ନୂଆଦିଲ୍ଲୀ, ୨୨।୧୧: ସାଉଦି ଆରବ ଅଧ୍ୟକ୍ଷତାରେ ଅନୁଷ୍ଠିତ ୧୫ତମ ଜି୨୦ ସମିଟ୍ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶନିବାର ଭିଡିଓ କନ୍ଫରେନ୍ସ ଜରିଆରେ ଯୋଗଦେଇଛନ୍ତି। ‘ସମସ୍ତଙ୍କ ପାଇଁ ଏକବିଂଶ ଶତାବ୍ଦୀର ସୁଯୋଗ ବୁଝିବା’ ସମିଟ୍ର ମୁଖ୍ୟ ପ୍ରସଙ୍ଗ ରହିଛି। ସାଉଦି ରାଜା ସଲମାନ ଏହାର ଉଦ୍ଘାଟନ କରିଥିଲେ। ଦ୍ୱିତୀୟ ବିଶ୍ୱଯୁଦ୍ଧ ପରେ କରୋନା ମହାମାରୀ ବିଶ୍ୱ ପାଇଁ ସବୁଠୁ ବଡ଼ ଚ୍ୟାଲେଞ୍ଜ ବୋଲି ଅଭିହିତ କରି ପ୍ରଧାନମନ୍ତ୍ରୀ ନିର୍ଣ୍ଣାୟକ ପଦକ୍ଷେପ ନେବା ଲାଗି ବିଶ୍ୱ ନେତାମାନଙ୍କୁ ଆହ୍ବାନ ଦେଇଥିଲେ। କେବଳ ଅର୍ଥନୀତିରେ ସୁଧାର, ନିଯୁକ୍ତି ଓ ବାଣିଜ୍ୟ ମଧ୍ୟରେ ସୀମିତ ନ ରହି ପୃଥିବୀର ସୁରକ୍ଷାକୁ ଗୁରୁତ୍ୱ ଦେବାକୁ ହେବ। କୋଭିଡ୍ ପରବର୍ତ୍ତୀ ବିଶ୍ୱ ପାଇଁ ଏକ ନୂଆ ସୂଚକାଙ୍କ ପ୍ରସ୍ତୁତି ନିମନ୍ତେ ପ୍ରଧାନମନ୍ତ୍ରୀ ପ୍ରସ୍ତାବ ଦେଇଥିଲେ। ଏଥିରେ ୪ଟି ମୁଖ୍ୟ ପ୍ରସଙ୍ଗ ରହିବ। ସେଗୁଡ଼ିକ ହେଲା ବିଶାଳ ଟ୍ୟାଲେଣ୍ଟ ପୁଲ୍ ସୃଷ୍ଟି, ସମାଜର ସବୁ ଭାଗରେ ଯେପରି ପ୍ରଯୁକ୍ତି ପହଞ୍ଚତ୍ବ ତାହା ନିଶ୍ଚିତ କରିବା, ସରକାରୀ ବ୍ୟବସ୍ଥାରେ ସ୍ବଚ୍ଛତା ଏବଂ ଟ୍ରଷ୍ଟିଶିପ୍ ମନୋଭାବ ନେଇ କାର୍ଯ୍ୟ କରିବା। କୋଭିଡ୍ ପରବର୍ତ୍ତୀ ବିଶ୍ୱରେ ଯେକୌଣସି ସ୍ଥାନରୁ କାର୍ଯ୍ୟ କରିବା ସାଧାରଣ ଘଟଣା ହୋଇଛି। ସେଥିଲାଗି ଜି-୨୦ ଭର୍ଚୁଆଲ ସଚିବାଳୟ ପାଇଁ ପ୍ରଧାନମନ୍ତ୍ରୀ ପ୍ରସ୍ତାବ ଦେଇଥିଲେ।
