ରାୟପୁର,୧୨।୧୨: ଛତିଶଗଡ଼ କେଶକାଲ ସହରର ରାବଣଭଟା ନିକଟ ଜାତୀୟ ରାଜପଥରେ ମଙ୍ଗଳାବର ଏକ ଅଭାବନୀୟ ଘଟଣା ଘଟିଛି। ଏକ ଚଳନ୍ତା ବସ୍ରେ ନିଆଁ ଲାଗି ମହିଳାଙ୍କ ସମେତ ୫ଜଣ ଯାତ୍ରୀ ଆହତ ହୋଇଥିବା ଜଣାପଡିଛି।
ମିଳିଥିବା ସୂଚନା ମୁତାବକ, ଏକ ଘରୋଇ ବସ୍ଟି ଜଗଦଲପୁରରୁ ରାୟପୁର ଯାଉଥିଲା। ଏଥିରେ ୪୦ରୁ ଉଦ୍ଧର୍ବ ଯାତ୍ରୀ ଥିଲେ। ହେଲେ ବାଟରେ କେଶକାଲ ନିକଟରେ ବସ୍ରୁ ଧୂଆଁ ବାହାରୁଥିବା ଦେଖି ଡ୍ରାଇଭର ଗାଡିକୁ ଅଟକାଇ ଦେଇଥିଲେ। ହେଲେ ଯାତ୍ରୀମାନେ ଭୟଭୀତ ହୋଇ ଝରକା ଭାଙ୍ଗି ବାହାରକୁ ଆସିଥିବା ଜଣାପଡିଛି। ଅନ୍ୟପକ୍ଷେ ବସ୍ଟି ନିଆଁରେ ଜଳିଯାଇଥିଲା। ଖବର ପାଇ ପୋଲିସ ପହଞ୍ଚି ଯାତ୍ରୀମାନଙ୍କୁ ଉଦ୍ଧାର କରି ଡାକ୍ତରଖାନାକୁ ପଠାଇଥିଲା। ପରବର୍ତ୍ତି ସମୟରେ ସ୍ଥାନୀୟ ଦମକଳ ବାହିନୀ ପହଞ୍ଚି ନିଆଁକୁ ଲିଭାଇଥିଲେ। ଅଗ୍ନିକାଣ୍ଡର କାରଣ ଜଣାପଡ଼ି ନାହିଁ। ହେଲେ ଶର୍ଟସର୍କିଟରୁ ନିଆଁ ଲାଗିଥିବା ସନ୍ଦେହ କରାଯାଉଛି।
