ରାୟଗଡ଼ା,୧୦।୮(ଆଶିଷ ରଞ୍ଜନ ପଣ୍ଡା): ରାୟଗଡ଼ା ରେଳ ଷ୍ଟେଶନରେ ଗଞ୍ଜେଇ ଚୋରା ଚାଲାଣ କରୁଥିବା ବେଳେ ଜଣେ ଯୁବକଙ୍କୁ ଆରପିଏଫ୍ ପୋଲିସ ଗିରଫ କରିଛି। ସେ ହେଲେ ହରିୟାଣା ରାଜ୍ୟର ପାନିପତ ଜିଲାର ବିନୋଦ । ତାଙ୍କ ନିକଟରୁ ପୋଲିସ ୪ କିଲୋ ଗଞ୍ଜେଇ ଜବତ କରିଛି । ଯାହାର ଆନୁମାନିକ ମୂଲ୍ୟ ୪୦ ହଜାର ଟଙ୍କା ହେବ ବୋଲି ଜଣାପଡ଼ିଛି ।
ଆରପିଏଫ ସ୍ପେଶାଲ ବ୍ରାଞ୍ଚ ଓ ଡଗ୍ ସ୍କ୍ବାଡ୍ ବୁଲୁଥିବା ବେଳେ ୩ନଂ ପ୍ଲାଟଫର୍ମରେ ଜଣେ ବ୍ୟକ୍ତି ସନ୍ଦେହଜନକ ଅବସ୍ଥାରେ ବୁଲୁଥିଲେ । ଫଳରେ ଟିମ୍ ତାଙ୍କୁ ଅଟକାଇ ପଚରାଉଚୁରା କରିବା ବେଳେ ତାଙ୍କ ନିକଟରୁ ୪ କିଲୋ ଗଞ୍ଜେଇ ଜବତ ହୋଇଥିଲା । ସେ ଜିଲାର କୌଣସି ଏକ ଗ୍ରାମରୁ ଏହି ଗଞ୍ଜେଇ କିଣି ନିଜାମୁଦ୍ଦିନ ନେଇ ଯାଉଥିବା କହିଛନ୍ତି। ଆରପିଏଫ ଗିରଫ ଯୁବକ ଓ ଜବତ ଗଞ୍ଜେଇକୁ ଜିଲା ଅବକାରୀ ବିଭାଗକୁ ହସ୍ତାନ୍ତର କରିଛି । ଏନେଇ ଅବକାରୀ ବିଭାଗ ଏକ ମାମଲା(ନଂ.୭୩/୨୩) ରୁଜୁ କରି ତଦନ୍ତ ଚଳାଇଛି।
