ତୁମୁଡ଼ିବନ୍ଧ,୧ା୪(ଦୀପକ କୁମାର ପରାସେଠ୍): କନ୍ଧମାଳ ଜିଲା ତୁମୁଡ଼ିବନ୍ଧ ଥାନା ମୁଖ୍ୟ ବଜାରସ୍ଥିତ ଦୁଷ୍ମନ୍ତ ସାହୁ ନାମକ ବ୍ୟବସାୟୀଙ୍କ ବାସଭବନ ରୋଷେଇ ଘରେ ରନ୍ଧନ ଗ୍ୟାସ ଫାଟି ଯିବାରୁ ଅଳ୍ପକେ ବର୍ତିଲେ ଦୁଷ୍ମନ୍ତ ସାହୁଙ୍କ ପରିବାର।
ଘଟଣାରୁ ପ୍ରକାଶ ଯେ, ପ୍ରତିଦିନ ଭଳି ଆଜି ମଧ୍ୟ ଦୁଷ୍ମନ୍ତଙ୍କ ସ୍ତ୍ରୀ ନିଜ ନିତ୍ୟକର୍ମ ସାରି ରୋଷେଇ ଘରେ ଗ୍ୟାସ୍ ମାଧ୍ୟମରେ ରୋଷେଇ କରୁଥିବା ସମୟରେ ହଠାତ ଚୁଲାରୁ ଗ୍ୟାସ ସିଲିଣ୍ଡରକୁ ସଂଯୋଗ କରୁଥିବା ପାଇପ୍ରେ ନିଆଁ ଲାଗିଯିବାରୁ ନିଆଁ ଦେଖି ଭୟଭୀତ ହୋଇ ଦୁଷ୍ମନ୍ତଙ୍କ ସ୍ତ୍ରୀ ଚିତ୍କାର କରି ବାହାରକୁ ଦୌଡ଼ି ଆସିଥିଲେ। ଚିତ୍କାର ଶୁଣି ପାଖ ପଡ଼ିଶାର ଲୋକମାନେ ଘର ଆଗରେ ଜମା ହବା ସହ ତୁମୁଡିବନ୍ଧ ଅଗ୍ନିଶମ ବାହିନୀକୁ ଫୋନ୍ କରିଥିଲେ। ଖବର ପାଇବା ମାତ୍ରେ ଅଗ୍ନିଶମ ବାହିନୀ ସାହୁଙ୍କ ଘରେ ପହଞ୍ଚିବା ପୂର୍ବରୁ ଗ୍ୟାସ ହାଣ୍ଡିଟି ଫାଟିଯିବାର ଶବ୍ଦ ଶୁଣାଗଲା। ଉପସ୍ଥିତ ଅଗ୍ନିଶମ ବାହିନୀ ଅବିଳମ୍ବେ ଘରେ ପଶି ନିଆଁ ଲିଭାଇବା ଆରମ୍ଭ କରିଥିଲେ। ପ୍ରାୟ ୧ ଘଣ୍ଟା ଧରି ନିଆଁ ଲିଭାଇବା କାର୍ଯ୍ୟ ଜାରି ରଖିବା ପରେ ନିଆଁକୁ ଆୟତ୍ତ କରିଥିଲେ। ଏହା ପରେ ପରିବାର ଲୋକଙ୍କୁ ବାହାରକୁ ଯିବାକୁ କହି କ୍ଷତିଗ୍ରସ୍ତ ହୋଇଥିବା ଆସବାବପତ୍ର ଉଦ୍ଧାର କରିଥିଲେ। ରୋଷେଇ ଘରର ଗ୍ୟାସ୍ ସିଲିଣ୍ଡର ବିସ୍ଫୋରଣ ଫଳରେ ଘରର ଗୋଟିଏ କାନ୍ଥ ଭୁଶୁଡ଼ି ପଡ଼ିବା ସହ ଘରର ଅନେକ ଜାଗାରେ ଫାଟ ହୋଇଥିବା ଦେଖିବାକୁ ମିଳିଛି। କିନ୍ତୁ ଗ୍ୟାସ୍ ସିଲିଣ୍ଡର କିଭଳି ଫାଟିଲା ଏବଂ ସେହି ଗ୍ୟାସ୍ ସିଲିଣ୍ଡରର ଏକ୍ସପାଏରୀ ଡେଟ୍ କ’ଣ ଥିଲା ତାହା ବର୍ତ୍ତମାନ ପର୍ଯ୍ୟନ୍ତ ଜଣାପଡ଼ିନାହିଁ।