ବ୍ରହ୍ମପୁର ଅଫିସ,୨୧।୪: ମହାରାଜା କୃଷ୍ଣଚନ୍ଦ୍ର ଗଜପତି (ଏମ୍କେସିଜି) ମେଡିକାଲରେ ଶୁକ୍ରବାର ପୁଣିଥରେ ଅଗ୍ନିକାଣ୍ଡ ଘଟିଛି। ମେଡିକାଲ ପରିସରରେ ଥିବା ସୁପରସ୍ପେସାଲିଟି ବ୍ଲକରେ ଏହି ଅଗ୍ନିକାଣ୍ଡ ଘଟିଛି। ଫଳରେ ସିଟି ସ୍କାନ୍ ବିଭାଗ ପଛପଟେ ଥିବା ଏସି ମେଶିିନ୍ ଜଳି ଯାଇଥିଲା। ଖବର ପାଇ ଅଗ୍ନିଶମ ବିଭାଗ କର୍ମଚାରୀ ସେଠାରେ ପହଞ୍ଚି ନିଆଁକୁ ଆୟତ୍ତ କରିଥିଲେ। ଫଳରେ ବଡ଼ ଅଘଟଣରୁ ରୋଗୀ, ସମ୍ପର୍କୀୟ, ଡାକ୍ତର ଓ କର୍ମଚାରୀମାନେ ବର୍ତ୍ତିଯାଇଥିଲେ।
ମଧ୍ୟାହ୍ନରେ ହଠାତ୍ ବ୍ଲକର ବାହାର ପଟେ ଲାଗିଥିବା ଏସିର ମେସିନରୁ ଧୂଆଁ ବାହାରୁଥିବା ଦେଖିବାକୁ ମିଳିଥିଲା। ଏହା ଦେଖି ତୁରନ୍ତ ସୁରକ୍ଷା କର୍ମୀ ସେଠାରେ ପହଞ୍ଚି ବିଦ୍ୟୁତ୍ ସଂଯୋଗ ବିଚ୍ଛିନ୍ନ କରିଥିଲେ। ଅଗ୍ନିଶମ କର୍ମଚାରୀ ସେଠାରେ ପହଞ୍ଚି ନିଆଁ ଲିଭାଇଥିଲେ। ଫଳରେ ନିଆଁ ଭିତରକୁ ବ୍ୟାପି ନ ଥିଲା। ମାତ୍ରାଧିକ ଲୋଡ୍ ଯୋଗୁ ସର୍ଟସର୍କିଟ୍ ଘଟି ଏଭଳି ଅଗ୍ନିକାଣ୍ଡ ଘଟିଥିବା ଅନୁମାନ କରାଯାଉଛି। ଘଟଣା ପରେ ଏମ୍କେସିଜି ଅଧୀକ୍ଷକଙ୍କ ସମେତ ବରିଷ୍ଠ ଅଧିକାରୀ ଘଟଣାସ୍ଥଳରେ ପହଞ୍ଚି ସ୍ଥିତି ଅନୁଧ୍ୟାନ କରିଥିଲେ।
ଅଗ୍ନିକାଣ୍ଡରେ କେହି ଆହତ ହୋଇ ନାହାନ୍ତି କି ବଡ଼ ଧରଣର କ୍ଷୟକ୍ଷତି ଘଟି ନାହିଁ। ଏମ୍କେସିଜି ବିଗତ ଦିନରେ ମଧ୍ୟ ଏଭଳି ବାରମ୍ବାର ଅଗ୍ନିକାଣ୍ଡ ଘଟଣା ଘଟିଛି। ଗତବର୍ଷ ଅଗଷ୍ଟ ୨୬ ତାରିଖରେ ଏହି ବ୍ଲକରେ ଅଗ୍ନିକାଣ୍ଡ ଘଟିଥିଲା। ସୁପରସ୍ପେସାଲଟି ବ୍ଲକର ପଞ୍ଚମ ମହଲାରେ ସର୍ଟସର୍କିଟ୍ ଘଟି ବିଦ୍ୟୁତ୍ ତାର ପୋଡ଼ି ଯିବା ସହ ଓଟି (ଅପରେସନ୍ ଥିଏଟର୍)ରେ କିଛି ଆସବାବପତ୍ର ଓ ସିଲିଂ ପୋଡ଼ି ଯାଇଥିଲା। ନିଆଁର ପ୍ରକୋପ ବଢ଼ିବା ପୂର୍ବରୁ ପ୍ରବଳ ଧୂଆଁରେ ରୋଗୀ ଓ କର୍ମଚାରୀମାନେ ଶ୍ୱାସରୁଦ୍ଧ ହୋଇ ପଡ଼ିଥିଲେ। ଏମ୍କେସିଜି ପରିସରରେ ଥିବା ଦମକଳ ବାହିନୀ ତୁରନ୍ତ ଘଟଣାସ୍ଥଳରେ ପହଞ୍ଚି ନିଆଁକୁ ଆତ୍ତୟ କରିବା ପରେ ଏକ ବଡ଼ ଧରଣର ଅଘଟଣକୁ ଟାଳି ଦିଆଯାଇପାରିଥିଲା।
