ନୂଆଦିଲ୍ଲୀ,୨୪।୯: ଭାରତୀୟ କ୍ରିକେଟ ଦଳର ମୁଖ୍ୟ କୋଚ ଗୌତମ ଗମ୍ଭୀର ଓ ଖେଳାଳିଙ୍କ ମଧ୍ୟରେ ସମ୍ପର୍କ ସବୁବେଳେ ଚର୍ଚ୍ଚାରେ ରହିଥାଏ। ବିଶେଷକରି ଅଧିନାୟକ ଓ କୋଚ୍ଙ୍କ ସମ୍ପର୍କ କଥା ଆସିଲେ, ଉଭୟଙ୍କ ମଧ୍ୟରେ କିଭଳି ସମନୱୟ ରହିଛି, ତା’ ଉପରେ ସମସ୍ତଙ୍କ ନଜର ରହିଥାଏ। ଏବେ ଅଧିନାୟକ ରୋହିତ ଶର୍ମାଙ୍କ ସହ ନିଜ ସମ୍ପର୍କକୁ ନେଇ ଖୋଲାଖୋଲି ମତ ରଖିଛନ୍ତି ଗୌତମ ଗମ୍ଭୀର।
ଜିଓଷ୍ଟାରକୁ ଦେଇଥିବା ଏକ ସାକ୍ଷାତକାରରେ ଗମ୍ଭୀର କହିଛନ୍ତି ଯେ, ରୋହିତଙ୍କ ସହ କାମ କରିବା ତାଙ୍କ ପାଇଁ କାହିଁକି ସହଜ ହୋଇଛି ଏବଂ ଉଭୟଙ୍କ ମଧ୍ୟରେ କିଭଳି ସମନୱୟ ରହିଛି। ଗମ୍ଭୀର ସ୍ପଷ୍ଟ କରିଛନ୍ତି ଯେ, ରୋହିତଙ୍କ ସହ ତାଙ୍କ ସମ୍ପର୍କ କେବଳ ସାଧାରଣ କୋଚ୍-ଅଧିନାୟକ ସମ୍ପର୍କ ନୁହେଁ। ଏହା ଦୀର୍ଘ ବର୍ଷର ପୁରୁଣା ସମ୍ପର୍କ।
ରୋହିତ ଶର୍ମାଙ୍କ ସହ ନିଜର ପୁରୁଣା ସମ୍ପର୍କ ବିଷୟରେ ଗମ୍ଭୀର କହିଛନ୍ତି, ରୋହିତ ଓ ମୋର ସମ୍ପର୍କ କେବଳ ଅଧିନାୟକ ଓ କୋଚ୍ର ନୁହେଁ। ରୋହିତ ପ୍ରଥମେ ଭାରତୀୟ ଦଳକୁ ଆସିବା ସମୟରେ ମୁଁ ଜଣେ ବରିଷ୍ଠ ଖେଳାଳି ଥିଲି। ଆମର ସମ୍ପର୍କ ସେହି ସମୟରୁ ଆରମ୍ଭ ହୋଇଛି। ସେବେଠାରୁ ସେ ମୋତେ ଜାଣନ୍ତି। ସେ ଆହୁରି କହିଛନ୍ତି, ଏଭଳି ନୁହେଁ ଯେ ଆମ ମଧ୍ୟରେ ଏବେ ଏକ ନୂଆ ସମ୍ପର୍କ ଗଢ଼ିଉଠିଛି। ମୁଁ ଏଭଳି କୌଣସି ବାହାର ଦେଶରୁ ଆସିନାହିଁ ଯେଉଁଠାରେ ରୋହିତଙ୍କୁ କେବେ ଖେଳୁଥିବା ଦେଖିନାହିଁ କିମ୍ବା ସେ କିଭଳି ମଣିଷ, ତାହା ଜାଣିନାହିଁ।
ଗମ୍ଭୀରଙ୍କ ମତରେ, ଏହି ପୁରୁଣା ସମ୍ପର୍କ ଯୋଗୁ ଉଭୟଙ୍କୁ ପରସ୍ପରକୁ ବୁଝିବା ପାଇଁ ଅଧିକ ସମୟ ଦେବାକୁ ପଡ଼ିନାହିଁ। ଗମ୍ଭୀର ରୋହିତଙ୍କୁ ଜଣେ ଯୁବ ଖେଳାଳିରୁ ବିଶ୍ୱର ଶ୍ରେଷ୍ଠ ଖେଳାଳି ଓ ଅଧିନାୟକଙ୍କ ମଧ୍ୟରୁ ଜଣେ ହେବା ପର୍ଯ୍ୟନ୍ତ ଦେଖିଛନ୍ତି। ସେହିପରି ରୋହିତ ମଧ୍ୟ ବର୍ଷ ବର୍ଷ ଧରି ଗମ୍ଭୀରଙ୍କ ସ୍ବଭାବ ଓ କାମ କରିବାର ଶୈଳୀ ସହ ପରିଚିତ। କ୍ରିକେଟରେ ଅନେକ ସମୟରେ କୋଚ୍ ଓ ଅଧିନାୟକଙ୍କ ମତ ଭିନ୍ନ ହୋଇଥାଏ। ଗମ୍ଭୀର ମଧ୍ୟ ସ୍ବୀକାର କରିଛନ୍ତି ଯେ, ତାଙ୍କ ଓ ରୋହିତଙ୍କ ମଧ୍ୟରେ କୌଣସି ବିଷୟକୁ ନେଇ ଭିନ୍ନ ମତ ରହିପାରେ। କିନ୍ତୁ ଉଭୟଙ୍କ ଲକ୍ଷ୍ୟ ଦଳର ଭଲ ପ୍ରଦର୍ଶନ ହେବା ଦରକାର ବୋଲି ସେ କହିଛନ୍ତି।
ଗମ୍ଭୀର କହିଛନ୍ତି, ଯେତେବେଳେ ଆପଣ ଏକାଠି ଖେଳିଥାନ୍ତି, ସେତେବେଳେ ଜିନିଷଗୁଡ଼ିକ ବହୁତ ସହଜ ହୋଇଯାଏ। ସେ ମୋର ଚିନ୍ତାଧାରା ଜାଣନ୍ତି ଏବଂ ମୁଁ ମଧ୍ୟ ତାଙ୍କ ଚିନ୍ତାଧାରା ବୁଝେ। ଆସନ୍ତାକାଲି ମୋର ମତ ଅଲଗା ହୋଇପାରେ ଏବଂ ଅଧିନାୟକଙ୍କ ମତ ମଧ୍ୟ ଭିନ୍ନ ହୋଇପାରେ। କିନ୍ତୁ ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ଶେଷ ନିଷ୍ପତ୍ତି ଦଳର ସ୍ବାର୍ଥରେ ହେବା ଦରକାର। ଯଦି ଏହା ହୁଏ, ତେବେ ଏହାଠାରୁ ଭଲ କିଛି ହୋଇପାରିବ ନାହିଁ।
ରୋହିତ ଶର୍ମାଙ୍କ ବ୍ୟତୀତ ଗୌତମ ଗମ୍ଭୀର ସୂର୍ଯ୍ୟକୁମାର ଯାଦବ, ଶୁଭମନ ଗିଲ ଓ ଶ୍ରେୟସ ଆୟରଙ୍କ ଭଳି ଅନ୍ୟ ତିନିଜଣ ଅଧିନାୟକଙ୍କ ସହ ମଧ୍ୟ କାମ କରିଛନ୍ତି। ଭିନ୍ନ ଫର୍ମାଟରେ ଏହି ସମସ୍ତ ଅଧିନାୟକଙ୍କ କାମ କରିବାର ଶୈଳୀ ଅଲଗା ହୋଇପାରେ। କିନ୍ତୁ ଗମ୍ଭୀରଙ୍କ ମତରେ, ସମସ୍ତଙ୍କ ମଧ୍ୟରେ ଗୋଟିଏ କଥା ସମାନଭାରତୀୟ କ୍ରିକେଟକୁ ଆଗକୁ ନେବାର ଇଚ୍ଛା।
