କର୍ଲାମୁଣ୍ଡା,୨।୬(ଡିଏନଏ): ଯୁକ୍ତ ଦୁଇ ବିଜ୍ଞାନ ପରୀକ୍ଷାରେ ଭଲ ନମ୍ବର ରଖି କୃତକାର୍ଯ୍ୟ ହୋଇଥିବା ଜଣେ ଛାତ୍ରଙ୍କ ଉଚ୍ଚ ଶିକ୍ଷା ପାଇଁ ଅର୍ଥ ବାଧକ ସାଜିିଛି। ସୂଚନାଯୋଗ୍ୟ, କଳାହାଣ୍ଡି ଜିଲା କର୍ଲାମୁଣ୍ଡା ବ୍ଲକ ରାଜପୁର ପଞ୍ଚାୟତ ରାଜପୁର ଗାଁର ହେମଲତା ମାଝୀଙ୍କ ପୁଅ ଲଳିତ ମାଝୀ ଚଳିତ ଯୁକ୍ତ ଦୁଇ ବିଜ୍ଞାନ ପରୀକ୍ଷାରେ ୫୩୯ ମାର୍କ ରଖି କୃତକାର୍ଯ୍ୟ ହୋଇଛନ୍ତି। ତେବେ ଡାକ୍ତରୀ ପାଠ ପଢିବା ପାଇଁ ଆଗ୍ରହ ରଖି ଥିବା ଲଳିତଙ୍କ ପାଇଁ ଅର୍ଥ ଏବେ ପ୍ରତିବନ୍ଧକ ସାଜିଛି। ୨୦୦୬ ମସିହାରେ ଲଳିତଙ୍କ ଜନ୍ମ ପରେ ତାଙ୍କ ବାପା, ମାଆ ଏବଂ ଦୁଇ ପୁଅଙ୍କୁ ଛାଡି ଚାଲି ଯାଇଥିଲେ। ଫଳରେ ବହୁ କଷ୍ଟରେ ମାଆ ହେମଲତା ପୁଅକୁ କର୍ଲାମୁଣ୍ଡା ସ୍ଥିତ ପଞ୍ଚାୟତ ସମିତି ହାଇସ୍କୁଲରେ ମାଟ୍ରିକ ପର୍ଯ୍ୟନ୍ତ ପଢାଇଥିଲେ। ମାଟ୍ରିକ ପରୀକ୍ଷାରେ ଲଳିତ ୮୦ପ୍ରତିଶତରୁ ଅଧିକ ନମ୍ବରରେ ପାସ୍ କରିଥିଲେ। ପରେ ସେ ଯୁକ୍ତ ଦୁଇ ବିଜ୍ଞାନ ପଢିବାକୁ ଇଛା ରଖିଥିଲେ ହେଁ ଅର୍ଥ ବାଧକ ସାଜିଥିଲା। କିନ୍ତୁ ମେଧାବୀ ଲଳିତଙ୍କର ଆଗ୍ରହ ଦେଖି ପଞ୍ଚାୟତ ସମିତି ହାଇସ୍କୁଲର ବିଜ୍ଞାନ ଶିକ୍ଷକ ପୂର୍ଣ୍ଣ ଚନ୍ଦ୍ର ରାଉତ ସହଯୋଗ ପାଇଁ ଆଗେଇ ଆସିଥିଲେ। ବଲାଙ୍ଗୀର ସ୍ଥିତ ଗାୟିତ୍ରୀ ଆବାସିକ ବିଦ୍ୟାଳୟର ଅଧ୍ୟକ୍ଷଙ୍କୁ ଯୋଗାଯୋଗ କରି ମାଗଣାରେ ଯୁକ୍ତ ଦୁଇ ବିଜ୍ଞାନ ପାଠ ଗାୟତ୍ରୀ ରେ ଲଳିତ କୁ ପଢ଼ିବାର ବ୍ୟବସ୍ଥା କରିଦେଇଥିଲେ। ଯୁକ୍ତ ଦୁଇରେ ଲଳିତ ଶତକଡ଼ା ୮୯.୮୩ମାର୍କ ରଖି ପାସ କରିଛନ୍ତି। ତେବେ ବର୍ତମାନ ସେ ଏକ ଭଲ ଶିକ୍ଷାନୁଷ୍ଠାନରେ ମେଡିକାଲ କୋଚିଂ ନେବାକୁ ଇଛା ରଖିଛନ୍ତି। ହେଲେ ଅର୍ଥ ହିଁ ତାର ଇଛା ଓ ଭବିଷ୍ୟତ ଆଗରେ ପ୍ରତିବନ୍ଧକ ହୋଇ ଠିଆ ହୋଇଛି। ଏ ଦିଗରେ ଏହି ଆଦିବାସୀ ମେଧାବୀ ଛାତ୍ର ପାଇଁ ସରକାର କିମ୍ବା କେଉଁ ସମାଜସେବୀ ଆଗେଇ ଆସି ସହଯୋଗର ହାତ ବଢାଇଲେ ଅନ୍ତତଃ ତାଙ୍କର ଇଛା ଫଳବତୀ ହୋଇପାରନ୍ତା ବୋଲି ମତପ୍ରକାଶ ପାଇଛି ।
