ଗଞ୍ଜାମ,୨୭ା୪(ବିଦ୍ୟାଧର ସାହୁ ): ଗଞ୍ଜାମ ସହର କରଣ ସାହି ଷ୍ଟେସନ ରୋଡ଼ସ୍ଥିତ ବାଳିକା ଉଚ୍ଚ ବିଦ୍ୟାଳୟ ଅବ୍ୟବସ୍ଥାରେ ଚାଲିଛି। ୪୬ ବର୍ଷର ଏହି ପୁରାତନ ବିଦ୍ୟାଳୟରେ ଶ୍ରେଣୀଗୃହ ଅଭାବ, ଶିକ୍ଷକ ଅଭାବଜନିତ ସମସ୍ୟା ଛାତ୍ରୀଙ୍କ ପାଡପଢାରେ ପ୍ରଭାବ ପକାଉଛି। ବିଦ୍ୟାଳୟର ଅବ୍ୟବସ୍ଥା ପ୍ରତି କେବେ ଶିକ୍ଷା ବିଭାଗର ଦୃଷ୍ଟି ପଡୁନି। ଏଠି ଆବଶ୍ୟକ ଶ୍ରେଣୀ ଗୃହ ନାହିଁ l ଆଜବେଷ୍ଟ ଘରେ ୪ଟି ଶ୍ରେଣୀରେ ୩୮୫ ଜଣ ଛାତ୍ରୀ ଅଧ୍ୟୟନ କରୁଛନ୍ତି l ଗୋଟିଏ ଶ୍ରେଣୀ ଗୃହରେ ୪୦ ପିଲା ବସିବାକୁ ଥିବା ବେଳେ ଶ୍ରେଣୀ ଗୃହ ଅଭାବରୁ ଗୋଟିଏ ଶ୍ରେଣୀ ଗୃହରେ ୮୦ ଛାତ୍ରୀ ବସି ପାଠ ପଢିବାକୁ ବାଧ୍ୟ ହେଉଛନ୍ତି ବୋଲି ଶିକ୍ଷକ ରବୀନ୍ଦ୍ର ନାଥ ନେପାକ କହିଛନ୍ତି। ଏଥିସହ ବିଦ୍ୟାଳୟ ପାଇଁ ଆବଶ୍ୟକ ଶିକ୍ଷକ ପଦବୀ ପୂରଣ କରାଯାଉନି। ପ୍ରଧାନ ଶିକ୍ଷକ ଦାୟିତ୍ୱରେ ଅନିଲ ପାଣିଗ୍ରାହୀ ରହିିଛନ୍ତି l ସଂସ୍କୃତ ଶିକ୍ଷକ ପ୍ରତିମା ମିଶ୍ର ଏବଂ କଳା ଶିକ୍ଷକ ରାମଚନ୍ଦ୍ର ବେହେରାଙ୍କ ଅବସର ପରେ ତାଙ୍କ ସ୍ଥାନରେ ଆଉ ଶିକ୍ଷକ ନିଯୁକ୍ତି ହୋଇନାହାନ୍ତି। ଫଳରେ ପିଲାମାନେ କଳା ଓ ସଂସ୍କୃତ ପାଠ ପଢ଼ାରୁ ବଞ୍ଚତ୍ତ ହେଉଛନ୍ତି l ଷଷ୍ଠ, ସପ୍ତମ ଓ ଅଷ୍ଟମ ଶ୍ରେଣୀରେ ଦେଢ଼ ଶହରୁ ଊର୍ଦ୍ଧ୍ୱ ଛାତ୍ରୀ ଥିବା ବେଳେ ମାତ୍ର ୩ଜଣ ଶିକ୍ଷକ ରହିଛନ୍ତି। ଫାଇଭ୍-ଟି ସ୍କୁଲ ରୂପାନ୍ତିକରଣ ବେଳେ ସ୍କୁଲ ପରିସରରେ ଥିବା ଗୋଟିଏ ଶ୍ରେଣୀ ଗୃହ ଭାଙ୍ଗା ଯାଇଥିଲା l ମାତ୍ର ଆଉ ନୂତନ ଗୃହ ନିର୍ମାଣ ହେଲାନି l ତେବେ ଗତ ୧୫ ଦିନ ତଳେ ଏନେଇ ଟେଣ୍ଡର ହୋଇଥିବା ସ୍କୁଲ କର୍ତ୍ତୃପକ୍ଷ କହିଛନ୍ତି l ସ୍କୁଲରେ ପାନୀୟ ଜଳ ସମସ୍ୟା ମଧ୍ୟ ରହିଛି l ମଧ୍ୟାହ୍ନ ଭୋଜନ ରୋଷେଇ ପାଇଁ ପାଣି ବାହାରୁ ଆଣିବାକୁ ପଡୁଛି ବୋଲି ଦାୟିତ୍ୱରେ ଥିବା ମହିଳା କହିଛନ୍ତି। ବିଦ୍ୟାଳୟର ସମସ୍ୟା ଦୂର କରିବାକୁ ଜିଲା ପ୍ରଶାସନ ପଦକ୍ଷେପ ନେବାକୁ ଅଭିଭାବକମାନେ ଦାବି କରିଛନ୍ତି।
