ନୂଆଦିଲ୍ଲୀ,୧୨।୫: ଅଶୋଧିତ ତୈଳ ଦର ବୃଦ୍ଧି ଏବଂ ବିଶ୍ୱ ଅର୍ଥବ୍ୟବସ୍ଥାର ଧିମାବସ୍ଥାକୁ ନଜରରେ ରଖି ଆମେରିକାର ଇନ୍ଭେଷ୍ଟମେଣ୍ଟ ବ୍ୟାଙ୍କିଙ୍ଗ୍ କମ୍ପାନୀ ‘ମୋର୍ଗାନ୍ ଷ୍ଟାନ୍ଲେ’ ପକ୍ଷରୁ ଦେଶର ସମଗ୍ର ଘରୋଇ ଉତ୍ପାଦ (ଜିଡିପି) ବୃଦ୍ଧି ଅନୁମାନକୁ ହ୍ରାସ କରାଯାଇଛି। ମୋର୍ଗାନ୍ ଷ୍ଟାନ୍ଲେ ପକ୍ଷରୁ ଚଳିତ ଆର୍ଥିକ ବର୍ଷ ଅର୍ଥାତ୍ ୨୦୨୨-୨୩ ପାଇଁ ଦେଶର ଜିଡିପି ଅଭିବୃଦ୍ଧି ଅନୁମାନକୁ ୭.୯%ରୁ ହ୍ରାସ କରି ୭.୬% କରିଦିଆଯାଇଛି। ପରବର୍ତ୍ତୀ ଆର୍ଥିକ ବର୍ଷ ଅର୍ଥାତ୍ ୨୦୨୩-୨୪ ଆର୍ଥିକ ବର୍ଷ ପାଇଁ ମଧ୍ୟ କମ୍ପାନୀ ପକ୍ଷରୁ ଜିଡିପି ଅଭିବୃଦ୍ଧି ଅନୁମାନ ୭%ରୁ ହ୍ରାସକରି ୬.୭% କରାଯାଇଛି। ଏ ସମ୍ପର୍କରେ ମୋର୍ଗାନ୍ ଷ୍ଟାନ୍ଲେ ପକ୍ଷରୁ କୁହାଯାଇଛି, ବୈଶ୍ୱିକ ଅର୍ଥବ୍ୟବସ୍ଥାରେ ହାରାହାରି ୨.୯% ବୃଦ୍ଧି ଘଟିପାରେ। ପ୍ରତିକୂଳ ବ୍ୟବସାୟିକ ପରିସ୍ଥିତି ଏବଂ ଭୂ-ରାଜନୈତିକ ତିକ୍ତତା କାରଣରୁ ନିବେଶ ଦିଗରେ ଲୋକଙ୍କର ମନୋବଳ କମିଯାଇଛି। ଏହାଦ୍ୱାରା ଦେଶର ଆର୍ଥିକ ବିକାଶ ଅନୁମାନ ଉପରେ ପ୍ରତିକୂଳ ପ୍ରଭାବ ପଡ଼ିଛି। ଏହା ବ୍ୟତୀତ ମୋର୍ଗାନ୍ ଷ୍ଟାନ୍ଲେ ରିପୋର୍ଟରେ କୁହାଯାଇଛି, ଏହି ସମସ୍ତ ଆହ୍ବାନ ସତ୍ତ୍ୱେ ୨୦୨୨ ଏବଂ ୨୦୨୩ ବର୍ଷରେ ଭାରତୀୟ ଅର୍ଥବ୍ୟବସ୍ଥାର ଅଭିବୃଦ୍ଧି କୋଭିଡ୍ ମହାମାରୀ କବଳିତ ବର୍ଷଗୁଡ଼ିକଠାରୁ ଉତ୍ତମ ରହିବ। ଧିମା ବୈଶ୍ୱିକ ଅଭିବୃଦ୍ଧି ହାର, ବିଭିନ୍ନ ବସ୍ତୁର ବଜାର ମୂଲ୍ୟ ବୃଦ୍ଧି ଏବଂ ବୈଶ୍ୱିକ ପୁଞ୍ଜିବଜାରରେ ହ୍ରାସ କାରଣରୁ ନିବେଶକମାନେ ନିବେଶ ଦିଗରେ ବିଶେଷ ଆଗ୍ରହ ପ୍ରକାଶ ନ କରିବାର ପ୍ରଭାବ ଭାରତର ଅଭିବୃଦ୍ଧି ଉପରେ ପରିଲକ୍ଷିତ ହେଉଥିବା ମନେହେଉଛି। ମୋର୍ଗାନ୍ ଷ୍ଟାନ୍ଲେ ପକ୍ଷରୁ ଭାରତ ପାଇଁ ମୁଖ୍ୟ ଅର୍ଥଶାସ୍ତ୍ରୀ ଉପାସନା ଚାଚରା ଏ ସମ୍ପର୍କରେ କହିଛନ୍ତି, ବହୁଥିବା ମୁଦ୍ରାସ୍ଫୀତି, ଗ୍ରାହକଙ୍କ ଚାହିଦାରେ ହ୍ରାସ, ଦୁର୍ବଳ ଆର୍ଥିକ ଅବସ୍ଥା ଦ୍ୱାରା ବିଜ୍ନେସ୍ ସେଣ୍ଟିମେଣ୍ଟ ଉପରେ ଖରାପ ପ୍ରଭାବ ପଡୁଛି ଏବଂ ଏହାଦ୍ୱାରା କ୍ୟାପିଟାଲ ଏକ୍ସପେଣ୍ଡିଚର (କ୍ୟାପେକ୍ସ)ରେ ଭରଣାରେ ମଧ୍ୟ ବିଳମ୍ବ ଘଟିବ ବୋଲି ସେ କହିଛନ୍ତି। ଅକ୍ଟୋବର ୨୦୨୨ ପର୍ଯ୍ୟନ୍ତ ଉପଭୋକ୍ତା ମୂଲ୍ୟ ସୂଚକାଙ୍କ ଆଧାରିତ ମୁଦ୍ରାସ୍ଫୀତି (ସିପିଆଇ) ୬%ରୁ ଅଧିକ ରହିବ। ସେହିପରି ୨୦୨୩ ବର୍ଷରେ ଦେଶର ହାରାହାରି ଖୁଚୁରା ମୁଦ୍ରାସ୍ଫୀତି ୬.୫% ରହିବା ନେଇ ମୋର୍ଗାନ୍ ଷ୍ଟାନ୍ଲେ ପକ୍ଷରୁ ଅନୁମାନ କରାଯାଇଛି।
