ଭୁବନେଶ୍ୱର,୩।୨:ଚଳିତ ଥରର ବଜେଟ ବେଶ ଲୋକାଭିମୁଖୀ ଓ ସନ୍ତୁଳିତ ହୋଇଥିବା ବେଳେ ଅମୃତକାଳରେ ଏହା ପ୍ରଥମ ପ୍ରଗତିଶୀଳ ‘ସପ୍ତଋଷି’ ବଜେଟ୍ ବୋଲି ଶିଳ୍ପ ସଂଘ ପକ୍ଷରୁ କୁହାଯାଇଛି। ଏପରିକି ଶିଳ୍ପର ଅଭିବୃଦ୍ଧି ସହ ଭାରତକୁ ଏକ ବିଶ୍ୱସ୍ତରୀୟ ଉପତ୍ାଦନ କେନ୍ଦ୍ରରେ ପରିଣତ କରିବାକୁ ଏହା ସଠିକ୍ ଦିଗ ଦେଇଛି। ଏ ସମ୍ପର୍କରେ ଏଏମ୍ଏନ୍ଏସ୍ ଇଣ୍ଡିଆର ସିଇଓ ଏବଂ ଆର୍ସଲରମିତଲର କାର୍ଯ୍ୟନିର୍ବାହୀ ଉପସଭାପତି ତଥା ଇଣ୍ଡିଆନ୍ ଷ୍ଟିଲ ଆସୋସିଏସନ୍ର ସଭାପତି ଦିଲ୍ଲୀପ ଉମେନ୍ କହିଛନ୍ତି, ଚଳିତ ବଜେଟ ବେଶ ସ୍ବାଗତ ଯୋଗ୍ୟ, ଏପରିକି ଉଲ୍ଲେଖନୀୟ ୩୩% ବୃଦ୍ଧି ସହ ୧୦ ଲକ୍ଷ କୋଟି ଟଙ୍କାର ପୁଞ୍ଜି ବ୍ୟୟ ଯାହା ଜିଡିପିର ୩.୩%, ଭିତିଭୂମିର ଦ୍ରୁତ ବିକାଶ ପାଇଁ ଜୋର ଏବଂ ରେଳବାଇ ପାଇଁ ଏଯାବତ୍ ସର୍ବାଧିକ ୨.୪୦ ଲକ୍ଷ କୋଟି ଟଙ୍କା ଘରୋଇ ଇସ୍ପାତ ଚାହିଦାକୁ ବୃଦ୍ଧି କରିବ, ଯାହାଦ୍ୱାରା ଘରୋଇ ପୁଞ୍ଜି ବିନିଯୋଗ ଏବଂ ନିଯୁକ୍ତିି ସୃଷ୍ଟି ହେବ। ସେହିଭଳି ୭୫,୦୦୦କୋଟି ଟଙ୍କା ନିବେଶରେ ଇସ୍ପାତ, ବନ୍ଦର, କୋଇଲା ଇତ୍ୟାଦି କ୍ଷେତ୍ରରେ ପାଇଁ ବ୍ୟାପକ ସଂଯୋଗ, ଲଜିଷ୍ଟିକ୍ସ୍ ଦକ୍ଷତା ବୃଦ୍ଧି କରିବ। ଚଳିତ ବଜେଟ୍ରେ ଅଭିବୃଦ୍ଧି ଏବଂ ଉପଭୋଗର ଉନ୍ନତି ଉପରେ ଧ୍ୟାନ ଦିଆଯାଇଛି। ଏଥି ସହିତ ସବୁଜ ଅର୍ଥନୀତି ଏବଂ ଡିଜିଟାଲାଇଜେସନ ଉପରେ ଧ୍ୟାନ ଦିଆଯାଇଛି। ଏପରିକି ୨୦୨୫-୨୬ ସୁଦ୍ଧା ଆର୍ଥିକ ନିଅଣ୍ଟ ସ୍ତରକୁ ଟପି ୪.୫% ନିମ୍ନକୁ ପହଚିଂବା ପାଇଁ ସଂସ୍କାର ଗୁଡିକ ଆର୍ଥିକ ଏକୀକରଣର ସଠିକ୍ ପଥରେ ଅଛି। ସେହିପରି ପ୍ରଗତିଶୀଳ ଅର୍ଥନୀତି ଗୁଡିକ ଏକ କଠିନ ସମୟ ଦେଇ ଗତି କରୁଥିବା ବେଳେ, ଏହି ବଜେଟ୍ ଏକ ଦୀର୍ଘକାଳୀନ ଯୋଜନାକୁ ଦର୍ଶାଉଛି ଓ ଅର୍ଥନୈତିକ ପୁନରୁଦ୍ଧାରରେ ଉଚିତ୍ ମାର୍ଗ ଦର୍ଶନ ଦେବ।
