ଦାରିଙ୍ଗବାଡି,୨।୧୧(ଅରୁଣ ସାହୁ ): କନ୍ଧମାଳ ଜିଲା ଦାରିଙ୍ଗବାଡି ବ୍ଲକରେ ମାଣ୍ଡିପାଙ୍କାରେ ଖାଦ୍ୟ ଅଭାବରୁ ଲୋକେ ଆମ୍ବ ଟାକୁଆ ଖାଇ ୨ ଜଣଙ୍କ ମୃତ୍ୟୁ ଘଟିଥିବା ବେଳେ ୬ ଜଣ ଏବେ ମଧ୍ୟ ଗୁରୁତର ଅବସ୍ଥାରେ ବ୍ରହ୍ମପୁର ବଡ଼ ମେଡିକାଲରେ ଚିକିତ୍ସାଧୀନ ଅଛନ୍ତି । ଶନିବାର ଘଟଣାର ଅନୁଧ୍ୟାନ କରିବା ପାଇଁ ଜି. ଉଦୟଗିରି ବିଧାୟକ ପ୍ରଫୁଲ ପ୍ରଧାନ ମାଣ୍ଡିପଙ୍କାରେ ପହଞ୍ଚିଛନ୍ତି। ସେ ସେଠାକାର ସ୍ଥିତି ଅନୁଧ୍ୟାନ କରିବା ସହ ଉକ୍ତ ଅଞ୍ଚଳରେ ସଠିକ ସମୟରେ ଚାଉଳ ମିଳି ନ ଥିବାରୁ ଲୋନେ ଆମ୍ବ ଟାକୁଆକୁ ଖାଦ୍ୟ ଭାବେ ଖାଇଥିବା କହିଛନ୍ତି। ଏହା ସହ ବ୍ରାହ୍ମଣୀଗାଁକୁ ବ୍ଲକ ଭାବେ ଘୋଷଣା କରିବାକୁ ସେ ରାଜ୍ୟ ସରକାରଙ୍କ ନିକଟରେ ଦାବି ଜଣାଇଥିବା ବେଳେ ପୁଣି ଦାବି ଦୋହରାଇବେ ବୋଲି କହିଛନ୍ତି।
ଅନ୍ୟପକ୍ଷେ ଏବେବି ଉକ୍ତ ଅଞ୍ଚଳରେ ଲୋକେ ଆମ୍ବ ଟାକୁଆ ଖାଉଛନ୍ତି। ଭୋକ ପାଇଁ ଆମ୍ବ ଟାକୁଆ ଖାଇବା ପାଇଁ ବାଧ୍ୟ ହେଉଛୁ ବୋଲି ଗ୍ରାମର ମହିଳା ମାନେକହିଛନ୍ତି। ଉକ୍ତ ଗ୍ରାମର ଏକାଧିକ ଲୋକଙ୍କ ଅଭିଯୋଗ ସେମାନଙ୍କୁ ଏବେ ପର୍ଯ୍ୟନ୍ତ ପିଡିଏସ୍ ଚାଉଳ ମିଳିନାହିଁ ଫଳରେ ଯେତିକି ଚାଉଳ ପୂର୍ବରୁ ମିଳିଥିଲା ତାହା ଅନେକ ପରିବାର ଗହଳି ଯୋଗୁ ଖାଇ ସାରିଦେଇଛୁ। ସରକାର ଅଧିକ ଚାଉଳ ଦେବାକୁ ସେମାନେ ଦାବି କରିଛନ୍ତି।
