ମହାକାଳପଡ଼ା,୨୩ା୫(ପ୍ରତାପ ଚନ୍ଦ୍ର ସ୍ବାଇଁ): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଗହୀରମଥା ସାମୁଦ୍ରିକ ଅଭୟାରଣ୍ୟ ଅଞ୍ଚଳ ଶାସନପେଟା ଗ୍ରାମ ପାର୍ଶ୍ୱ ଜଙ୍ଗଲରୁ ଦୁଇ ଶିକାରୀ ହରିଣ ଶିକାର କରିଥିବାବେଳେ ଶୁକ୍ରବାର ବନ ବିଭାଗ ସେମାନଙ୍କୁ ଧରିଛି। ସେମାନେ ହେଲେ ତନ୍ତିଆପାଳ ସାମୁଦ୍ରିକ ଥାନା ଚକଡା଼ ଅଞ୍ଚଳର ଉତ୍ତମ କାମିଲା ଓ ସୁନିତି ଅଞ୍ଚଳର ରାମକୃଷ୍ଣ କାମିଲା। ସେମାନଙ୍କଠାରୁ ୯ କିଲୋ ହରିଣ ମାଂସ ଜବତ ହୋଇଛି। ଏହାସହ ଜାଲ, ଫାଶ, ମୋବାଇଲ ଫୋନ ସହ ମାରଣାସ୍ତ୍ର ଜବତ ହୋଇଛି। ଏ ନେଇ କେସ ନମ୍ବର ୦୩ ଜି-୨୬/୨୭ ମାମଲା ରୁଜୁ କରି ୧୯୭୨ ବନ୍ୟଜନ୍ତୁ ସଂରକ୍ଷଣ ଆଇନ ଧାରାରେ ଗିରଫ କରି କେନ୍ଦ୍ରାପଡ଼ା ଜିଲା ମୁଖ୍ୟ ବିଚାର ବିଭାଗୀୟ ମାଜିଷ୍ଟ୍ରେଟ କୋର୍ଟକୁ ପଠାଇ ଦିଆଯାଇଛି ବୋଲି ରେଞ୍ଜ ଅଧିକାରୀ କପିଳେନ୍ଦ୍ର ପ୍ରଧାନ କହିଛନ୍ତି। ଫରେଷ୍ଟର ମହନ୍ତ କୁମାର ମଲିକ ଓ ଅନ୍ୟ କର୍ମଚାରୀମାନେ ଏହି ଚଢାଉ କରିଥିଲେ।
