ନୂଆଦିଲ୍ଲୀ,୧୨।୪: ଆଦାନୀ ଗ୍ରୁପ୍ର ଅଧ୍ୟକ୍ଷ ଗୌତମ ଆଦାନୀ ବିଶ୍ୱର ଷଷ୍ଠ ଧନୀ ବ୍ୟକ୍ତି ଭାବେ ବିବେଚିତ ହୋଇଛନ୍ତି। ଆଦାନୀ ଗ୍ରୁପ୍ କମ୍ପାନୀର ଶେୟାରରେ ଜବରଦସ୍ତ ଆୟ ଯୋଗୁ ଗତ କିଛି ଦିନ ମଧ୍ୟରେ ଗୌତମ ଆଦାନୀଙ୍କ ସମ୍ପତ୍ତି ବହୁତ ବୃଦ୍ଧି ପାଇଛି। ବ୍ଲୁମବର୍ଗ ବିଲିନୟାର ଇଣ୍ଡେକ୍ସ ଅନୁଯାୟୀ ଗୌତମଙ୍କ ସମ୍ପତ୍ତି ମୂଲ୍ୟ ୧୧୮ବିଲିୟନ ଡଲାରରେ ପହଞ୍ଚିଛି। ନେଟ୍ଓ୍ବର୍ଥ ଦୃଷ୍ଟିରୁ ଆଦାନୀ ବିଶ୍ୱର ଅନେକ ଅଗ୍ରଣୀ ଶିଳ୍ପପତିଙ୍କୁ ପଛରେ ପକାଇଦେଇଛନ୍ତି। ବିଶ୍ୱର ଧନୀ ତାଲିକାରେ ସେ ଗୁଗୁଲର ଉଭୟ ସହ-ପ୍ରତିଷ୍ଠାତା ଲ୍ୟାରି ପେଜ ଓ ସର୍ଗି ବ୍ରିନଙ୍କୁ ପଛରେ ପକାଇଛନ୍ତି। ବ୍ଲୁମବର୍ଗର ଧନୀ ବ୍ୟକ୍ତିଙ୍କ ତାଲିକାରେ ପେଜ୍(୧୧୬ ବିଲିୟନ ଡ଼ଲାର୍) ସପ୍ତମ ସ୍ଥାନକୁ ଖସି ଆସିଥିବା ବେଳେ ବ୍ରିନ(୧୧୧ ବିଲିୟନ ଡଲାର) ଅଷ୍ଟମ ସ୍ଥାନକୁ ଖସିଆସିଛନ୍ତି। ବିଶ୍ୱର ଧନୀ ତାଲିକାରେ ମୁକେଶ ଅମ୍ବାନୀ ୧୧ତମ ସ୍ଥାନରେ ରହିଛନ୍ତି। ତାଙ୍କର ମୋଟ ନେଟ୍ଓ୍ବର୍ଥ ୯୭.୪ ବିଲିୟନ ଡଲାର ରହିଛି। ଚଳିତ ବର୍ଷ ଏବେ ସୁଦ୍ଧା ଅମ୍ବାନୀଙ୍କ ସମ୍ପତ୍ତି ୭.୪୫ ବିଲିୟନ ଡଲାର ବୃଦ୍ଧି ପାଇଛି। ଏହି ତାଲିକାରେ ଏଲୋନ ମସ୍କ ପ୍ରଥମ ସ୍ଥାନରେ ରହିଥିବା ବେଳେ ତାଙ୍କର ମୋଟ ନେଟ୍ ଓ୍ବର୍ଥ ୨୪୯ ବିଲିୟନ ଡଲାର ରହିଛି। ସେହିପରି ଏହି ତାଲିକାର ଦ୍ୱିତୀୟ ସ୍ଥାନରେ ଜେଫ ବେଜୋସ ରହିଥିବା ବେଳେ ତାଙ୍କର ନେଟ୍ ଓ୍ବର୍ଥ ୧୭୬ ବିଲିୟନ ଡଲାରରେ ପହଞ୍ଚିଛି। ୧୩୯ ବିଲିୟନ ଡଲାରର ସମ୍ପତ୍ତି ସହିତ ବର୍ନାଡ ଆର୍ନଲ୍ଟ ତୃତୀୟ ସ୍ଥାନରେ ରହିଛନ୍ତି। ସେହିଭଳି ୧୩୦ ବିଲିୟନ ଡଲାରର ସମ୍ପତ୍ତି ସହିତ ବିଲ୍ ଗେଟ୍ସ ଚତୁର୍ଥ ସ୍ଥାନରେ, ଭେଟେରାନ ନିବେଶ ୱାରେନ ବଫେଟ ପଞ୍ଚମ ସ୍ଥାନରେ ରହିଛନ୍ତି। ତାଙ୍କର ମୋଟ ନେଟ୍ ଓ୍ବର୍ଥ ୧୨୭ ବିଲିୟନ ଡଲାର ରହିଥିବା ଜଣାପଡ଼ିଛି।
