ବ୍ରହ୍ମପୁର ଅଫିସ,୨୨ା୫: ଅପରାଧିକ ମାମଲରେ ଅଭିଯୁକ୍ତ ଗଙ୍ଗା ଦାସ ହତ୍ୟା ମାମଲାର ପର୍ଦ୍ଦାଫାସ କରିଛି ପୋଲିସ। ଗଙ୍ଗାଙ୍କ ଗୁଣ୍ଡାରାଜକୁ ନେଇ ପୁଞ୍ଜିଭୂତ ଅଶାନ୍ତିରୁ ତାଙ୍କୁ ହତ୍ୟା କରାଯାଇଛି। ଏହି ଘଟଣାରେ ପୋଲିସ ୨ ଅଭିଯୁକ୍ତଙ୍କୁ ଗିରଫ କରିଛି। ସେମାନେ ହେଲେ ବାଉରୀ ସୁକୁଣ୍ଡା ଗ୍ରାମର ରିଙ୍କୁ ଦାସ ଓ ଚନ୍ଦନ ଦାସ। ଅଭିଯୁକ୍ତଦ୍ୱୟ ଏକ ବୁଦା ମୂଳେ ଲୁଚାଇ ରଖିଥିବା ରକ୍ତଭିଜା ଖଣ୍ଡା, ସେମାନଙ୍କ ରକ୍ତଭିଜା କପଡ଼ା ଓ ଦୁଇଟି ବାଇକ ପୋଲିସ ଜବତ କରିଛି। ଉଭୟଙ୍କୁ ସେମାବାର କୋର୍ଟ ଚାଲାଣ କରାଯାଇଥିବା ବ୍ରହ୍ମପୁର ଏସପି ଡା. ଶ୍ରବଣା ବିବେକ ଏମ . ସୂଚନା ଦେଇଛନ୍ତି। ହତ୍ୟା ଘଟଣାରେ ସଂପୃକ୍ତ ଥାଇ ଫେରାର ଥିବା ଅନ୍ୟ ଅଭିଯୁକ୍ତ ମହେଶ୍ୱର ଦାସଙ୍କୁ ଖୁବଶୀଘ୍ର ଗିରଫ କରାଯିବ ବୋଲି ସେ କହିଛନ୍ତି।
ପୋଲିସ ସୂଚନା ଅନୁଯାୟୀ, ଗଙ୍ଗାଙ୍କ ନାମରେ ହତ୍ୟା ଓ ହତ୍ୟା ଉଦ୍ୟମ ଭଳି ଦୁଇଟି ମାମଲା ରହିଥିଲା। ସେ ସବୁବେଳେ ଜଣେ ଅଭିଯୁକ୍ତଙ୍କ ସ୍ତ୍ରୀ’ଙ୍କୁ ଅସଦାଚାରଣ କରି ଆସୁଥିଲେ। ତାଙ୍କ ଗୁଣ୍ଡାରାଜ ଓ ମହିଳାଙ୍କୁ ଦୁର୍ବ୍ୟବହାର ଘଟଣାକୁ ନେଇ ଅଭିଯୁକ୍ତମାନଙ୍କ ମଧ୍ୟରେ ଅଶାନ୍ତି ଲାଗି ରହିଥିଲା। ତେଣୁ ସେମାନେ କିଛିଦିନ ତଳେ ଗଙ୍ଗାଙ୍କୁ ହତ୍ୟା ପାଇଁ ଯୋଜନା ପ୍ରସ୍ତୁତ କରିଥିଲେ। ଯୋଜନା ସଫଳ କରିବାକୁ ଅଭିଯୁକ୍ତ ରିଙ୍କୁଙ୍କ ସମ୍ପର୍କୀୟ ମହେଶ୍ୱରଙ୍କ ସହାୟତା ନିଆଯାଇଥିଲା। ସେ ଜୁଗୁଡି ଛକରେ ରହୁଥିଲେ। ଗଙ୍ଗା ସବୁଦିନ ଭଳି ଗତ ୧୧ ତାରିଖରେ କାମ କରୁଥିବା ମହୁଡ଼ାସ୍ଥିତ ଫ୍ୟାକ୍ଟ୍ରିରୁ କାମ ସାରି ଲାଠୀ ଦେଇ ବାଇକରେ ସୁକୁଣ୍ଡା ଫେରୁଥିଲେ। ମହୁଡ଼ାରେ ଛକି ରହିଥିବା ମହେଶ୍ୱର ରିଙ୍କୁଙ୍କୁ ଏହା ଜଣାଇଥିଲେ। ରିଙ୍କୁ ଓ ଚନ୍ଦନ ବାଟରେ ତାଙ୍କୁ ଜଗି ରହିଥିଲେ। ସୁକୁଣ୍ଡା ରାସ୍ତାରେ ଯିବା ପୂର୍ବରୁ ସେମାନେ ଗଙ୍ଗାଙ୍କ ବାଇକ ଅଟକାଇବା ପରେ ଗୋଡାଇ ଗୋଡାଇ ହାଣି ହତ୍ୟା କରିଥିଲେ। ପରେ ପ୍ରମାଣ ନଷ୍ଟ ପାଇଁ ଅଭିଯୁକ୍ତଦ୍ୱୟ ମୃତଦେହକୁ ରାସ୍ତାକଡ଼ ବିଲ ମଧ୍ୟରେ ଫୋପାଡ଼ି ଦେଇଥିଲେ। ସୂଚନାଯୋଗ୍ୟ, ଗଙ୍ଗା ଗତ ୧୧ ତାରିଖରେ ତାଙ୍କ ସ୍ତ୍ରୀ ପୁଷ୍ପାଙ୍କୁ ଫୋନ୍ କରି ରାତି ୧୦ଟାରେ ଘରକୁ ଫେରିବେ ବୋଲି କହିଥିଲେ। କିନ୍ତୁ ରାତି ୧୨ଟା ପର୍ଯ୍ୟନ୍ତ ସେ ନ ଫେରିବାରୁ ଗଙ୍ଗାଙ୍କୁ ପୁଷ୍ପା ବାରମ୍ବାର ଫୋନ୍ କରିଥିଲେ ମଧ୍ୟ ସେ ଉଠାଉ ନଥିଲେ। ୧୨ ତାରିଖ ସକାଳେ ବିଲରେ ଗଙ୍ଗାଙ୍କ ମୃତଦେହ ପଡ଼ିଥିବା ଖବରପାଇ ସଦର ଥାନା ପୋଲିସ ସେଠାରେ ପହଞ୍ଚିଥିଲା। ସେଠାରୁ ଗଙ୍ଗାଙ୍କ ମୋବାଇଲ ଫୋନ ଏବଂ ବାଇକ ପୋଲିସ ଜବତ କରିଥିଲା। ପୁଷ୍ପାଙ୍କ ଅଭିଯୋଗ ଅନୁଯାୟୀ ପୋଲିସ ୨୫୮/୨୩ ରେ ଏକ ମାମଲା ରୁଜୁ କରି ତଦନ୍ତ ଚଳାଇଥିଲା।
