ଜୁନାଗଡ଼,୫।୮(ଡି.ଏନ.ଏ.): କଳାହାଣ୍ଡି ଜିଲା ଜୁନାଗଡ଼ ରେଞ୍ଜ ଅଧୀନ ଘନା ସଂରକ୍ଷିତ ଜଙ୍ଗଲରେ ଗୁରୁବାର ଏକ ଅଭାବନୀୟ ଘଟଣା ଘଟିଛି। ହାତୀର ଗତିବିଧି ଲକ୍ଷ୍ୟ କରିବାକୁ ଯାଇଥିବା ବନ ବିଭାଗ ସ୍କ୍ବାଡ ଟିମ୍ର ଜଣେ କର୍ମଚାରୀଙ୍କ ହାତୀ ଆକ୍ରମଣରେ ମୃତ୍ୟୁ ଘଟିିଛି। ମୃତକ ହେଲେ କଲେଇଗାଁ ପଞ୍ଚାୟତ ସାନଡୁମେରବାହାଲ ଗ୍ରାମର ଜଗନ୍ନାଥ ତ୍ରିପାଠୀ (୪୭)।
ମିଳିଥିବା ସୂଚନା ମୁତାବକ, ଅପରାହ୍ନରେ ବନ ବିଭାଗର ଏକ ୧୨ ଜଣିଆ ଟିମ୍ ଘନା ସଂରକ୍ଷିତ ଜଙ୍ଗଲ ଗୋଲାମୁଣ୍ଡା ଗ୍ରାମ ନିକଟରେ ହାତୀ ଆସିଥିବା ଖବର ପାଇ ଘଟଣାସ୍ଥଳକୁ ଯାଇଥିଲେ। ସେଠାରେ ହଠାତ୍ ଏକ ହାତୀପଲ ସହ ସେମାନେ ମୁହଁାମୁହଁି ହୋଇଯାଇଥିଲେ। ସମସ୍ତ କର୍ମଚାରୀ ଏଣେତେଣେ ଦୌଡି ପଳାଇଥିଲେ। କିନ୍ତୁ ତଳେ ପଡିଯାଇଥିଲେ ଜଗନ୍ନାଥ। ହାତୀପଲ ତାଙ୍କୁ ଦଳି ଦେଇଥିଲା। ଫଳରେ ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଥିଲା। ଜୁନାଗଡ଼ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ମୃତଦେହ ବ୍ୟବଚ୍ଛେଦ ପରେ ପରିବାରବର୍ଗଙ୍କୁ ହସ୍ତାନ୍ତର କରାଯାଇଛି। ଜୁନାଗଡ ରେଞ୍ଜ ଅଧିକାରୀ ମୁରାରୀ ପଣ୍ଡା, ଫରେଷ୍ଟର ନୀହାର ରଞ୍ଜନ ଠାକୁର, ଜୟଦେବ ମାଝି, ଦେବେନ୍ଦ୍ର ମାଝିଙ୍କ ସମେତ ବନ ବିଭାଗ ଅଧିକାରୀ ଗାଁରେ ପହଞ୍ଚି ମୃତକଙ୍କ ପରିବାରକୁ ସମବେଦନା ଜଣାଇଛନ୍ତି। ସରକାରୀ ସ୍ତରରେ ଯାହାକିଛି ସୁବିଧା ରହିଛି ମୃତକଙ୍କ ପରିବାର ଲୋକଙ୍କୁ ଯୋଗାଇ ଦିଆଯିବ ବୋଲି ବନବିଭାଗ ଅଧିକାରୀମାନେ ପ୍ରକାଶ କରିଛନ୍ତି।
