ୍ୟ ପ୍ରକାଶ ପାଇଛି। ଗତ ଆର୍ଥତ୍କ ବର୍ଷ ସମାନ ସମୟ ତୁଳନାରେ ଚଳିତ ଆର୍ଥତ୍କ ବର୍ଷ ଏହି ସମୟରେ ଜିଡିପି ଅଭିବୃଦ୍ଧିକୁ ଶକ୍ତ ଧକ୍କା ଲାଗିଥିବା ଜଣାପଡିଛି। କରୋନା ଭାଇରସ ଯୋଗୁ ହୋଇଥିବା ଲକ୍ଡାଉନ କାରଣରୁ ସାରା ଦେଶରେ ଆର୍ଥତ୍କ କାର୍ଯ୍ୟକଳାପ ବିଗିଡି ଯାଇଛି। ଏହାର ପ୍ରଭାବ ଜିଡିପି ଉପରେ ଗଭୀର ଭାବେ ପଡିଥିବା ରିପୋର୍ଟରେ ପ୍ରକାଶ ପାଇଛି। ଗତ ୪ ଦଶନ୍ଧି ମଧ୍ୟରେ ପ୍ରଥମଥର ଲାଗି ଭାରତୀୟ ଅର୍ଥ ବ୍ୟବସ୍ଥାକୁ ଏଭଳି ବୃହତ୍ ପରିମାଣର କ୍ଷତି ସହିବାକୁ ପଡିଛି। ୧୯୯୬ ପରଠାରୁ ତ୍ରୈମାସିକ ଜିଡିପି ଡାଟା ପ୍ରକାଶ ପାଇବା ପରଠାରୁ ଜିଡିପିରେ ଏଭଳି ବଡ ଧରଣର ହ୍ରାସ ପରିଲକ୍ଷିତ ହୋଇଛି। ଚଳିତ ବର୍ଷ ଜାନୁୟାରୀ-ମାର୍ଚ୍ଚ ସମୟରେ ଜିଡିପି ୩.୧% ଅଭିବୃଦ୍ଧି ଘଟିଥିଲା। ଏହା ୧୭ ବର୍ଷର ସର୍ବନିମ୍ନ ସ୍ତର ବୋଲି କୁହାଯାଇଥିଲା।
୨୦୧୯-୨୦ ଆର୍ଥତ୍କ ବର୍ଷର ଜୁନ ତ୍ରୈମାସରେ ଜିଡିପି ୫.୨% ରହିଥିଲା। ଆର୍ଥତ୍କ ବର୍ଷ ୨୦୧୮-୧୯ରେ ଦେଶର ଅଭିବୃଦ୍ଧି ୬.୧% କୁ ହ୍ରାସ ହୋଇଥିବା ବେଳେ ୨୦୧୯-୨୦ରେ ଏହା ୪.୨%କୁ ଖସିଆସିଛି। ଯାହା ୧୧ ବର୍ଷର ସର୍ବନିମ୍ନ ସ୍ତର। ଅପରପକ୍ଷରେ ପ୍ରଥମ ତ୍ରୈମାସରେ ଦେଶର ଗ୍ରସ୍ ଭାଲ୍ୟୁ ଆଡେଡ୍(ଜିଭିଏ) ୨୨.୮% ହ୍ରାସ ପାଇଛି। ମାନୁଫାକଚରିଂରେ ୩୯.୩% ଏବଂ ଖଣି କ୍ଷେତ୍ର ୨୩.୩% ଖସିଥିବା ନଜରକୁ ଆସିଛି। ଗ୍ରସ୍ ଫିକ୍ସଡ କ୍ୟାପିଟାଲ ୫୨.୯%, ବିଦ୍ୟୁତ ଉତ୍ପାଦନ ୭%, ନିର୍ମାଣ କାର୍ଯ୍ୟକଳାପ ୫୦.୩% ଖସିଛି। ଏହି ସମୟରେ କେବଳ କୃଷି ଏବଂ ଆନୁଷଙ୍ଗିକ କ୍ଷେତ୍ର କାର୍ଯ୍ୟକଳାପ ୩.୪% ବଢିଛି। କେବଳ ଭାରତରେ ଜିଡିପି ହ୍ରାସ ପରିଲକ୍ଷିତ ହୋଇନାହିଁ। ଅନ୍ୟ ଦେଶଗୁଡିକ ମଧ୍ୟ କରୋନା ମହାମାରୀ ଜନିତ ଚାପରୁ ବର୍ତ୍ତି ପାରିନାହାନ୍ତି। ଚାଇନାରେ ସ୍ଥିତି ସୁଧାର ଆସିବାରୁ ଏହାର ଜିଡିପି ବୃଦ୍ଧି ୩.୨୦% ସ୍ତରରେ ରହିଛି। ସେହିଭଳି ବ୍ରିଟେନ ଅର୍ଥ ବ୍ୟବସ୍ଥା ୨୧.୭% ଖସିଥିବା ବେଳେ ଜର୍ମାନୀ ୧୦.୧୦% ଏବଂ ଆମେରିକା ଜିଡିପି ୯.୧୦% ହ୍ରାସ ପାଇଥିବା ନଜରକୁ ଆସିଛି।
ମହାମାରୀ ଯୋଗୁ ଜିଡିପିକୁ ଶକ୍ତ ଧକ୍କା ଲାଗିବ ବୋଲି ବିଭିନ୍ନ ଅନ୍ତର୍ଜାତୀୟ ଏଜେନ୍ସି ପୂର୍ବରୁ ମତ ରଖିଥିଲେ। ଏହି ହ୍ରାସ ୧୫ରୁ ୩୫% ଖସିବ ବୋଲି ଆଶଙ୍କା ମଧ୍ୟ କରାଯାଇଥିଲା। ଦେଶର ପୂର୍ବତନ ପରିସଂଖ୍ୟାନବିତ ପ୍ରଣବ ସେନ କହିଥିଲେ, ଜିଡିପି ୨୫ରୁ ୩୫% ଖସିପାରେ। ମାତ୍ର ଏନ୍ଏସ୍ଓ ଏହାକୁ ୧୫ରୁ ୧୬% କମ୍ କରି ଦେଖାଇବ। ଅଣସଙ୍ଗଠିତ କ୍ଷେତ୍ରର ଡାଟା ଉପଲବ୍ଧ ନ ଥିବାରୁ ଜିଡିପି ତଥ୍ୟକୁ କମ୍ କରି ଦେଖାଯିବ ବୋଲି ସେନ୍ ରବିବାର ମତ ରଖିଥିଲେ। ଜିଡିପି ୨୫% ହ୍ରାସ ହେବା ନେଇ ଇକ୍ରାର ପ୍ରମୁଖ ଅର୍ଥନୀତିଜ୍ଞ ଆଦିତି ନାୟର ମଧ୍ୟ ପୂର୍ବାନୁମାନ କରିଥିଲେ। ସଙ୍ଗଠିତ ଏବଂ ଅଣସଙ୍ଗଠିତ କ୍ଷେତ୍ର ଡାଟା ଠିକ୍ ଭାବେ ସ୍ଥାନ ପାଇବ ନାହିଁ ବୋଲି ସେ କହିଥିଲେ। ବ୍ଲୁମବର୍ଗ ପକ୍ଷରୁ ହୋଇଥିବା ଏହାର ଅର୍ଥନୀତିଜ୍ଞଙ୍କ ସର୍ଭେରେ କୁହାଯାଇଥିଲା ଯେ, ଭାରତର ଜିଡିପି ପ୍ରାୟ ୧୯% ଖସିବ। କରୋନା ଯୋଗୁ ଘରୋଇ ବଜାରରେ ଆର୍ଥତ୍କ କାର୍ଯ୍ୟକଳାପ ବିଗିଡି ଯାଇଛି। ବିମାନ ଚଳାଚଳ, ପର୍ଯ୍ୟଟନ, ହୋଟେଲ ଏବଂ ହସ୍ପିଟାଲିଟି ସମେତ ବିଭିନ୍ନ କ୍ଷେତ୍ର ବର୍ତ୍ତମାନ ସୁଦ୍ଧା ମଧ୍ୟ ସ୍ବାଭାବିକ ହୋଇପାରିନାହିଁ।
