ନୂଆଦିଲ୍ଲୀ,୫।୮: ଶୁବମନ ଗିଲଙ୍କ ଯୁବ ଭାରତୀୟ ଦଳ ଇଂଲଣ୍ଡ ଯାଇ ଇତିହାସ ସୃଷ୍ଟି କରିଛି। ଅଗଷ୍ଟ ୪ରେ ଓଭାଲ ଟେଷ୍ଟର ଶେଷ ଦିନରେ ଭାରତୀୟ ଦଳ ମାତ୍ର ୬ ରନରେ ଆୟୋଜକ ଦଳକୁ ପରାସ୍ତ କରିଥିଲା। ଯାହା ସହିତ ପାଞ୍ଚ ମ୍ୟାଚ ବିଶିଷ୍ଟ ସିରିଜ ୨-୨ ଡ୍ରରେ ଶେଷ ହୋଇଥିଲା।
ମ୍ୟାଚ ପରେ ଭାରତର ଡ୍ରେସିଂ ରୁମରେ ଖୁସିର ଲହରୀ ଖେଳିଯାଇଥିଲା। ଦଳର ମୁଖ୍ୟ ପ୍ରଶିକ୍ଷକ ଗୌତମ ଗମ୍ଭୀରଙ୍କ ପ୍ରତିକ୍ରିୟା ଏବେ ସାମ୍ନାକୁ ଆସିଛି। ବିସିସିଆଇ ଏକ ଭିଡିଓ ଜାରି କରିଛି। ଯେଉଁଥିରେ ସେ କାନ୍ଦୁଥିବାର ଦେଖାଯାଉଛି।
ଗୌତମ ଗମ୍ଭୀରଙ୍କ ମାର୍ଗଦର୍ଶନରେ ଟିମ ଇଣ୍ଡିଆ ପ୍ରଥମ ଥର ପାଇଁ ବିଦେଶ ମାଟିରେ ଟେଷ୍ଟ ସିରିଜ ବରାବର କରିଛି। ପୂର୍ବରୁ ଭାରତକୁ ଅଷ୍ଟ୍ରେଲିଆ ବିପକ୍ଷରେ ବର୍ଡର ଗାଭାସ୍କର ଟ୍ରଫି ସିରିଜରେ ପରାଜୟର ସାମ୍ନା କରିବାକୁ ପଡିଥିଲା। ଯାହା ପରେ ଗମ୍ଭୀରଙ୍କୁ ବହୁତ ସମାଲୋଚନା କରାଯାଇଥିଲା। ଏବେ ଓଭାଲ ଟେଷ୍ଟ ବିଜୟ ତାଙ୍କ ପାଇଁ ବହୁତ ଅର୍ଥ ରଖିବ। ଏହି ଯୁବ ଦଳ କେବଳ ପଞ୍ଚମ ଟେଷ୍ଟ ଜିତିନଥିଲା, ବରଂ ୧-୨ରେ ପଛୁଆ ରହିବା ପରେ ସିରିଜକୁ ବରାବର କରି ଶେଷ କରିଥିଲା।
ବିସିସିଆଇ ଗତକାଲି ଏହାର ଅଫିସିଆଲ ଏକ୍ସ ହ୍ୟାଣ୍ଡେଲରେ ଏକ ଭିଡିଓ ଅପଲୋଡ କରିଛି। ଏହା ଭାରତୀୟ ଡ୍ରେସିଂ ରୁମର ଏକ ଭିଡିଓ। ଯେଉଁଥିରେ ମ୍ୟାଚର ଶେଷ ମୁହୂର୍ତ୍ତଗୁଡ଼ିକ ଦେଖାଯାଇଛି। ମହମ୍ମଦ ସିରାଜ ଗସ ଆଟକିନସନଙ୍କୁ କ୍ଲିନ ବୋଲ୍ଡ କରିବା ମାତ୍ରେ ଦଳର ସହାୟକ କର୍ମଚାରୀ ପରସ୍ପରକୁ ଆଲିଙ୍ଗନ କରିଥିଲେ। ସମସ୍ତେ ଏହାକୁ ପୂର୍ଣ୍ଣ ଉତ୍ସାହର ସହିତ ପାଳନ କରିଥିଲେ। ଏହି ଅବସରରେ ଗୌତମ ଗମ୍ଭୀରଙ୍କ ଆଖି ଓଦା ହୋଇଯାଇଥିଲା।
ଭାରତ ଏବଂ ଇଂଲଣ୍ଡ ୩୧ ଜୁଲାଇରୁ ପଞ୍ଚମ ଟେଷ୍ଟ ଖେଳିଥିଲେ। ସିରିଜରେ କ୍ରମାଗତ ପଞ୍ଚମ ଥର ପାଇଁ ଶୁବମନ ଗିଲ ଟସ ହାରିଥିଲେ। ବେନ ଷ୍ଟୋକ୍ସଙ୍କ ସ୍ଥାନରେ ଇଂଲଣ୍ଡର ଅଧିନାୟକତ୍ୱ କରୁଥିବା ଓଲି ପୋପ ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲେ। ପ୍ରଥମେ ଖେଳି ଭାରତ ପ୍ରଥମ ଇନିଂସରେ ୨୨୪ ରନ କରିଥିଲା। ଜବାବରେ, ଇଂଲଣ୍ଡ ଦଳ ୨୪୭ ରନରେ ଅଲଆଉଟ ହୋଇଥିଲା। ସେମାନେ ୨୩ ରନର ଲିଡ ପାଇଥିଲେ।
ଦ୍ୱିତୀୟ ଇନିଂସରେ, ଭାରତୀୟ ଦଳ ୩୯୬ ରନ କରିଥିଲା। ଇଂଲଣ୍ଡକୁ ବିଜୟ ପାଇଁ ୩୭୪ ରନର ଟାର୍ଗେଟ ମିଳିଥିଲା। ଲକ୍ଷ୍ୟ ପିଛା କରି, ଆୟୋଜକ ଦଳ ୩୬୭ ରନ କରିବା ପରେ ଅଲଆଉଟ ହୋଇଯାଇଥିଲା। ଏହି ମ୍ୟାଚରେ ୯ ୱିକେଟ ନେଇଥିବାରୁ ମହମ୍ମଦ ସିରାଜଙ୍କୁ ପ୍ଲେୟାର ଅଫ ଦି ମ୍ୟାଚ ବିବେଚିତ କରାଯାଇଥିଲା।
𝗕𝗲𝗹𝗶𝗲𝗳. 𝗔𝗻𝘁𝗶𝗰𝗶𝗽𝗮𝘁𝗶𝗼𝗻. 𝗝𝘂𝗯𝗶𝗹𝗮𝘁𝗶𝗼𝗻!
Raw Emotions straight after #TeamIndia's special win at the Kennington Oval 🔝#ENGvIND pic.twitter.com/vhrfv8ditL
— BCCI (@BCCI) August 4, 2025
