ଭୁବନେଶ୍ୱର,୫।୫ (ଅଭୟ ଦାଶ):ରାଜ୍ୟର ଅଗ୍ରଣୀ ଘରୋଇ ଚିକିତ୍ସାଳୟ ତଥା ଭୁବନେଶ୍ୱରର ନୀଳାଦ୍ରି ବିହାରସ୍ଥିତ ଉତ୍କଳ ହସ୍ପିଟାଲରେ ରାଜ୍ୟର ପ୍ରଥମ କ୍ୟାଡେଭେରିକ୍ ଲିଭର ଟ୍ରାନ୍ସପ୍ଲାଣ୍ଟ ସର୍ଜରି ସଫଳତାର ସହ ଶେଷ ହୋଇଛି। ଉଲ୍ଲେଖଯୋଗ୍ୟ, ଓଡ଼ିଶା (ଭୁବନେଶ୍ୱର)ର ଉତ୍କଳ ହସ୍ପିଟାଲ ଏବଂ ତେଲଙ୍ଗା ନା (ହାଇଦ୍ରାବାଦ)ର ଏଆଇଜି ହସ୍ପିଟାଲର ମିଳିତ ସହଯୋଗରେ ରାଜ୍ୟର ପ୍ରଥମ କ୍ୟାଡେଭେରିକ୍ ଲିଭର ଟ୍ରାନ୍ସପ୍ଲାଣ୍ଟ ସର୍ଜରି ବା ଯକୃତ ପ୍ରତିରୋପଣ ସଫଳତାର ସହ ଶେଷ ହୋଇଛି।
ଏହି ପରିପ୍ରେକ୍ଷୀରେ ଶନିବାର ଉତ୍କଳ ହସ୍ପିଟାଲ ପକ୍ଷରୁ ଏକ ଖବରଦାତା ସମ୍ମିଳନୀର ଆୟୋଜନ କରାଯାଇଥିଲା। ଏହି ଅବସରରେ ଉତ୍କଳ ହସ୍ପିଟାଲର ସିଇଓ ଡା. ଆଶିଷ ଚନ୍ଦ୍ରା ହସ୍ପିଟାଲର ଏହି ସଫଳତା ଓ ଖବରଦାତା ସମ୍ମିଳନୀର ଆଭିମୁଖ୍ୟ ବିଷୟରେ ବିସ୍ତୃତ ମତପ୍ରକାଶ କରିଥିଲେ।
ଅନ୍ୟମାନଙ୍କ ମଧ୍ୟରେ ଡା. ସତ୍ୟପ୍ରକାଶ ରାୟ ଚୌଧୁରୀ, ଡା. ଆର୍.କେ. ମହାପାତ୍ର, ଡା. ସଲିଳ ପରିଡ଼ା, ଡା. ପି ବାଲଚନ୍ଦ୍ରନ ମେନନ୍, ଡା.ଶକ୍ତିସ୍ବରୂପ ଏବଂ ଏଆଇଜିର ଉପସଭାପତି ସନ୍ତୋଷ କୁମାର ସାହୁ ପ୍ରମୁଖ ଉପସ୍ଥିତ ରହି ନିଜ ନିଜର ମତ ଉପସ୍ଥାପନ କରିଥିଲେ।
ସୂଚନାଯୋଗ୍ୟ, ଲିଭର ସିରୋସିସ୍ ରୋଗରେ ପୀଡ଼ିତ ସୋନପୁରର ୪୧ ବର୍ଷୀୟ ଶରତ ପ୍ରଧାନ ନିକଟରେ ଉତ୍କଳ ହସ୍ପିଟାଲରେ ଆଡ୍ମିଶନ ହୋଇଥିଲେ। ଏପରିକି ହସ୍ପିଟାଲର ଅଭିଜ୍ଞ ଚିକିତ୍ସକ ଡା. ସତ୍ୟପ୍ରକାଶ ରାୟ ଚୌଧୁରୀ ଏବଂ ଡା. ସଲିଳ କୁମାର ପରିଡ଼ାଙ୍କ ନେତୃତ୍ୱରେ କିଛିଦିନ ଚିକିତ୍ସିତ ହେଲା ପରେ ସମସ୍ତ ପରୀକ୍ଷା ନିରୀକ୍ଷା ସହ ଅସ୍ତ୍ରୋପଚାର ପାଇଁ ସମୟ ନିର୍ଘଣ୍ଟ ହୋଇଥିଲା। ବିଶେଷକରି ଏଆଇଜି ହସ୍ପିଟାଲର ବରିଷ୍ଠ ଚିକିତ୍ସକ ତଥା ଲିଭା ଟ୍ରାନ୍ସପ୍ଲାଣ୍ଟ ସର୍ଜରି ନିର୍ଦ୍ଦେଶକ ଡା. ପି. ବାଲଚନ୍ଦ୍ରନ ମେନନ୍ ଏବଂ ଡା. ଶକ୍ତିସ୍ବରୂପଙ୍କ ସମେତ ଉତ୍କଳ ହସ୍ପିଟାଲର ଏକ ସ୍ବତନ୍ତ୍ର ଚିକିତ୍ସକ ଟିମ୍ ଜରିଆରେ ଏହି ଅସ୍ତ୍ରୋପଚାର ବା ଯକୃତ ପ୍ରତିରୋପଣ ସଫଳତାର ସହ କରାଯାଇଥିଲା। ବର୍ତ୍ତମାନ ରୋଗୀ ସୁସ୍ଥ ଥିଲାବେଳେ ଖୁବ୍ଶୀଘ୍ର ରୋଗୀ ଜଣକ ଘରକୁ ଯାଉଛନ୍ତି ବୋଲି ଉତ୍କଳ ହସ୍ପିଟାଲ ପକ୍ଷରୁ ବିସ୍ତୃତ ସୂଚନା ଦିଆଯାଇଛି।
