ଭଦ୍ରକ ଅଫିସ,୨୦।୬: ଭଦ୍ରକ ପୁରୁଣାବଜାର ଅଞ୍ଚଳରୁ ଜବରଦଖଲ ଉଚ୍ଛେଦ ନେଇ ସୋମବାର ଜିଲାପାଳଙ୍କ ନିକଟରେ ଦାବି ହୋଇଛି। ସନ୍ଥିଆ ପୋଲଠାରୁ ନଙ୍ଗାମହଲା, ପାଟଣାସାହି, ସାନଶଙ୍କରପୁର, ପୁରୁଣାବଜାର ତିନିଛକ, କଦମବେଢ଼ାଠାରୁ ମୁଲ୍ଲାସାହି, ଚନ୍ଦନବଜାର, ପୁରୁଣାବଜାର, ବାଙ୍କାବଜାରଠାରୁ ସଙ୍ଗତ ପର୍ଯ୍ୟନ୍ତ ମୁଖ୍ୟରାସ୍ତା ଅଞ୍ଚଳରୁ ଜବରଦଖଲ ଉଚ୍ଛେଦ କରାଯାଉ। ଏଥିସହ ରାସ୍ତା ପ୍ରଶସ୍ତୀକରଣ ପାଇଁ ଜିଲାପାଳଙ୍କ ନିଟକରେ ଦାବି କରାଯାଇଛି। ଏହି ରାସ୍ତାରେ ଭଦ୍ରକ ପୌରପାଳିକା ସମେତ ଗୁଜିଦରଡ଼ା, ଖଣ୍ଡତଡ଼ା ଓ ବେନ୍ତାଳ ପଞ୍ଚାୟତର ହଜାର ହଜାର ଲୋକ ଯାତାୟାତ କରନ୍ତି। ଜବରଦଖଲ ଯୋଗୁ ରାସ୍ତା ଅଣଓସାରିଆ ହୋଇଥିବାରୁ ଉକ୍ତ ରାସ୍ତାରେ ଦମକଳ ଗାଡ଼ି କିମ୍ବା ଆମ୍ବୁଲାନ୍ସ ଯାତାୟାତ କରିବାରେ ସମସ୍ୟା ସୃଷ୍ଟି ହେଉଛି।
ଏହାର ସ୍ଥାୟୀ ପ୍ରତିକାର ନିମନ୍ତେ ଜବରଦଖଲ ହଟାଇ ରାସ୍ତା ପ୍ରଶସ୍ତୀକରଣ କରାଯିବାକୁ ପୁରୁଣାବଜାର ଅଞ୍ଚଳର ବରିଷ୍ଠ ନାଗରିକ ହାଜୀ ସେକ୍ ମହମ୍ମଦ ଫାରୁକ, ଆଇନଜୀବୀ ସେକ୍ ଅବୁ ସୁଫିୟାନ ପ୍ରମୁଖ ଏକ ଦାବିପତ୍ର ଜିଲାପାଳଙ୍କୁ ପ୍ରଦାନ କରିଛନ୍ତି। ଦାବି ପୂରଣ ନ ହେଲେ ଆଗାମୀ ଦିନରେ ଗଣଆନ୍ଦୋଳନ କରାଯିବ ବୋଲି ଚେତାବନୀ ଦିଆଯାଇଛି।
