ନୂଆଦିଲ୍ଲୀ,୧୨ା୭: ଗୌତମ ଗମ୍ଭୀର ଭାରତୀୟ କ୍ରିକେଟ ଦଳର କୋଚ୍ ନିଯୁକ୍ତ ହୋଇଥିଲା ବେଳେ ବୋଲିଂ କୋଚ୍ ଦୌଡ଼ରେ ଦକ୍ଷିଣ ଆଫ୍ରିକାର ପୂର୍ବତନ ବୋଲର ମର୍ଣ୍ଣି ମର୍କେଲଙ୍କ ନାଁ ସାମ୍ନାକୁ ଆସିଛି। ପୂର୍ବରୁ ତାଙ୍କର କୋଚିଂ ଅଭିଜ୍ଞତା ମଧ୍ୟ ରହିଛି। ଗତବର୍ଷ ଦିନିକିଆ ବିଶ୍ୱକପ ସମୟରେ ସେ ପାକିସ୍ତାନ ଦଳର ବୋଲିଂ କୋଚ୍ ଥିଲେ, କିନ୍ତୁ ତାଙ୍କର ଚୁକ୍ତି ମିଆଦ ଶେଷ ହେବା ପୂର୍ବରୁ ସେ ତାଙ୍କ ପଦରୁ ଇସ୍ତଫା ଦେଇଥିଲେ।
କ୍ରିକବଜ ରିପୋର୍ଟ ଅନୁଯାୟୀ ମର୍କେଲଙ୍କୁ ବୋଲିଂ କୋଚ୍ କରିବା ଉପରେ ବିଚାର କରିବା ପାଇଁ ଗମ୍ଭୀର ବିସିସିଆଇକୁ ଅନୁରୋଧ କରିଛନ୍ତି। ମର୍ଣ୍ଣି ମର୍କେଲ ଦକ୍ଷିଣ ଆଫ୍ରିକା ପାଇଁ ୨୦୦୬ରୁ ୨୦୧୮ ମଧ୍ୟରେ ୮୬ ଟେଷ୍ଟ, ୧୧୭ ଦିନିକିଆ ଏବଂ ୪୪ ଟି୨୦ ଖେଳିଛନ୍ତି। ବର୍ତମାନ ଅଷ୍ଟ୍ରେଲିଆରେ ରହୁଥିବା ମର୍କେଲଙ୍କ ସହିତ ବିସିସିଆଇ କିଛି ଆଲୋଚନା କରିଥିବା କୁହାଯାଉଛି।
ଦୁହେଁ ଗମ୍ଭୀର ଏବଂ ମର୍କେଲ ପୂର୍ବରୁ ଆଇପିଏଲ ଟିମ୍ ଲକ୍ଷ୍ନୌ ସୁପର ଜାଏଣ୍ଟସରେ ଏକାଠି ଦୁଇ ବର୍ଷ ପାଇଁ କାମ କରିଛନ୍ତି। ତେବେ ଭାରତୀୟ ଦଳର କୋଚ୍ ପଦବୀ ପାଇଁ ଲକ୍ଷ୍ମୀପତି ବାଲାଜୀ ଏବଂ ବିନୟ କୁମାରଙ୍କ ସମେତ ଅନେକ ନାଁ ଚର୍ଚ୍ଚାରେ ରହିଛି। ରିପୋର୍ଟ ଅନୁଯାୟୀ ବିସିସିଆଇ ଜାହିର ଖାନଙ୍କୁ ଏହି ପଦବୀ ପାଇଁ ପ୍ରସ୍ତାବ ଦେଇଛି। ତେବେ ବିସିସିଆଇ ଏହାର ନିଷ୍ପତ୍ତି ଖୁବଶୀଘ୍ର ଜଣାଇବ।
