ବାଣପୁର,୨୮।୯(ଡି.ଏନ୍.ଏ.): କଲେଜରେ ନାଁ ଲେଖାଇ ଦେବା ଓ ପରୀକ୍ଷାରେ ଉତ୍ତୀର୍ଣ୍ଣ କରାଇ ଦେବା ପ୍ରତିଶ୍ରୁତି ଦେଇ ୧ଲକ୍ଷ ଟଙ୍କା ଠକିନେବା ଅଭିଯୋଗରେ ସୋମବାର ବାଣପୁର ପୋଲିସ ଜଣେ ଅଧ୍ୟାପକଙ୍କୁ ଗିରଫ କରି କୋର୍ଟଚାଲାଣ କରିଛି। ସେ ହେଲେ ମନୋଜ ମହାନ୍ତି। ଅଭିଯୋଗ ମୁତାବକ, ବାଣପୁର ଥାନା ଅଧୀନ ନରେନ୍ଦ୍ରପୁର ଗ୍ରାମର ଉମାକାନ୍ତ ଛୋଟରାୟଙ୍କ ପୁଅ ରଞ୍ଜିତ କୁମାର ୨୦୦୧ରେ ମାଟ୍ରିକ ପରୀକ୍ଷାରେ ଉତ୍ତୀର୍ଣ୍ଣ ହୋଇ +୨ରେ ପାଠ ପଢୁଥିଲେ। ତେବେ ବେଙ୍ଗାଲୁରୁସ୍ଥିତ ଏକ ଘରୋଇ କମ୍ପାନୀରେ ତାଙ୍କର ଚାକିରି ହୋଇଯିବାରୁ ରଞ୍ଜିତ ପାଠପଢା ଅଧାରୁ ଛାଡି ବେଙ୍ଗାଲୁର ପଳାଇଥିଲେ। ୨୦୧୮ରେ ଚାକିରିରେ ପଦୋନ୍ନତି ପାଇଁ +୨ ଶିକ୍ଷାଗତ ଯୋଗ୍ୟତା ଆବଶ୍ୟକ ଥିବାରୁ ଏନେଇ ପରିବାର ଲୋକଙ୍କୁ ଜଣାଇଥିଲେ। ଏନେଇ ରଞ୍ଜିତଙ୍କ ମା’ଶାନ୍ତିଲତା ନାଚୁଣି କଲେଜରେ କାର୍ଯ୍ୟରତ ଅଧ୍ୟାପକ ମନୋଜ ମହାନ୍ତିଙ୍କ ସହ ଯୋଗାଯୋଗ କରିଥିଲେ। କଲେଜରେ ନାମ ଲେଖାଇ ଦେବା ସହ ପରୀକ୍ଷାରେ ଉତ୍ତୀର୍ଣ୍ଣ କରାଇ ଦେବା ପାଇଁ ମନୋଜ ପ୍ରତିଶ୍ରୁତି ଦେଇ ବିଭିନ୍ନ କିସ୍ତିରେ ଶାନ୍ତିଲତାଙ୍କ ଠାରୁ ୧ଲକ୍ଷ ଟଙ୍କା ନେବା ସହ କଲେଜର ତିନୋଟି ଜାଲ୍ ରସିଦ ପ୍ରଦାନ କରିଥିଲେ। ତେବେ ଦୁଇ ବର୍ଷ ବିତିଯିବା ପରେ ମଧ୍ୟ ପରୀକ୍ଷା ହୋଇ ନାହିଁ ବୋଲି ମଥ୍ୟା ପ୍ରତିଶ୍ରୁତି ଦେଇ ଶାନ୍ତିଲତାଙ୍କୁ ଭଣ୍ଡାଇ ଚାଲିଥିଲେ। ତେବେ ୫ମାସ ପୂର୍ବେ +୨ ପରୀକ୍ଷା ଫଳ ଘୋଷଣା ହୋଇ ସାରିଥିବା ଶାନ୍ତିଲତା ଜାଣିବା ପରେ ମନୋଜଙ୍କୁ ଟଙ୍କା ଫେରାଇବା ଲାଗି କହିଥିଲେ। ଟଙ୍କା ଫେରାଇବା ବଦଳରେ ମନୋଜ ତାଙ୍କୁ ଗାଳିଗୁଲଜ କରିବା ସହ ଧମକ ଦେଇଥିଲେ ବୋଲି ଶାନ୍ତିଲତା ଥାନାରେ ଅଭିଯୋଗ କରିଥିଲେ। ଅଭିଯୋଗକୁ ଭିତ୍ତିକରି ପୋଲିସ ଏକ ମାମଲା ରୁଜୁକରି ମନୋଜଙ୍କୁ ଗିରଫ କରିଥିଲା।
