ଢେଙ୍କାନାଳ,୨୧ା୭(ରତନ ନାୟାର): ସୁଭଦ୍ରା ଯୋଜନାରେ ଟଙ୍କା ମିଳିବ ବୋଲି କହି ଢେଙ୍କାନାଳ ଭଗବାନପୁର ଅଞ୍ଚଳର ବାପପୁଅ ସେଠାକାର ୨ଜଣ ମହିଳାଙ୍କୁ ଠକେଇ କରିଥିବା ଶନିବାର ଟାଉନ ଥାନାରେ ଅଭିଯୋଗ ହୋଇଛି। ଠକେଇର ଶିକାର ହୋଇଥିବା ୨ ଅଭିଯୋଗକାରୀ ହେଲେ ସହରସ୍ଥିତ ରାମେଶ୍ୱରପୁର ଅଞ୍ଚଳର ସ୍ବାମୀହରା ମହିଳା ମୀନା ରାୟ ଓ ସାଗର ନାୟକ(୩୬)।
ଅଭିଯୋଗରେ ମୀନା ଓ ସାଗର ଦର୍ଶାଇଛନ୍ତି, ଅଭିଯୁକ୍ତ ବାପପୁଅ ସେମାନଙ୍କୁ ପ୍ରଲୋଭନ ଦେଖାଇ ଢେଙ୍କାନାଳ ଚନ୍ଦନ ବଜାର ଠାରେ ଥିବା ଏକ ବ୍ୟାଙ୍କରେ ଆକାଉଣ୍ଟ ଖୋଲାଇଥିଲେ। ଏହାପରେ ବ୍ୟାଙ୍କରୁ ମିଳିଥିବା ଚେକ୍ ବହି, ଏଟିଏମ୍କୁ ଅଭିଯୁକ୍ତ ବାପପୁଅ ନିଜ ପାଖରେ ରଖିଥିଲେ। କିଛିଦିନ ତଳେ ମୀନାଙ୍କ ଆକାଉଣ୍ଟକୁ ବହୁତ ଟଙ୍କା ଆସିଥିବା ନେଇ ବ୍ୟାଙ୍କ ପକ୍ଷରୁ ଏକ ନୋଟିସ ଆସିଥିଲା। ସେହିପରି ଅନ୍ୟତମ ଅଭିଯୋଗକାରୀ ସାଗର ନାୟକଙ୍କ ଆକାଉଣ୍ଟଙ୍କୁ ୧ କୋଟି ୭୫ ଲକ୍ଷ ୮୮ ହଜାର ୪୨୮ ଟଙ୍କା ଆସିଥିବାରୁ ବ୍ୟାଙ୍କ କର୍ତ୍ତୃପକ୍ଷ ତାଙ୍କୁ ମଧ୍ୟ ନୋଟିସ୍ କରିଛନ୍ତି। ଦିଲ୍ଲୀ ଏସିପି ସାଇବର ସେଲ୍-୧ ପକ୍ଷରୁ ନଂ. ୨୮୪/୨୪ ତା ୨୮ା୦୬ା୨୦୨୪ରେ ମିଳିଥିବା ପତ୍ର ଅନୁଯାୟୀ ଉଭୟ ଆକାଉଣ୍ଟଧାରୀଙ୍କୁ ଢେଙ୍କାନାଳ ଚନ୍ଦନବଜାର ଠାରେ ଥିବା ଫେଡେରାଲ ବ୍ୟାଙ୍କ କର୍ତ୍ତୃପକ୍ଷ ଏହି ନୋଟିସ କରିବା ସହିତ ବ୍ୟାଙ୍କ ଟ୍ରାଞ୍ଜାକ୍ସନ ଓ ଆକାଉଣ୍ଟ ବନ୍ଦ କରାଯିବ ବୋଲି ଜଣାଇଛନ୍ତି। ଏହି ନୋଟିସ୍ ପାଇବା ପରେ ଅଭିଯୋଗକାରୀ ମୀନା ଓ ସାଗର ବ୍ୟାଙ୍କକୁ ଯାଇ ବୁଝିବାରୁ ସେମାନଙ୍କ ଆକାଉଣ୍ଟକୁ ଆସିଥିବା ଟଙ୍କା କେହି ଉଠାଇ ନେଇଥିବା ଜାଣିବାକୁ ପାଇଛନ୍ତି। ସେମାନଙ୍କ ଆକାଉଣ୍ଟରେ ଏତେ ପରିମାଣର ଅର୍ଥ କେଉଁଠୁ ଆସିଲା ତାହା ଜାଣି ନ ଥିବା ଦୁହେଁ ଗଣମାଧ୍ୟମକୁ କହିନ୍ତି। ଏ ସମ୍ପର୍କରେ ଫେଡେରାଲ ବ୍ୟାଙ୍କ ଶାଖା ପରିଚାଳକ ଲିପିଶ୍ରୀ ମହାନ୍ତି କହିଛନ୍ତି, ଆକାଉଟଣ୍ଟ ଖୋଲିଥିବା ମହିଳା କିମ୍ବା ପୋଲିସ ତଥ୍ୟ ମାଗିଲେ ବ୍ୟାଙ୍କ ପକ୍ଷରୁ ସେମାନଙ୍କୁ ଷ୍ଟେଟ୍ମେଣ୍ଟ ଦିଆଯିବ। ଯେଉଁମାନେ ଆକାଉଣ୍ଟ ଖୋଲୁଛନ୍ତି, ସେମାନଙ୍କୁ ପାସ୍ବୁକ ଓ ଆକାଉଣ୍ଟ ଜନିତ ତଥ୍ୟ, ଏଟିଏମ୍ ନମ୍ବର ଓ ଚେକ୍ବୁକ୍ କାହାକୁ ନ ଦେବାକୁ ବାରମ୍ବାର କୁହାଯାଉଛି। ଅଭିଯୋଗକାରୀ ସେମାନଙ୍କ ଆକାଉଣ୍ଟ ନମ୍ବର ଆଣିଦେଲେ ତାହାକୁ ଯାଞ୍ଚ କରାଯିବ। ଟାଉନ ଥାନା ଅଧିକାରୀ ପ୍ରଭାତ କୁମାର ସାହୁ କହିଛନ୍ତି, ଠକେଇ ସମ୍ପର୍କିତ ଅଭିଯୋଗ ମିଳିଛି। କିନ୍ତୁ ସେଥିରେ କୌଣସି ଆକାଉଣ୍ଟ ନମ୍ବର କିମ୍ବା ତଥ୍ୟ ନାହିଁ, ତେଣୁ ମାମଲା ରୁଜୁ ହୋଇପାରିନାହିଁ। ଅଭିଯୁକ୍ତଙ୍କୁ ଆଣି ପଚରାଉଚରା କରାଯିବ। ଆକାଉଣ୍ଟ ନମ୍ବର ମିଳିଲେ ବ୍ୟାଙ୍କ ଷ୍ଟେଟମେଣ୍ଟ ଯାଞ୍ଚ କରିବା ପରେ ପରବର୍ତ୍ତୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଥାନା ଅଧିକାରୀ କହିଛନ୍ତି।
