ଦିଗପହଣ୍ଡି,୧।୨(ଅଶେଷ ନାଥ ମିଶ୍ର): କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ୨୦୨୬-୨୭ ଆର୍ଥିକ ବର୍ଷ ପାଇଁ ଆଣିଥିବା ବଜେଟକୁ ନେଇ ଦିଗପହଣ୍ଡି ଅଞ୍ଚଳର ବିଭିନ୍ନ ବର୍ଗର ଲୋକେ ପ୍ରତିକ୍ରିୟା ପ୍ରକାଶ କରିଛନ୍ତି। ବଜେଟ ଯୁବ ବର୍ଗଙ୍କୁ ସମ୍ପୂର୍ଣ୍ଣ ନିରୁତ୍ସାହିତ କରିଛି ବୋଲି ରାଜନୈତିକ ସମୀକ୍ଷକ ସୀମାଞ୍ଚଳ ପଣ୍ଡା କହିଛନ୍ତି।
ଯୁବଦ୍ୟୋଗୀଙ୍କୁ ସରକାରୀ ତାଲିମ, ସହାୟତା କିମ୍ବା ଯୁବବର୍ଗଙ୍କ ନିଯୁକ୍ତି ପାଇଁ କୌଣସି ବ୍ୟବସ୍ଥା ନାହିଁ। ଶିକ୍ଷା କ୍ଷେତ୍ରରେ ୨.୬୦ ପ୍ରତିଶତ ଏବଂ ସ୍ବାସ୍ଥ୍ୟ ପାଇଁ ମାତ୍ର ୧.୯୬ ଶତାଂଶ ଖର୍ଚ୍ଚ ବଜେଟରେ ଉଲ୍ଲେଖ ଥିବାରୁ କେନ୍ଦ୍ର ସରକାରଙ୍କ ଅସଲ ମୁଖାକୁ ପଦାରେ ପକାଇ ଦେଇଥିବା ସେ ତାଙ୍କ ପ୍ରତିକ୍ରିୟାରେ କହିଛନ୍ତି।
ସ୍ଥାନୀୟ ଲୋକ ସେବା ପରିଷଦର ସମ୍ପାଦକ କୁରେଶୁ ପଣ୍ଡା ବଜେଟ ସାଧାରଣ ଜନତାଙ୍କ ପାଇଁ ଉଦ୍ଦିଷ୍ଟ ନ ଥିବା ଉଲ୍ଲେଖ କରିଛନ୍ତି। ସର୍ବ ଭାରତୀୟସ୍ତରରେ କୃଷି କ୍ଷେତ୍ରରେ ଦେଖାଦେଇଥିବା ସଙ୍କଟର ସମାଧାନ ପାଇଁ ବଜେଟରେ କୌଣସି ବ୍ୟବସ୍ଥା ନାହିଁ। କେବଳ କର୍ପୋରେଟ ହାଉସ ଓ ପୁଞ୍ଜିପତିମାନଙ୍କ ସୁରକ୍ଷା ପାଇଁ ବଜେଟ ପ୍ରସ୍ତୁତ କରାଯାଇଥିବା ସେ ପ୍ରକାଶ କରିଛନ୍ତି।
ଓଡ଼ିଶା କୃଷକ ସଭାର ଗଞ୍ଜାମ ଜିଲା ସମ୍ପାଦକ ପି. ଶିବ ଶଙ୍କରଙ୍କ ମତରେ ରାଜ୍ୟରେ ବନ୍ୟା, ବାତ୍ୟା, ମରୁଡି ଭଳି ପ୍ରାକୃତିକ ବିପର୍ଯ୍ୟୟରୁ ଚାଷୀଙ୍କୁ ସୁରକ୍ଷା ନିମନ୍ତେ ବଜେଟରେ କୌଣସି ବ୍ୟବସ୍ଥା ନାହିଁ। ଧାନ ମଣ୍ଡିରେ ଚାଷୀ ହଟହଟା ହେଉଛନ୍ତି। କୃଷି ପାଇଁ ନୂତନ ଜଳପ୍ରକଳ୍ପ ନିର୍ମାଣ ଓ କ୍ଷେତକୁ ଜଳ ସୁପରିଚାଳନା ନିମନ୍ତେ ବଜେଟରେ ଦୃଷ୍ଟି ଦିଆଯାଇନାହିଁ।
ପୂର୍ବ ବଜେଟମାନଙ୍କରେ କୃଷି ଉତ୍ପାଦନ ପାଇଁ ପ୍ରତିଶ୍ରୁତି ଦିଆଯାଇଥିଲା। ଚଳିତ ବଜେଟରେ କୃଷି ଓ କୃଷକର ଉନ୍ନତି ପାଇଁ ଗୁରୁତ୍ୱ ଦିଆଯାଇନାହିଁ। ଭାଜପା ଜିଲା କାର୍ଯ୍ୟକାରିଣୀ ସଦସ୍ୟ ଭବାନୀ ଶଙ୍କର ପଣ୍ଡା ଚଳିତ ବଜେଟ ସବୁବର୍ଗଙ୍କ ପାଇଁ ସୁନ୍ଦର ବଜେଟ ହୋଇଛି। ଦାରିଦ୍ର୍ୟ ଦୂରୀକରଣ ସହ ଅର୍ଥନୈତିକ ଅସମାନତାକୁ ଦୂର କରିବା ପାଇଁ ସେଥିରେ ଗୁରୁତ୍ୱ ଦିଆଯାଇଛି।
