ନୂଆଦିଲ୍ଲୀ,୧୨ା୧୧: ସାରା ବିଶ୍ୱ ସମେତ ଭାରତ ମଧ୍ୟ ମାନ୍ଦାବସ୍ଥା ସାଙ୍ଗକୁ ଅନ୍ତଃରାଷ୍ଟ୍ରୀୟ ସମସ୍ୟାର ସମ୍ମୁଖୀନ ହେଉଛି। ଏପରିକି ଗତ କିଛି ମାସ ହେବ ଭାରତର ଭୌଗୋଳିକ ସମସ୍ୟା ସାଙ୍ଗକୁ ଭାରତୀୟ ମୁଦ୍ରା ମୂଲ୍ୟ ହ୍ରାସ ଏବଂ ଦରବୃଦ୍ଧି ଉଭୟ ସରକାର ଓ ସାଧାରଣ ଜନତାଙ୍କ ପାଇଁ ଚିନ୍ତାର ବିଷୟ ପାଲିଟିଛି। ଏଭଳି ପରିସ୍ଥିତିରେ ଶୁକ୍ରବାର ଅନ୍ତଃରାଷ୍ଟ୍ରୀୟ ଆର୍ଥିକ ଆକଳନକାରୀ ସଂସ୍ଥା ମୁଡିଜ୍ ଇନ୍ଭେଷ୍ଟର୍ସ ସର୍ଭିସ ପକ୍ଷରୁ କୁହାଯାଇଛି ଯେ ଦେଶର ଆର୍ଥିକ ବିକାଶରେ ମନ୍ଥର ଆସିବାର ଆଶଙ୍କା ରହିଛି। ଏପରିକି ଦେଶର ଜିଡିପି ଅଭିବୃଦ୍ଧିକୁ ନେଇ ମଧ୍ୟ ସଂସ୍ଥା ନୂଆ ଆକଳନ କରିଛି। ସଂସ୍ଥାର ଆକଳନ ଅନୁଯାୟୀ ଚଳିତ ବର୍ଷ ଭାରତର ଆର୍ଥିକ ଅଭିବୃଦ୍ଧି ହାର ୦.୭% ହ୍ରାସ ଘଟି ୭%ରେ ରହିବ ବୋଲି ମୁଡିଜ୍ ଆକଳନ କରିଛି। ଏହା ପୂର୍ବରୁ ସଂସ୍ଥାର ଆକଳନ ୭.୭% ରହିଥିଲା। ସେହିଭଳି ଚଳିତ ଆର୍ଥିକ ବର୍ଷରେ ୨ୟ ଥର ପାଇଁ ମୁଡିଜ୍ ଭାରତର ଅଭିବୃଦ୍ଧି ହାରକୁ ହ୍ରାସ କରି ନୂଆ ଆକଳନ ଜାରି କରିଛି। ୨୦୨୨ ମେ’ରେ ମଧ୍ୟ ସଂସ୍ଥା ଭାରତର ଅଭିବୃଦ୍ଧି ହାର ୮.୮% ରହିବା ନେଇ ମୁଡିଜ୍ ଆକଳନ କରିଥିଲା। ହେଲେ ଚଳିତ ବର୍ଷ ସେପ୍ଟେମ୍ବରରେ ସଂସ୍ଥା ତା’ର ପୂର୍ବ ଆକଳନକୁ ହ୍ରାସକରି ୭.୭% କରିଥିଲା। ଅପରପକ୍ଷରେ ମୁଡିଜ୍ର ସର୍ଭେ ଅନୁସାରେ ଘରୋଇ ସ୍ତରରେ ଉଚ୍ଚ ସୁଧ ହାର ଏବଂ ବିଶ୍ୱର ଅଭିବୃଦ୍ଧି ମାନ୍ଦା ଯୋଗୁ ଭାରତର ଆର୍ଥିକ ବିକାଶକୁ ପ୍ରଭାବିତ କରିବ। ବିଶେଷକରି ଦରବୃଦ୍ଧି, ଉଚ୍ଚ ସୁଧ ହାର ଏବଂ ବିଶ୍ୱର ବିକାଶରେ ମନ୍ଥର ଆସିବା ପ୍ରଭାବ ଆମ ପୂର୍ବ ଆକଳନଠାରୁ ଅଧିକ ରହିବ ବୋଲି ସଂସ୍ଥା ମତପ୍ରକାଶ କରିଛି। ଉଲ୍ଲେଖଯୋଗ୍ୟ, ରେଟିଂ ଏଜେନ୍ସି ମୁଡିଜ୍ କହିଛି, ୨୦୨୩ ବିକାଶ ହାରରେ ହ୍ରାସ ହୋଇ ୪.୮% ରହିବ ହେଲେ ୨୦୨୪ ରେ ଏହା ପରିମାଣ ବଢି ପ୍ରାୟ ୬.୪% ହେବ ବୋଲି ଆଶା କରାଯାଉଛି। ସୂଚନାଯୋଗ୍ୟ, ଦେଶର ବଢ଼ି ଚାଲିଥିବା ଆର୍ଥିକ ସମସ୍ୟା ସାଙ୍ଗକୁ ମୁଦ୍ରାସ୍ଫୀତ ଏବଂ ଦରବୃଦ୍ଧିରେ ନିୟନ୍ତ୍ରଣ ପାଇଁ ସରକାର ଆବଶ୍ୟକ ପଦକ୍ଷେପ ଗ୍ରହଣ କରୁଥିବା ବେଳେ ଭାରତୀୟ ରିଜର୍ଭ ବ୍ୟାଙ୍କ ମଧ୍ୟ ବିଭିନ୍ନ ସମୟରେ ଅର୍ଥ ବ୍ୟବସ୍ଥାର ସୁଧାର ସାଙ୍ଗକୁ ସାଧାରଣ ଜନତା ପାଇଁ ଦରଦାମ ବୃଦ୍ଧି ହ୍ରାସ ସମ୍ପର୍କରେ ମଧ୍ୟ କାର୍ଯ୍ୟ କରୁଥିବା ଦେଖାଦେଇଛି। ହେଲେ ସବୁ ସତ୍ତ୍ୱେ ମଧ୍ୟ ଭାରତୀୟ ଅର୍ଥ ବ୍ୟବସ୍ଥାରେ ପରିବର୍ତ୍ତନ ହୋଇପାରୁନାହିଁ।
