ନୀଳଗିରି, ୧୪।୯(ସ୍ବ.ପ୍ର.): ବାଲେଶ୍ୱର ଜିଲାପାଳ ଦତ୍ତାତ୍ରେୟ ଭାଉସାହେବ ଶିନ୍ଦେ ମଙ୍ଗଳବାର ଅଚାନକ ନୀଳଗିରି ଗସ୍ତ କରି ଏନ୍ଏସିର ବିଭିନ୍ନ ଉନ୍ନୟନମୂଳକ କାର୍ଯ୍ୟ ପରିଦର୍ଶନ କରିଛନ୍ତି। ପ୍ରଥମେ ନୀଳଗିରି ଏନ୍ଏସି ରାଡ଼ାର ରାସ୍ତା ପାର୍ଶ୍ୱରେ ଥିବା ଶୁଖିଲା ଓ ଓଦା ବର୍ଜ୍ୟବସ୍ତୁ ପରିଚାଳନା କେନ୍ଦ୍ର ପରିସରରେ ପଡିରହିଥିବା କୁଢ଼ କୁଢ଼ ଅଳିଆ ଆବାର୍ଜନା ପଡ଼ିଥିବା ଦେଖି ବିରକ୍ତି ପ୍ରକାଶ କରିବା ସହ ୬ଘଣ୍ଟା ମଧ୍ୟରେ ପରିଷ୍କାର କରିବାକୁ ବିଭାଗୀୟ ଅଧିକାରୀଙ୍କୁ ନିର୍ଦ୍ଦେଶ ଦେଇଥିଲେ। ପରେ ଏନ୍ଏସିର ନିର୍ମାଣଧୀନ ଭେଣ୍ଡିଂଜୋନ୍, ସ୍ମାର୍ଟ ପାର୍କ ସହ ଥାନା ପଡ଼ିଆରେ ନିର୍ମାଣାଧୀନ ଷ୍ଟାଡ଼ିୟମର ଉନ୍ନୟନମୂଳକ କାର୍ଯ୍ୟ ବୁଲି ଦେଖିବା ପରେ ଆହାର କେନ୍ଦ୍ରର ଭଣ୍ଡାରଗୃହ ଓ ସେଠାକାର ସ୍ବଚ୍ଛତା ବୁଲି ଦେଖିଥିଲେ। ଏହାପରେ ନୀଳଗିରି ଉପଖଣ୍ଡ ମେଡ଼ିକାଲ ପରିସରକୁ ଯାଇ ନିରାମୟ ଓଷଧ କେନ୍ଦ୍ର ଓ ବିଭିନ୍ନ ଉନ୍ନୟନମୂଳକ କାର୍ଯ୍ୟ ବୁଲି ଦେଖିଥିଲେ। ସମ୍ପୂର୍ଣ୍ଣ ହୋଇଥିବା ନୂତନ ମେଡ଼ିକାଲ ବିଲ୍ଡିଂ ଖୁବ୍ଶୀଘ୍ର ଉଦ୍ଘାଟନ ହେବା ନେଇ ସୂଚନା ଦେଇଥିଲେ। ଶେଷରେ ବାଲିଗୋହିରି ରନତ୍ାକର ଟାଉନ ହାଇସ୍କୁଲ ପରିସରରେ ରୂପାନ୍ତରଣ ଅଭିଯାନରେ ଚାଲିଥିବା ଉନ୍ନୟନମୂଳକ କାର୍ଯ୍ୟର ତଦାରଖ କରିବା ସହ ପ୍ରଧାନ ଶିକ୍ଷକ ବିନୋଦ ବିହାରୀ ପଣ୍ଡାଙ୍କ ସହ ଆଲୋଚନା କରିଥିଲେ। ଗସ୍ତ ସମୟରେ ନୀଳଗିରି ଉପଜିଲାପାଳ ଦୀପ୍ତିରଞ୍ଜନ ସେଠୀ, ତହସିଲଦାର ଅଶେଷ ନାୟକ, ନୀଳଗିରି ମେଡିକାଲ ଏସ୍ଡିଏମ୍ଓ ସରୋଜିନୀ ପ୍ରଧାନ, ଏନଏସି କାର୍ଯ୍ୟନିର୍ବାହୀ ଅଧିକାରୀ ଅକ୍ଷୟ କୁମାର ବଡୁ, ପୂର୍ତ୍ତ ବିଭାଗ ଏସ୍ଡିଓ ଦୁର୍ଗାଚରଣ ସାହୁ, କନିଷ୍ଠଯନ୍ତ୍ରୀ ନବଘନ ମାରାଣ୍ଡି, ଅନୁସୂଚିତ ଜାତିର ନୀଳଗିରି ସଭାପତି ଶରତ କୁମାର ଦାସ, କ୍ଷୁଦ୍ର ଜଳସେଚନ ବିଭାଗ ଏସ୍ଡିଓ ନିମାଇଁ ନାୟକ ପ୍ରମୁଖ ଉପସ୍ଥିତ ଥିଲେ।
