ନୂଆଦିଲ୍ଲୀ,୧୯।୨: ରାଜଧାନୀ ଦିଲ୍ଲୀରେ ଭାଜପା ଏବେ ପର୍ଯ୍ୟନ୍ତ ମୁଖ୍ୟମନ୍ତ୍ରୀ କିଏ ହେବେ ତାହା ଫାଇନାଲ କରିନାହିଁ। ଏପଟେ କିନ୍ତୁ ଚର୍ଚ୍ଚା ହେଲାଣି ଏଠି ୨ ଉପ ମୁଖ୍ୟମନ୍ତ୍ରୀଙ୍କ ନାମ ଘୋଷଣା କରିପାରେ ଭାଜପା। ଉତ୍ତର ପ୍ରଦେଶ, ରାଜସ୍ଥାନ, ବିହାର ଭଳି ଦଳ ରାଜଧାନୀରେ ବି ୨ ଉପମୁଖ୍ୟମନ୍ତ୍ରୀ ଘୋଷଣା କରିପାରେ। ଏବେ କୁହାଯାଉଛି କି ପ୍ରବେଶ ବର୍ମାଙ୍କୁ ଦଳ ଉପ ମୁଖ୍ୟମନ୍ତ୍ରୀ କରିପାରେ।
ସୂଚନାଯୋଗ୍ୟ, ଦିଲ୍ଲୀରେ ବିଧାନସଭା ନିର୍ବାଚନରେ ଭାଜପା ବିପୁଳ ସଂଖ୍ୟାଗରିଷ୍ଠତା ସହିତ ବିଜୟୀ ହୋଇଛି। ୨୭ ବର୍ଷ ପରେ ଦଳ ଦିଲ୍ଲୀରେ ସରକାର ଗଠନ କରିବାକୁ ଯାଉଛି। ଦିଲ୍ଲୀର ନୂତନ ମୁଖ୍ୟମନ୍ତ୍ରୀଙ୍କ ଶପଥ ଗ୍ରହଣ ସମାରୋହ ୨୦ ଫେବୃଆରୀରେ ଅନୁଷ୍ଠିତ ହେବାକୁ ଯାଉଛି। ତଥାପି, ଏହାର ସମୟ ପୁଣି ଥରେ ପରିବର୍ତ୍ତନ କରାଯାଇଛି। ଦିଲ୍ଲୀର ନୂତନ ମୁଖ୍ୟମନ୍ତ୍ରୀଙ୍କ ଶପଥ ଗ୍ରହଣ ଉତ୍ସବ ଏବେ ସକାଳ ୧୧ଟା ପରିବର୍ତ୍ତେ ଦିନ ୧୨.୦୫ ରେ ଆରମ୍ଭ ହେବ।
ସୂଚନା ଅନୁସାରେ, ଦିଲ୍ଲୀ ମୁଖ୍ୟମନ୍ତ୍ରୀଙ୍କ ଶପଥ ଗ୍ରହଣ ଉତ୍ସବର ସମୟ ଦ୍ୱିତୀୟ ଥର ପାଇଁ ପରିବର୍ତ୍ତନ କରାଯାଇଛି। ପ୍ରାରମ୍ଭରେ, ଶପଥ ଗ୍ରହଣ ଉତ୍ସବ ପାଇଁ ଅପରାହ୍ନ ୪.୩୦ ସମୟକୁ ବାଛି ଦିଆଯାଇଥିଲା। କିନ୍ତୁ ସୋମବାର ଏହାକୁ ସକାଳ ୧୧ଟାକୁ ପରିବର୍ତ୍ତନ କରାଯାଇଥିଲା। ଏବେ ସମୟ ପୁଣି ବଦଳି ଯାଇଛି। ସର୍ବଶେଷ ଅପଡେଟ ଅନୁଯାୟୀ, ଦିଲ୍ଲୀ ମୁଖ୍ୟମନ୍ତ୍ରୀ ଦିନ ୧୨.୦୫ ସମୟରେ ଶପଥ ଗ୍ରହଣ କରିବେ।
