ପ୍ୟାରିସ,୨୪।୧୨: ଆଇକନକ ଆଇଫିଲ୍ ଟାଓ୍ବାରରେ ଲାଗିଲା ନିଆଁ। ଏଥିନେଇ ପୁରା ଟାଓ୍ବାରକୁ ଶୀଘ୍ର ଖାଲି କରାଯାଇଥିଲା। ସେଠାରେ ଉପସ୍ଥିତ ପର୍ଯ୍ୟଟକମାନଙ୍କୁ ଐତିହାସିକ ସ୍ଥାନରୁ ଦୂରକୁ ନିଆଯାଇଥିଲା। କ୍ରିସମାସ୍ ପୂର୍ବଦିନ ଯୋଗୁ ଟାଓ୍ବାରରେ ବହୁ ସଂଖ୍ୟକ ଲୋକ ଏକତ୍ରିତ ହୋଇଥିଲେ। ହେଲେ ଏହାର ଏକ ଲିଫ୍ଟରେ ନିଆଁ ଲାଗିବା ଯୋଗୁ ଭୟର ବାତାବରଣ ଖେଳିଯାଇଥିଲା। ସମସ୍ତଙ୍କୁ ଠିକ୍ ସମୟରେ ବାହାରକୁ ବାହାର କରି ନିଆଯାଇଥିବାରୁ ବଡ଼ ଦୁର୍ଘଟଣା ଟଳିଛି। ସେହିଭଳି ଘଟଣା ପରେ ଟାଓ୍ବାରକୁ ବନ୍ଦ କରାଯାଇ ଘଟଣାର ତଦନ୍ତ ଚାଲିଛି।
ମିରର୍ ୟୁକେର ରିପୋର୍ଟ ମୁତାବକ, ଟାଓ୍ବାରର ରକ୍ଷଣାବେକ୍ଷଣ କରୁଥିବା କମ୍ପାନୀ ଏସ୍ଇଟିଇର ମୁଖପାତ୍ରଙ୍କ ଅନୁଯାୟୀ ଲିଫ୍ଟରେ ସର୍ଟ ସର୍କିଟ ଯୋଗୁ ଆଲାର୍ମ ବାଜ ଉଠିଥଲା। ଟାଓ୍ବାରର ଦ୍ୱିତୀୟ ମହଲା ଏବଂ ଉପର ମହଲାରେ ସମାନ ଘଟଣା ଦେଖିବାକୁ ମିଳିଥିଲା। ସୁରକ୍ଷା ପ୍ରକ୍ରିୟାକୁ ନେଇ ଆମେ ଆଇଫିଲ୍ ଟାଓ୍ବାରକୁ ଖାଲି କରିଦେଇଛୁ ବୋଲି ମୁଖପାତ୍ର କହିଛନ୍ତି।
ସାଧାରଣତଃ କ୍ରିସମାସ ଅବସରରେ ବହୁ ସଂଖ୍ୟକ ପର୍ଯ୍ୟଟକ ଆଇଫିଲ ଟାଓ୍ବାର ପରିଦର୍ଶନ କରିବାକୁ ଆସନ୍ତି। ଆଜି ମଧ୍ୟ ସମାନ ଘଟିଥିଲା। ସେଠାରେ ପର୍ଯ୍ୟଟକମାନେ କିଛି ଧୂଆଁ ବାହାରୁଥିବା ଦେଖିଥିଲେ। ପରେ ଆଲାର୍ମ ବାଜିଥିଲା। ଏହା ପରେ କିଛି ସମୟ ଲାଗି ଲୋକେ ଦୌଡ଼ିବା ଆରମ୍ଭ କରିଥିଲେ। ଶେଷରେ ପ୍ରାୟ ୧୨୦୦ ଲୋକଙ୍କୁ ଟାଓ୍ବାରରୁ ସୁରକ୍ଷିତ ଭାବେ ବାହାର କରାଯାଇଥିା ସୂଚନା ମିଳିଛି। ଏଥିରେ କୌଣସି ପର୍ଯ୍ୟଟକଙ୍କ କ୍ଷତି ହୋଇ ନ ଥିବା ପ୍ରାରମ୍ଭିକ ରିପୋର୍ଟରେ ପ୍ରକାଶ ପାଇଛି।
