ବିହାରର ବେଗୁସରାଇରେ ଏକ ଆଶ୍ଚର୍ଯ୍ୟଜନକ ଘଟଣା ଘଟିଛି। ବିବାହର ମାତ୍ର ୧୦ ଦିନ ପରେ ନବବିବାହିତା ସ୍ବାମୀଙ୍କୁ ଭଲ ପାଉ ନ ଥିବା କହିଛନ୍ତି।
ଜୁନ୍ ୧୪ରେ ରାଞ୍ଚି ନିବାସୀ ପୂଜା ପରିବାରର କଥା ମାନି ବେଗୁସରାଇ ନିବାସୀ ଅଙ୍କିତ କୁମାରଙ୍କୁ ବିବାହ କରିଥିଲେ। ବିବାହ ପରେ ପୂଜା ସ୍ବାମୀଙ୍କ ସହ ବେଗୁସରାଇରେ ରହୁଥିଲେ। ମାତ୍ର ୧୦ ଦିନ ପରେ ପୂଜା ସ୍ବାମୀଙ୍କ ସହ ରହିବାକୁ ମନା କରିଦେଇଥିଲେ। କାରଣ ସେ ସ୍ବପ୍ନା ନାମକୁ ଜଣେ ଝିଅକୁ ଭଲ ପାଉଥିବା କହିଥିଲେ। ଏହା ଶୁଣିବା ପରେ ସ୍ବାମୀ ଅଙ୍କିତଙ୍କ ହୋସ୍ ଉଡ଼ିଯାଇଥିଲା। ଏ ନେଇ ଅଙ୍କିତ ନିକଟସ୍ଥ ନଗର ଥାନା ପୋଲିସକୁ ଜଣାଇଥିଲେ। ପୋଲିସ ଆଗରେ ପୂଜା ସବୁ ସତ କଥା ମାନିଯାଇଥିଲେ।
ସ୍ବପ୍ନା ଏବଂ ପୂଜା ଏକ କପଡ଼ା ଦୋକାନରେ ଏକତ୍ର କାମ କରୁଥିଲେ। ଏହି ସମୟରେ ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ଗଢ଼ିଉଠିଥିଲା। ଇତିମଧ୍ୟରେ ପୂଜାଙ୍କ ପରିବାର ଲୋକେ ତାଙ୍କର ଇଚ୍ଛା ବିରୋଧରେ ଅନ୍ୟ ସ୍ଥାନରେ ବିବାହ କରିଥିଲେ। ଏଥିରେ ପୂଜା ଖୁସି ନ ଥିଲେ। ସ୍ବପ୍ନା ମଧ୍ୟ ପୂଜାକୁ ନିଜ ସ୍ତ୍ରୀ ବୋଲି ମାନୁଥିଲେ। ଏହି ଘଟଣା ସମ୍ମୁଖକୁ ଆସିବା ପରେ ଅଙ୍କିତ ପୂଜାକୁ ବିବାହ ବନ୍ଧନରୁ ମୁକ୍ତ କରିଥିବା ଜଣାପଡ଼ିଛି।
