ଜି.ଉଦୟଗିରି,୧୯।୧(ଶିଶିର ପଟ୍ଟନାୟକ): ହାଡ଼ ଭଙ୍ଗା ଶୀତରେ ଥରୁଛି ରାଜ୍ୟର ଶୀତଳ ସହର ଭାବେ ପରିଚିତ ଜି.ଉଦୟଗିରି । ରବିବାର ଏଠାରେ ସର୍ବନିମ୍ନ ତାପମାତ୍ରା ୪. ୮ ଡିଗ୍ରୀ ସେଲସିୟସ ରେକର୍ଡ କରଯାଇଛି। ସେହିପରି ଶନିବାର ସହରର ସର୍ବନିମ୍ନ ତାପମାତ୍ରା ୫ ଡିଗ୍ରୀ ରହିଥିବା ବେଳେ ଶୁକ୍ରବାର ୬ ଡିଗ୍ରୀ ସେଲସିୟସ ରହିଥିଲା। ପ୍ରବଳ ଶୀତର ମଜା ନେବା ପାଇଁ ଏଠାରେ ବାହାର ପର୍ଯ୍ୟଟକମାନଙ୍କ ଭିଡ଼ ଲାଗି ରହୁଛି । ନିକଟରେ କାଲିଗାଡୁ ହିଲଟପ୍ର ବିକାଶ ଓ ସିରିକି ପାର୍କ ଓ ଡ୍ୟାମ୍ର ବିକାଶ ପାଇଁ ପଞ୍ଚାୟତରାଜ ମନ୍ତ୍ରୀ ରବି ନାୟକଙ୍କ ଗସ୍ତ ବେଳେ ଅଞ୍ଚଳ ବାସୀ ପ୍ରସ୍ତାବ ଦେଇଥିଲେ । ଏସବୁ ପର୍ଯ୍ୟଟନସ୍ଥଳୀ ଗୁଡିକର ବିକାଶ ହୋଇ ପାରିଲେ ପର୍ଯ୍ୟଟନ କ୍ଷେତ୍ରରୁ ଅଞ୍ଚଳ ବାସିନ୍ଦା ଲାଭବାନ ହୋଇ ପାରିବେ ବୋଲି କହିଥିଲେ । ଅନ୍ୟପଟେ ଘନ କୁହୁଡ଼ି ଓ ପ୍ରବଳ ଥଣ୍ଡା ଲାଗିରହିଥିବା ଯୋଗୁ ଜନ ଜୀବନ ପ୍ରଭାବିତ ହେଉଛି। ଅନେକେ ଲୋକେ ଥଣ୍ଡା, ସର୍ଦ୍ଦି, ଜ୍ୱରରେ ପୀଡ଼ିତ ହେଉଥିବା ଦେଖାଯାଉଛି।
