ସାଲେପୁର,୩ା୮(ଅରବିନ୍ଦ ଭୂୟାଁ): କଟକ ଜିଲା ସମେତ ଓଡ଼ିଶାର ଭିଭିନ୍ନ ଜିଲାରେ ଡକାୟତି ମାମଲା ଘଟାଇ ଫେରାର ହୋଇଯାଉଥିବା ଡକାୟତି ଦଳକୁ କଟକ ଜିଲା ଗ୍ରାମାଞ୍ଚଳ ପୋଲିସ ଗିରଫ କରିବାରେ ସକ୍ଷମ ହୋଇଛି। କଟକ ଜିଲାର ସାଲେପୁର, ନିଶ୍ଚିନ୍ତକୋଇଲି, ମାହାଙ୍ଗା ଓ ନେମାଳ ଅଞ୍ଚଳରେ ହୋଇଥିବା ଡକାୟତି ଘଟଣାର ତଦନ୍ତ ଆରମ୍ଭ କରି ପୋଲିସ ଏହି ଡକାୟତ ଦଳକୁ ଗିରଫ କରିବା ସହ ସେମାନଙ୍କ ନିକଟରୁ ୩୩ ଗ୍ରାମ ସୁନା ଓ ୧କେଜି ୧୫୦ ଗ୍ରାମ ରୁପା ଅଳଙ୍କାର, ୧୦ ହଜାର ନଗଦ ଟଙ୍କା, ଏକ ମହିନ୍ଦ୍ରା କାର୍, ୩ଟି ବଜାଜ ପଲସର ଗାଡ଼ି, ଏକ ବନ୍ଧୁକ ଦୁଇଟି ଜୀବନ୍ତ ଗୁଳି, ତିନୋଟି ଫୋନ୍, ଗୋଟିଏ ଚାପଡ଼ ଜବତ କରିଥିବାବେଳେ ଏହିସବୁ ଘଟଣାର ମୁଖ୍ୟ ଅଭିଯୁକ୍ତ ଗଞ୍ଜାମ ଜିଲାର ବୁଗୁଡ଼ାର ତୋଫାନ ବିଷୋୟୀ, କେନ୍ଦ୍ରାପଡ଼ା ଜିଲା ପଟ୍ଟାମୁଣ୍ଡାଇର ସନ୍ତୋଷ ମଲ୍ଲିକ, ଜଗତସିଂହପୁର ଜିଲା କୁଜଙ୍ଗର ପ୍ରଭାତ ମଲ୍ଲିକଙ୍କୁ ଗିରଫ କରାଯାଇଛି। ସେମାନଙ୍କଠାରୁ ଚୋରା ଅଳଙ୍କାର କିଣିଥିବା ଭୁବନେଶ୍ୱର ଥାନା ମତିପରିଲ ଅଞ୍ଚଳର ଦିବ୍ୟଜ୍ୟୋତି ନାୟକଙ୍କୁ ପୋଲିସ ଗିରଫ କରିଥିବାର ଆଜି ସାଲେପୁର ଥାନା ପରିସରରେ ଥିବା ଏକ ଖବରଦାତା ସମ୍ମିଳନୀରେ ଗ୍ରାମାଞ୍ଚଳ ଏସ୍ପି ପ୍ରତୀକ ସିଂହ ପ୍ରକାଶ କରିଛନ୍ତି। ଗିରଫ ଅଭିଯୁକ୍ତମାନେ ଯାଜପୁର, କଟକ, କେନ୍ଦ୍ରାପଡ଼ାରେ ଅପରାଧ ଘଟାଇ ଫେରାର ହୋଇଯାଇଥିଲେ।
