ବ୍ରହ୍ମପୁର ଅଫିସ,୧।୬: ଜେଲ ଡିଜି ଡ. ମନୋଜ କୁମାର ଛାବ୍ରା ବୁଧବାର ବ୍ରହ୍ମପୁର ମଣ୍ଡଳକାରାଗାର ପରିଦର୍ଶନରେ ଆସିଥିଲେ। ବ୍ରହ୍ମପୁର ଜେଲ ଅନ୍ତେବାସୀମାନେ ଏଫଏମ୍ ରେଡିଓ ପରିଚାଳନା କରିବେ। ସେମାନଙ୍କ ମଧ୍ୟରେ ଥିବା ପ୍ରତିଭା ରେଡିଓ ମାଧ୍ୟମରେ ପରିବେଷିତ ହେବ। ଯାହାକୁ ଲୋକେ ଶୁଣିବାର ସୁଯୋଗ ପାଇବେ। ଏହା ଖୁବଶୀଘ୍ର କାର୍ଯ୍ୟକାରୀ ହେବ ବୋଲି ଜେଲ ଡିଜି ଡ.ଛାବ୍ରା ମତବ୍ୟକ୍ତ କରିଛନ୍ତି। ସେ ଆହୁରି କହିଛନ୍ତି ବ୍ରହ୍ମପୁର ଜେଲରେ ଥିବା ଅନ୍ତେବାସୀଙ୍କ ମଧ୍ୟରେ ବହୁବିଧ ଲୁକ୍କାୟିତ ପ୍ରତିଭା ରହିଛି। କେତେଜଣ ଅନ୍ତେବାସୀ ନୃତ୍ୟ ପରିବେଷଣ କରି ଜାତୀୟ ସ୍ତରରେ ପୁରସ୍କୃତ ହୋଇଛନ୍ତି। ତେଣୁ ଏପରି ଅନ୍ତେବାସୀମାନଙ୍କ ପ୍ରତିଭାକୁ ଅଧିକ ବିକଶିତ କରିବା ପାଇଁ ଜେଲ ମଧ୍ୟରେ କେତେକ ସଂସ୍କାର କାର୍ଯ୍ୟ କରାଯାଉଛି। ଏଫଏମ୍ ରେଡିଓ ପରିଚାଳନା କରିବା ଲାଗି ଅନ୍ତେବାସୀମାନଙ୍କୁ ତାଲିମ ଦିଆଯିବ ବୋଲି ଜେଲ୍ ଡିଜି କହିଛନ୍ତି। ଓଡିଶାରେ ୮୭ ଜେଲ ରହିଛି। ବ୍ରହ୍ମପୁର ମଣ୍ଡଳ କାରାଗାର ଏକ ଗୁରୁତ୍ୱପୂର୍ଣ୍ଣ ଜେଲ। ସବୁ ଜେଲକୁ ଦଣ୍ଡଗୃହ ବୋଲି ବିଚାର ନ କରି ଏକ ସୁଧାର ଗୃହ ତଥା ଆଶ୍ରମ ଭାବେ ବିଚାର କରାଯାଉ। ଏ ନେଇ ସରକାର ପଦକ୍ଷେପ ଗ୍ରହଣ କରିଛନ୍ତି। ଭୁବନେଶ୍ୱର ସ୍ବତନ୍ତ୍ର ଜେଲ ଓ ଚୌଦ୍ୱାର ଜେଲରେ ଅନେକ ସଂସ୍କାରମୂଳକ କାର୍ଯ୍ୟକ୍ରମ ହାତକୁ ନିଆଯାଇଛି। ଯାହା ଫଳରେ କଏଦୀମାନେ ସେମାନଙ୍କ ପ୍ରତିଭା ଦେଖାଇଛନ୍ତି। ସେମାନଙ୍କ ମଧ୍ୟରେ ଥିବା ବୈଷୟିକ ଜ୍ଞାନର ମଧ୍ୟ ବିକାଶ ହୋଇଛି। ଜେଲରେ ବ୍ୟୁଟି ପାର୍ଲର ତାଲିମ, ହେୟାର ଷ୍ଟାଇଲ, ସ୍ବାସ୍ଥ୍ୟ ସେବା ତାଲିମ ଦିଆଯିବ। ଓଡିଶା ସରକାରଙ୍କ ସ୍କିଲ ଡେଭେଲପମେଣ୍ଟ ଅଥରିଟି ଦ୍ୱାରା ସମନ୍ବୟ ରକ୍ଷା କରାଯାଇ କଏଦୀମାନଙ୍କୁ ଏସି ମେକାନିକ, ପାଣି ପାଇପ ମେକାନିକ, କମ୍ପ୍ୟୁଟର ତାଲିମ, ମୋବାଇଲ ରିପାରିଂ, ନୃତ୍ୟ, ଗୀତ, ସଙ୍ଗୀତ ଶିକ୍ଷା ଭୁବନେଶ୍ୱର ଓ ଚୌଦ୍ୱାର ଜେଲରେ ଆରମ୍ଭ ହୋଇଛି। ଏହାକୁ ମଧ୍ୟ ବ୍ରହ୍ମପୁର ଜେଲରେ ଲାଗୁ କରାଯିବ ବୋଲି ଜେଲ୍ ଡିଜି କହିଥିଲେ। ଏହି ଅବସରରେ ସେ ଜେଲ ପରିସରରେ ଅଧିକ ୧୦୦ ବନ୍ଦୀ ରହିବା ଲାଗି ଏକ ଓ୍ବାର୍ଡକୁ ଉଦଘାଟନ କରିଥିଲେ। ଏହାସହ କିନ୍ନର କଏଦୀ ରହିବା ପାଇଁ ଏକ ୧୦ ବେଡ୍ ବିଶିଷ୍ଟ ୱାର୍ଡ ଉଦଘାଟନ କରିଥିଲେ। ଜାତୀୟ ସ୍ତରରେ ନୃତ୍ୟ ପ୍ରତିଯୋଗିତାରେ ପ୍ରଥମ ସ୍ଥାନ ଅଧିକାର କରିଥିବା କଏଦୀମାନଙ୍କୁ ଜେଲ ଡିଜି ପୁରସ୍କୃତ କରିଥିଲେ। ପରିଦର୍ଶନ ସମୟରେ ଜେଲ ଡିଜିଙ୍କ ସହ ଦକ୍ଷିଣାଞ୍ଚଳ ଆଇଜି ସତ୍ୟବ୍ରତ ଭୋଇ, ଜେଲ ଅଧୀକ୍ଷକ ଧୀରେନ୍ଦ୍ରନାଥ ବାରିକ, ବ୍ରହ୍ମପୁର ଏସ୍ପି ଡା. ସର୍ବଣା ବିବେକ ଏମ୍, ଜେଲର ସତ୍ୟନାରାୟଣ ବେହେରା ଉପସ୍ଥିତ ଥିଲେ।
