ନୂଆଦିଲ୍ଲୀ/ତେହେରାନ, ୨୨।୬: ଆମେରିକାର ସାମ୍ପ୍ରତିକ ସାମରିକ କାର୍ଯ୍ୟାନୁଷ୍ଠାନ, ବିଶେଷତଃ ଇରାନର ପରମାଣୁ କେନ୍ଦ୍ରଗୁଡ଼ିକ ଉପରେ ଆକ୍ରମଣ ପରେ ବିଶ୍ୱରେ ଏକ ବଡ଼ ମୋଡ଼ ଆସିଛି। ଏହି ପରିପ୍ରେକ୍ଷୀରେ ପାଞ୍ଚଟି ଦେଶ ଆମେରିକା ବିରୋଧରେ ଏକଜୁଟ ହୋଇ ଏକ ବଡ଼ ଘୋଷଣା କରିଛନ୍ତି, ଯାହା ଆନ୍ତର୍ଜାତୀୟ ସ୍ତରରେ ତୀବ୍ର ଚର୍ଚ୍ଚାର ବିଷୟ ହୋଇଛି।
ସୂଚନା ଅନୁଯାୟୀ, ଇରାନ,ଚାଇନା, ରୁଷିଆ, ଉତ୍ତର କୋରିଆ ଏବଂ କ୍ୟୁବା ଆମେରିକାର ଏହି ଆକ୍ରମଣାତ୍ମକ ନୀତି ବିରୋଧରେ ଏକ ମୋର୍ଚ୍ଚା ଗଠନ କରିଛନ୍ତି। ଏହି ଦେଶଗୁଡ଼ିକ ଆମେରିକାର ଏକତରଫା ସାମରିକ କାର୍ଯ୍ୟକୁ ନିନ୍ଦା କରିଛନ୍ତି ଏବଂ ଏହାକୁ ଆନ୍ତର୍ଜାତୀୟ ଶାନ୍ତି ଓ ସ୍ଥିରତା ପାଇଁ ଏକ ବଡ଼ ବିପଦ ବୋଲି ଅଭିହିତ କରିଛନ୍ତି। ଏକ ମିଳିତ ବିବୃତିରେ ଏହି ଦେଶଗୁଡ଼ିକ ଆମେରିକା ବିରୋଧରେ ଅର୍ଥନୈତିକ ଓ ରାଜନୈତିକ ପଦକ୍ଷେପ ଗ୍ରହଣ କରିବାକୁ ଚିନ୍ତା କରୁଥିବା ସୂଚନା ଦେଇଛନ୍ତି।
ସାମ୍ପ୍ରତିକ ରିପୋର୍ଟ ଅନୁଯାୟୀ, ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ନିର୍ଦ୍ଦେଶରେ ଇରାନର ତିନୋଟି ପରମାଣୁ କେନ୍ଦ୍ରଫୋର୍ଡୋ, ନାଟାଞ୍ଜ ଏବଂ ଇସଫାହାନଉପରେ ବଡ଼ ଧରଣର ବୋମା ବର୍ଷା କରିଛି। ଟ୍ରମ୍ପ ସୋସିଆଲ ମିଡିଆରେ ଦାବି କରିଛନ୍ତି ଯେ, ସମସ୍ତ ଯୁଦ୍ଧବିମାନ ନିରାପଦରେ ଫେରିଛି ଏବଂ ଇରାନର ପରମାଣୁ କାର୍ଯ୍ୟକ୍ରମକୁ ନଷ୍ଟ କରାଯାଇଛି। ଏହି ଆକ୍ରମଣକୁ ଇରାନ ଏକ ଆନ୍ତର୍ଜାତୀୟ ନିୟମର ଉଲ୍ଲଂଘନ ବୋଲି ଅଭିହିତ କରି କଡ଼ା ପ୍ରତିଶୋଧ ନେବାକୁ ଚେତାବନୀ ଦେଇଛି।
ଏହି ପାଞ୍ଚ ଦେଶର ମୋର୍ଚ୍ଚା ଆମେରିକା ବିରୋଧରେ ଏକ ମିଳିତ ରାଜନୈତିକ ଓ ଅର୍ଥନୈତିକ ଜୋଟ ଗଠନ କରିବାକୁ ଯୋଜନା କରୁଛି। ସୂଚନା ଅନୁଯାୟୀ, ଏହି ଦେଶଗୁଡ଼ିକ ଆମେରିକା ଉପରେ ଅର୍ଥନୈତିକ ର୍ନିବନ୍ଧନ ଲଗାଇବା, ବାଣିଜ୍ୟିକ ସମ୍ପର୍କ ହ୍ରାସ କରିବା ଏବଂ ଆନ୍ତର୍ଜାତୀୟ ମଞ୍ଚରେ ଆମେରିକାକୁ ଏକଘରେଇ କରିବାକୁ ଚେଷ୍ଟା କରିପାରେ। ଏହା ସହିତ, ଇରାନ ଏବଂ ତା’ର ସହଯୋଗୀ ଦେଶମାନେ ସାମରିକ ପ୍ରସ୍ତୁତିକୁ ମଧ୍ୟ ଜୋରଦାର କରୁଥିବା ଜଣାପଡ଼ିଛି।
ସଂଯୁକ୍ତ ରାଷ୍ଟ୍ରର ମହାସଚିବ ଆନ୍ତୋନିଓ ଗୁଟେରେସ ଏହି ଆକ୍ରମଣକୁ ନିନ୍ଦା କରି ସମସ୍ତ ପକ୍ଷକୁ ଶାନ୍ତି ଓ ସଂଯମ ରକ୍ଷା କରିବାକୁ ଅପିଲ କରିଛନ୍ତି। ଅନ୍ୟପକ୍ଷରେ, ଇସ୍ରାଏଲର ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ ଆମେରିକାର ଏହି ପଦକ୍ଷେପକୁ ସୱାଗତ କରି ଟ୍ରମ୍ପଙ୍କୁ ଧନ୍ୟବାଦ ଜଣାଇଛନ୍ତି।
ଏହି ପାଞ୍ଚ ଦେଶର ଏକଜୁଟ ଘୋଷଣା ଏବଂ ଆମେରିକାର ସାମରିକ କାର୍ଯ୍ୟ ବିଶ୍ୱକୁ ଏକ ଅସ୍ଥିର ପରିସ୍ଥିତି ଆଡ଼କୁ ନେଇଯାଉଛି। ଏହା ଏକ ବୃହତ ଆଞ୍ଚଳିକ ବା ବିଶ୍ୱଯୁଦ୍ଧର ଆଶଙ୍କାକୁ ବଢ଼ାଇଛି। ବିଶେଷଜ୍ଞମାନେ କହୁଛନ୍ତି ଯେ, ଏହି ପରିସ୍ଥିତିରେ କୂଟନୈତିକ ଆଲୋଚନା ଏବଂ ଶାନ୍ତି ପ୍ରତିଷ୍ଠା ପାଇଁ ଆନ୍ତର୍ଜାତୀୟ ସମୁଦାୟର ଏକଜୁଟ ଉଦ୍ୟମ ଅତ୍ୟନ୍ତ ଜରୁରୀ। ଏହି ଘଟଣାକ୍ରମ ବିଶ୍ୱ ରାଜନୀତିରେ ଏକ ନୂଆ ଅଧ୍ୟାୟର ସୂଚନା ଦେଉଛି, ଯାହାର ପରିଣାମ ଆଗାମୀ ଦିନରେ ଅଧିକ ସ୍ପଷ୍ଟ ହେବ।
